ທ່ານ ປູຕິນ ຮ່ວມງານຂັບລົດບິກໄບ້ ຢູ່ແຫຼມໄຄເມຍ (ວິດີໂອ)

ລາຍງານ 12 ສິງຫາ 2019: ທຳນຽບປະທານປະເທດລັດເຊຍ ເຜີຍແຜ່ພາບຖ່າຍທ່ານ ວະລາດິເມຍ ປູຕິນ ປະທານປະເທດລັດເຊຍ ທີ່ເຂົ້າຮ່ວມງານ Shadow of Babylon bike Show ຄັ້ງທີ 11 ຢູ່ແຫຼມໄຄເມຍ ເມື່ອວັນທີເສົາ ທີ່ຜ່ານມາ, ງານດັ່ງກ່າວຈັດໂດຍກຸ່ມ ກຸ່ມ Night Wolves ກຸ່ມຄົນຂັບລົດບິກໄບ້ທີ່ສະໜັບສະໜູນລັດຖະບານລັດເຊຍ , ໂດຍທ່ານ ປູຕິນ ໄດ້ຮ່ວມຂັບລົດໄປຕາມເສັ້ນທາງໃນເມືອງເຊວາສໂຕໂພ ແລະ ຖ່າຍພາບຮ່ວມກັບສະມາຊິກຂອງກຸ່ມ Night Wolves ຢ່າງໃກ້ຊິດ ແລະ ສົນທະນາກັບສະມາຊິກທຸກຄົນຢ່າງເປັນກັນເອງ.

ເຖິງຢ່າງໃດກໍ່ຕາມ, ກະຊວງການຕ່າງປະເທດອູແກຣນອອກຖະແຫຼງການ ເມື່ອວັນທິດທີ່ຜ່ານມາ ວ່າໄດ້ດຳເນີນການຕາມຂະບວນການທາງການທູດໄປຍັງລັດຖະບານລັດເຊຍ ເພື່ອສະແດງຄວາມເປັນຫ່ວງຕໍ່ການທີ່ທ່ານ ປູຕິນ ເດີນທາງມາຍັງແຫຼມໄຄເມຍ ແລະ ໄດ້ລະບຸວ່າ ພຶດຕິກຳດັ່ງກ່າວຖືເປັນການລະເມີດອະທິປະໄຕ ແລະ ພື້ນແດນດິນອັນຄົບຖ້ວນຂອງອູແກຣນຢ່າງຮ້າຍແຮງ, ເຊິ່ງລັດເຊຍໄດ້ລວມເອົາດິນແຫຼມໄຄເມຍກັບເຂົ້າເປັນດິນແດນສ່ວນໜຶ່ງຂອງລັດເຊຍ ຕາມຜົນການລົງປະຊາມະຕິຂອງປະຊາຊົນໃນພື້ນທີ່ ເມື່ອເດືອນມີນາ 2014 ອັນໄດ້ສ້າງຄວາມບໍ່ພໍໃຈຢ່າງຍິ່ງໃຫຍ່ກັບທາງການອູແກຣນ ແລະ ກຸ່ມພັນທະມິດຕາເວັນຕົກ, ໂດຍ ສ.ອາເມຣິກາ ແລະ ສະຫະພາບເອີຣົບ ໄດ້ເດີນໜ້າອອກມາດຕະການຂວໍ້າບາດຕໍ່ລັດຖະບານລັດເຊຍ ຈາກກໍລະນີດັ່ງກ່າວຢ່າງຕໍ່ເນື່ອງ ແຕ່ລັດເຊຍເດີນໜ້າປະຕິຮູບລະບົບພື້ນຖານໂຄງລ່າງໃນໄຄເມຍ ທີ່ລວມເຖິງການສ້າງຂົວຂະໜາດໃຫຍ່ເຊື່ອມຕໍ່ລະຫວ່າງໄຄເມຍ ກັບແຜ່ນດິນໃຫຍ່ລັດເຊຍອີກດ້ວຍ.