ຜູ້ນຳເກົາຫຼີເໜືອ ສົ່ງຈົດໝາຍເຖິງ ປ.ທຣຳ ພ້ອມຍິງຂີປະນາວຸດເປັນ ຄັ້ງທີ 5 ໃນຮອບບໍ່ເຖິງເດືອນ

ລາຍງານ 10 ສິງຫາ 2019: ສຳນັກງານຄະນະເສນາທິການທະຫານຮ່ວມຂອງເກົາຫຼີໃຕ້ ອອກຖະແຫຼງການວ່າ ເກົາຫຼີເໜືອຍິງຂີປະນາວຸດພິໄສໃກ້ 2 ລູກອອກຈາກຖານຍິງທາງຝັ່ງຕາເວັນອອກຂອງປະເທດ ແລະ ຕົກລົງໃນທະເລຕາເວັນອອກ ເມື່ອຕອນເຊົ້າມືດຂອງວັນເສົານີ້ ຕາມເວລາທ້ອງຖິ່ນ ຖືເປັນການເຄື່ອນໄຫວທາງທະຫານ ຄັ້ງທີ 5 ຂອງລັດຖະບານເກົາຫຼີເໜືອ ນັບຕັ້ງແຕ່ວັນທີ 25 ກໍລະກົດ ທີ່ຜ່ານມາ ເຊິ່ງເກົາຫຼີເໜືອເປີດເຜີຍວ່າ ໃນຈຳນວນນັ້ນ 2 ຄັ້ງເປັນການທົດລອງປະສິດທິພາບຂອງລະບົບຍິງຂີປະນາວຸດນຳວິຖີຫຼາຍລຳກ້ອງຮຸ້ນໃໝ່.

ເຊິ່ງການລະດົມຍິງຂີປະນາວຸດ ແລະ ທົດລອງປະສິດທິພາບທາງທະຫານຢ່າງຕໍ່ເນື່ອງຂອງເກົາຫຼີເໜືອ ເກີດຂຶ້ນໃນໄລຍະທີ່ ສ.ອາເມຣິກາ ແລະ ເກົາຫຼີໃຕ້ກຳລັງເຝິກຊ້ອມຮົບປະຈຳປີຮ່ວມກັນຕະຫຼອດທັງເດືອນນີ້ ເຊິ່ງເປັນສິ່ງທີ່ລັດຖະບານເກົາຫຼີເໜືອບໍ່ເຄີຍພໍໃຈ ແລະ ກ່າວຫາມາໂດຍຕະຫຼອດວ່າ ເປັນການສະແດງອອກເພື່ອຄຸກຄາມ ເຖິງແມ່ນວ່າຈະຫຼຸດລະດັບການຂອງການຊ້ອມຮົບລົງແລ້ວກໍ່ຕາມ.

ເຊິ່ງການຍິງຂີປະນາວຸດຂອງລັດຖະບານເກົາຫຼີເໜືອໃນຄັ້ງນີ້ ຍັງເກີດຂຶ້ນພຽງບໍ່ພໍເທົ່າໃດຊົ່ວໂມງ ພາຍຫຼັງທີ່ທ່ານ ໂດໂນ ທຣຳ ປະທານປະເທດ ສ.ອາເມຣິກາ ເປີດເຜີຍກັບສື່ວ່າ ຕົນໄດ້ຮັບຈົດໝາຍອັນສວຍງາມຈາກທ່ານ ຄິມ ຈອງ-ອຶນ ຜູ້ນຳສູງສຸດຂອງເກົາຫຼີເໜືອ ເຖິງຈະບໍ່ເປີດເຜີຍລາຍລະອຽດ ແຕ່ຜູ້ນຳ ສ.ອາເມຣິກາ ກ່າວໂດຍລວມວ່າຕົນເພິ່ງພໍໃຈເປັນຢ່າງຍິ່ງກັບເນື້ອໃນຈົດໝາຍຕັ້ງແຕ່ປະໂຫຍກທຳອິດຈົນເຖິງປະໂຫຍກສຸດທ້າຍ, ເຖິງຢ່າງໃດກໍ່ຕາມ ທ່ານ ໂດໂນ ທຣຳ ກ່າວວ່າເກົາຫຼີເໜືອຈະບໍ່ທົດລອງລະເບີດນິວເຄຼຍອີກ ບໍ່ທົດລອງຂີປະນາວຸດຕິດຫົວຮົບ ແລະ ບໍ່ທົດລອງຂີປະນາວຸດຂ້າມທະວີບ (ICBM) ການທົດລອງອາວຸດທີ່ເກີດຂຶ້ນໃນຕອນນີ້ເປັນພຽງຂີປະນາວຸດພິໄສໃກ້ ທີ່ໂດຍສ່ວນຕົວບໍ່ຖືວ່າເປັນບັນຫາ ເພາະບໍ່ໄດ້ລະເມີດຂໍ້ຕົກລົງທີ່ລົງນາມຮ່ວມກັນຢູ່ສິງກະໂປ ເມື່ອເດືອນມິຖຸນາ ປີທີ່ຜ່ານມາ.

ນອກຈາກນີ້, ທ່ານ ໂດໂນ ທຣຳ ຍັງກ່າວອີກວ່າ ຕົນບໍ່ມັກໃນການຍຸດທະສາດເກມສົງຄາມກັບເກົາຫຼີເໜືອ ແລະ ຍັງຄົງເຊື່ອໝັ້ນວ່າຈະໄດ້ພົບປະກັບທ່ານ ຄິມ ຈອງ-ອຶນ ອີກຄັ້ງຢ່າງເປັນທາງການ, ພາຍຫຼັງທີ່ພົບປະກັນຢູ່ເຂດປອດທະຫານ (DMZ) ເມື່ອວັນທີ 30 ມິຖຸນາ ທີ່ຜ່ານມາ, ພ້ອມທັງໝັ້ນໃຈວ່າການເຈລະຈາລະຫວ່າງທັງສອງປະເທດຈະເກີດຂຶ້ນໄດ້ອີກຄັ້ງ, ທີ່ສວນທາງກັບທັດສະນະຂອງບັນດານັກວິເຄາະຫຼາຍຄົນ ທີ່ຕີລາຄາວ່າຍິ່ງເກົາຫຼີເໜືອຍິງຂີປະນາວຸດແບບນີ້ຢູ່ເລື້ອຍໆ ບໍ່ແມ່ນພຽງແຕ່ຈະສົ່ງສັນຍານຄວາມບໍ່ພໍໃຈເລື່ອງການຊ້ອມຮົບ ແຕ່ອາດສື່ເຖິງວ່າການເຈລະຈາກັບ ສ.ອາເມຣິກາ ຈະເກີດຂຶ້ນອີກຄັ້ງເປັນໄປໄດ້ຍາກ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube