ພາຍຸໄຕ້ຝຸ່ນເລກິມາ ຂຶ້ນມົນທົນເຈີ້ຈຽງ ເສຍຊີວິດແລ້ວ 30 ຄົນ, ໄດ້ຮັບຜົນກະທົບ 5 ລ້ານຄົນ

ລາຍງານ 11​ ສິງຫາ 2019 ໂດຍອ້າງອີງຈາກລາຍງານຂອງສຳນັກຂ່າວຊິນຫົວຂອງທາງການຈີນໃຫ້ຮູ້ວ່າ: ມີຜູ້ເສຍຊີວິດເພີ່ມເປັນ 30 ຄົນແລ້ວ ແລະ ມີຜູ້ສູນຫາຍອີກ 18 ຄົນ ຈາກອິດທິພົນຂອງພາຍຸໄຕ້ຝຸ່ນເລກິມາ ທີ່ພັດເຂົ້າມົນທົນເຈີ້ຈຽງ ທາງພາກຕາເວັນອອກຂອງຈີນ ເມື່ອວັນເສົາ ທີ່ຜ່ານມາ ດ້ວຍຄວາມໄວລົມ 187 ກິໂລແມັດຕໍ່ຊົ່ວໂມງ.

ໂດຍຜູ້ເສຍຊີວິດສ່ວນໃຫຍ່ແມ່ນຢູ່ໃນເຂດຢົ້ງເຈຍ ເມືອງເວິນໂຈວ ເນື່ອງຈາກມີດິນພູເຈື່ອນທັບບ້ານເຮືອນປະຊາຊົນ, ພາຍຸຫົວດັ່ງກ່າວໄດ້ເຮັດໃຫ້ເຮືອນຫຼາຍກວ່າ 34,000 ຫຼັງໄດ້ຮັບຄວາມເສຍຫາຍ, ພື້ນທີ່ທຳການຜະລິດ 173,000 ເຮັກຕາໄດ້ຮັບຄວາມເສຍຫາຍ, ທາງການຈີນໄດ້ປະເມີນຄວາມເສຍຫາຍທາງເສດຖະກິດເບື້ອງຕົ້ນຕົກເປັນມູນຄ່າ 14.57 ຕື້ຢວນ ຫຼື ປະມານ 2.1 ຕື້ໂດລາສະຫະລັດ.

ນອກຈາກນີ້, ຍັງມີລາຍງານວ່າ ກ່ອນທີ່ພາຍຸຈະຂຶ້ນຝັ່ງ ທາງການຈີນໄດ້ອົບພະຍົບປະຊາຊົນເກືອບ 1.08 ລ້ານຄົນໄປຍັງສະຖານທີ່ທີ່ປອດໄພ ແລະ ປະຊາຊົນເກືອບ 5 ລ້ານຄົນໃນມົນທົນເຈີ້ຈຽງໄດ້ຮັບຜົນກະທົບຈາກພາຍຸຫົວນີ້.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube