ຜູ້ນຳເກົາຫຼີເໜືອ ຕິດຕາມການທົດລອງອາວຸດຮຸ້ນໃໝ່

ລາຍງານ 11​ ສິງຫາ 2019: ສຳນັກຂ່າວກາງເກົາຫຼີ (KCNA) ກະບອກສຽງຂອງລັດຖະບານເກົາຫຼີເໜືອ ລາຍງານວ່າ: ທ່ານ ຄິມ ຈອງ-ອຶນ ຜູ້ນຳສູງສຸດຂອງເກົາຫຼີເໜືອ ຢ້ຽມຢາມພາກຕາເວັນອອກຂອງປະເທດ ເມື່ອວັນເສົາ ທີ່ຜ່ານມາ ເພື່ອບັນຊາການ ແລະ ສັງເກດການຊ້ອມຍິງອາວຸດປະສິດທິພາບສູງຊະນິດໃໝ່ ໂດຍທີມນັກວິໄຈຂອງເກົາຫຼີເໜືອພັດທະນາອາວຸດຊະນິດັ່ງກ່າວຂຶ້ນມາເອງ ແລະ ການເຝິກຊ້ອມຄັ້ງນີ້ເກີດຂຶ້ນເພື່ອເປັນການກຽມຄວາມພ້ອມໃນອີກບາດກ້າວໜຶ່ງໃນການຮັບມືກັບສົງຄາມ ທີ່ມີໂອກາດຈະເກີດຂຶ້ນໄດ້ທຸກເມື່ອ.

ສຳລັບການທົດລອງອາວຸດຄັ້ງນີ້ ຖືເປັນການເຄື່ອນໄຫວທາງທະຫານ ຄັ້ງທີ 5 ຂອງລັດຖະບານເກົາຫຼີເໜືອ ນັບຕັ້ງແຕ່ວັນທີ 25 ກໍລະກົດ ທີ່ຜ່ານມາ ເຊິ່ງເກົາຫຼີເໜືອກ່າວວ່າ ໃນນັ້ນຈຳນວນ 2 ຄັ້ງເປັນການທົດລອງປະສິດທິພາບຂອງລະບົບຍິງຂີປນະາວຸດນຳວິຖີແບບຫຼາຍລຳກ້ອງຮຸ້ນໃໝ່ ແລະ ການດຳເນີນກິດຈະກຳທາງທະຫານທີ່ເກີດຂຶ້ນຢ່າງຕໍ່ເນື່ອງນັ້ນ ເປັນການສົ່ງສັນຍານໂດຍກົງເຖິງສະຫະລັດ ອາເມຣິກາ ແລະ ເກົາຫຼີໃຕ້ທີ່ເຝິກຊ້ອມຮົບຮ່ວມກັນຕະຫຼອດໄລຍະເດືອນນີ້.

ຂະນະດຽວກັນ, KCNA ຍັງເຜີຍແຜ່ຖະແຫຼງການຂອງກະຊວງການຕ່າງປະເທດເກົາຫຼີເໜືອ ວ່າຈະບໍ່ມີການພົບປະຫາລະຫວ່າງເຈົ້າໜ້າທີ່ຂອງລັດຖະບານເກົາຫຼີເໜືອ ກັບ ລັດຖະບານເກົາຫຼີໃຕ້ໃນທຸກລະດັບ ຈົກວ່າເກົາຫຼີໃຕ້ຈະຢຸດຕິພຶດຕິກຳທີ່ແຂງກະດ້າງ ແລະ ຄຸກຄາມຢ່າງຖາວອນ, ພ້ອມທັງວິຈານຂໍ້ຮຽກຮ້ອງຂອງລັດຖະບານເກົາຫຼີໃຕ້ ທີ່ຂໍໃຫ້ເກົາຫຼີເໜືອຢຸດຕິການຍິງຂີປະນາວຸດພິໄສໃກ້ວ່າ ບໍ່ມີເຫດບໍ່ມີຜົນ ແລະ ຂັດແຍ່ງກັບສິ່ງທີ່ເກົາຫຼີໃຕ້ກຳລັງປະຕິບັດຢູ່ ນັ້ນກໍ່ຄືຍັງຄົງຊ້ອມຮົບຮ່ວມກັບ ສ.ອາເມຣິກາທຸກປີ.