ຫຼຸດຜ່ອນຄວາມຂັດແຍ່ງ ຍີ່ປຸ່ນອະນຸມັດສົ່ງອອກສານເຄມີໃຫ້ເກົາຫຼີໃຕ້

ລາຍງານ 8 ສິງຫາ 2019: ທ່ານ ລີ ນັກ-ຢອນ ນາຍົກລັດຖະມົນຕີເກົາຫຼີໃຕ້ກ່າວເມື່ອວັນພຸດ ທີ່ຜ່ານມາ ວ່າກະຊວງເສດຖະກິດ, ການຄ້າ ແລະ ອຸດສາຫະກຳຂອງຍີ່ປຸ່ນ ໄດ້ອະນຸມັດໃບອະນຸຍາດສົ່ງອອກວັດຖຸດິບສຳລັບການຜະລິດສິນຄ້າດ້ານເຕັກໂນໂລຊີ ໃຫ້ແກ່ຜູ້ປະກອບການທ້ອງຖິ່ນໃນເກົາຫຼີໃຕ້ ໂດຍເປັນສານເຄມີໄວແສງຊະນິດໜຶ່ງ ເຊິ່ງມີຄວາມຈຳເປັນຫຼາຍໃນການຜະລິດເຊມິຄອນດັກເຕີຂອງບໍລິສັດຊຳຊຸງ ເອເລັກໂຕຣນິກ, ຂະນະດຽວກັນ ນາຍົກລັດຖະມົນຕີເກົາຫຼີໃຕ້ກ່າວອີກວ່າ ລັດຖະບານເກົາຫຼີໃຕ້ຍັງຈະເດີນໜ້າຕາມແນວທາງການທູດ ເພື່ອຫາທາງອອກຮ່ວມກັບລັດຖະບານຍີ່ປຸ່ນຈາກຄວາມຂັດແຍ່ງໃນຄັ້ງນີ້.

ໂດຍເມື່ອວັນທີ 4 ກໍລະກົດ ທີ່ຜ່ານມາ ລັດຖະບານຍີ່ປຸ່ນປະກາດຍົກລະດັບມາດຕະການເຂັ້ມງວດໃນການສົ່ງອອກສານເຄມີຫຼາຍຊະນິດ ແລະ ວັດຖຸດິບທັນສະໄໝທີ່ໃຊ້ໃນອຸດສາຫະກຳການຜະລິດເຊມິຄອນດັກເຕີທີ່ລວມເຖິງຊິບ ແລະ ໜ້າຈໍໂທລະສັບໄປຍັງເກົາຫຼີໃຕ້ ແລະ ຍັງຢືນຢັນວ່າມາດຕະການດັ່ງກ່າວບໍ່ເປັນການລະເມີດກົດລະບຽບຂອງອົງການການຄ້າໂລກ (WTO) ເນື່ອງຈາກບໍ່ແມ່ນການລະງັບການຄ້າຂາຍຢ່າງເດັດຂາດ ພຽງແຕ່ມີຂັ້ນຕອນເພີ່ມຂຶ້ນໃຫ້ຜູ້ປະກອບການຂອງຍີ່ປຸ່ນທີ່ຕ້ອງການສົ່ງອອກສິນຄ້າຄວບຄຸມໄປຍັງເກົາຫຼີໃຕ້ ຕ້ອງຍື່ນຄຳຮ້ອງຂໍອະນຸຍາດຈາກໜ່ວຍງານລັດກ່ອນເທົ່ານັ້ນ ເຖິງແມ່ນວ່າອາດຕ້ອງໃຊ້ເວລາດຳເນີນການເຖິງ 90 ວັນກໍ່ຕາມ.

ທັງນີ້, ຕົ້ນເຫດຂອງຄວາມຂັດແຍ່ງທາງການຄ້າລະຫວ່າງທັງສອງປະເທດໃນຄັ້ງນີ້ ມາຈາກການທີ່ສານໃນນະຄອນຫຼວງໂຊ ມີຄຳພິພາກສາເມື່ອທ້າຍເດືອນຕຸລາ ປີທີ່ຜ່ານມາ ໃຫ້ບໍລິສັດນິບປອນ ສະຕິວ ແລະ ບໍລິສັດມິດຊູບິຊິຂອງຍີ່ປຸ່ນ ຈ່າຍຄ່າຊົດເຊີຍໃຫ້ແກ່ຍາດພີ່ນ້ອງຂອງແຮງງານທາດສະໄໝສົງຄາມໂລກ ຄັ້ງທີ 2 ເຊິ່ງລັດຖະບານຍີ່ປຸ່ນປະທ້ວງໂດຍສຸດຕົວ ໂດຍຢ້ຳວ່າຍີ່ປຸ່ນກັບເກົາຫຼີໃຕ້ໄດ້ລົງນາມຢຸດຕິກໍລະນີຄວາມຂັດແຍ່ງຕໍ່ບັນຫາດັ່ງກ່າວ ມາຕັ້ງແຕ່ປີ 1965 ແລ້ວ, ເຊິ່ງເປັນປີດຽວກັນກັບທີ່ທັງສອງປະເທດລົງນາມຂໍ້ຕົກລົງຟື້ນຟູສາຍພົວພັນທາງການທູດລະຫວ່າງກັນ, ເຖິງແມ່ນວ່າເຈົ້າໜ້າທີ່ລະດັບສູງຂອງທັງສອງປະເທດພະຍາຍາມເຈລະຈາກັນ ໂດຍມີສະຫະລັດ ອາເມຣິກາເປັນຄົນກາງ ລະຫວ່າງກອງປະຊຸມອາຊຽນ ທີ່ນະຄອນຫຼວງບາງກອກ ເມື່ອທ້າຍເດືອນທີ່ຜ່ານມາ ແຕ່ທ່ານ ທາໂຣ ໂຄໂນະ ລັດຖະມົນຕີກະຊວງການຕ່າງປະເທດຍີ່ປຸ່ນ ກ່າວກັບທ່ານ ນາງ ຄັງ ຄະຢອງ-ຮວາ ລັດຖະມົນຕີກະຊວງການຕ່າງປະເທດເກົາຫຼີໃຕ້ ວ່າລັດຖະບານເກົາຫຼີໃຕ້ ຕ້ອງເປັນຝ່າຍແກ້ຂໍ້ຂັດແຍ່ງທີ່ຕົນຜູກຂຶ້ນເອງ.