ອາລີບາບາສ້າງໂຄງການ “ເອ-ໄອດໍ” ເພີ່ມຄວາມສາມາດ ແລະ ໂອກາດໃຫ້ແມ່ຍິງທຸກຍາກສ້າງປັນຍາປະດິດ

ສຳນັກຂ່າວຊິນຫົວຂອງທາງການຈີນລາຍງານ 7 ສິງຫາ 2019 ວ່າ: ອາລີບາບາ ຍັກໃຫຍ່ແຫ່ງວົງການການຄ້າເອເລັກໂຕຣນິກ (E-Commerce) ຂອງຈີນ ປະກາດຈັດຕັ້ງໂຄງການລິເລີ່ມເອ-ໄອດໍ (A-Idol Initiative) ເຊິ່ງຮ່ວມພັດທະນາໂດຍມູນນິທິອາລີເພ, ຫ້ອງທົດລອງປັນຍາປະດິດ (AI) ຂອງອາລີບາບາ ແລະ ມູນນິທິການພັດທະນາແມ່ຍິງຈີນ (CWDF) ເພື່ອຊ່ວຍເຫຼືອຜູ້ທຸກຍາກ ໂດຍສະເພາະແມ່ຍິງໃນເຂດຊົນນະບົດຂອງຈີນ ໃຫ້ມີໂອກາດໄດ້ເຮັດວຽກກັບເອໄອ.

ໄລຍະທຳອິດຂອງໂຄງການລິເລີ່ມ ຈະຈັດຕັ້ງປະຕິບັດໃນ 10 ເມືອງທຸກຍາກທົ່ວປະເທດຈີນ ແລະ ຊ່ວຍເຫຼືອຜູ້ທຸກຍາກ 2,500 ຄອບຄົວ ໂດຍຜູ້ທີ່ເຂົ້າຮ່ວມຈະໄດ້ຮັບການເຝິກອົບຮົບຄວາມສາມາດຕ່າງໆ ທັງໃນດ້ານການຈັດໝວດ ແລະ ຈັດການຂໍ້ມູນ, ຄວາມຮູ້ພື້ນຖານຂອງລະບົບ machine learning ແລະ ການພັດທະນາເອໄອ ໂດຍບໍ່ເສຍຄ່າໃຊ້ຈ່າຍ.

ທ່ານ ແຊມ ເຈີງ ປະທານມູນນິທິອາລີເພກ່າວວ່າ ການພັດທະນາທີ່ວ່ອງໄວຂອງເອໄອ ເຮັດໃຫ້ຕຳແໜ່ງການງານບາງຕຳແໜ່ງສູນຫາຍໄປກໍ່ຈິງ ແຕ່ກໍ່ສ້າງຕຳແໜ່ງງານໃໝ່ທີ່ຫຼາກຫຼາຍເຊັ່ນກັນ.

ໃນດ້ານຂອງຫ້ອງທົດລອງເອໄອຂອງອາລີບາບາ ຈະຮັບປະກັນຄຳສັ່ງຊື້ມູນຄ່າຢ່າງໜ້ອຍ 10 ລ້ານຢວນ ໃນທຸກໆປີ ເພື່ອຄວາມຍືນຍົງຂອງໂຄງການດັ່ງກ່າວ ພ້ອມຍິນດີຕ້ອນຮັບຮຸ້ນສ່ວນທັງໃນ ແລະ ນອກປະເທດ.

ນອກຈາກນັ້ນ, ຫ້ອງທົດລອງເອໄອຂອງອາລີບາບາ ຍັງຈະກຳນົດຄຸນສົມບັດຄວາມເປັນມືອາຊີບຂຶ້ນມາ ເພື່ອພັດທະນາ ແລະ ຕໍ່ຍອດຄວາມສາມາດຂອງຜູ້ເຂົ້າຮ່ວມໂຄງການ ໃຫ້ສາມາດຮັບໃຊ້ໃນຕະຫຼາດແຮງງານໄດ້ຢ່າງກວ້າງຂວາງຂຶ້ນຕື່ມ.

ສ່ວມມູນນິທິພັດທະນາແມ່ຍິງຈີນ ເຊິ່ງເປັນມູນນິທິບໍ່ສະແຫວງຫາຜົນກຳໄລ ເພື່ອພັດທະນາຄຸນນະພາບຊີວິດຂອງແມ່ຍິງໃນຈີນຢ່າງຮອບດ້ານ ຈະເປັນຮຸ້ນສ່ວນໂຄງການດ້ານການຈັດຫາບຸກຄະລາກອນ.

ທ່ານ ເສິນ ຫຼີ ຈວຽນ ຫົວໜ້າຫ້ອງທົດລອງເອໄອຂອງອາລີບາບາກ່າວວ່າ ຄວາມສາມາດຂອງຜູ້ຈັດການຂໍ້ມູນມີຜົນຕໍ່ຄວາມແມ້ນຢຳຂອງ machine learning ແລະ ການປະຍຸກໃຊ້ເອໄອ, ໂຄງການລິເລີ່ມນີ້ ນອກຈາກຈະເປີດໂອກາດໃຫ້ແມ່ຍິງໄດ້ມີວຽກງານເພີ່ມຂຶ້ນ ຍັງຈະຊ່ວຍສ້າງຄວາມສາມາດໃໝ່ໆ ທີ່ມີຄວາມສຳຄັນເປັນຢ່າງຍິ່ງໃນຍຸກດິຈິຕອນອີກດ້ວຍ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube