ນັກບວດລັດເຊຍຖືກປະນາມ ເພາະໃຊ້ຄວາມຮຸນແຮງກັບເດັກເກີນເຫດ ໃນພິທີລ້າງບາບ (ວິດີໂອ)

ລາຍງານ 12 ສິງຫາ 2019 ໂດຍອ້າງອີງຈາກສຳນັກຂ່າວ RT ວ່າ: ນັກບວດຄຼິດອໍທໍດັອກຂອງລັດເຊຍ ໄດ້ສ້າງຄວາມບໍ່ພໍໃຈເປັນຢ່າງຍິ່ງໃນສື່ສັງຄົມອອນລາຍ ພາຍຫຼັງທີ່ມີການເຜີຍແຜ່ວິດີໂອ ສະແດງໃຫ້ເຫັນນັກບວດຄົນດັ່ງກ່າວໃຊ້ຄວາມຮຸນແຮງເກີນກວ່າເຫດໃນພິທີລ້າງບາບ.

ເຫດການດັ່ງກ່າວເກີດຂຶ້ນເມື່ອທ້າຍອາທິດທີ່ຜ່ານມາ ໃນຄຼິສຕະຈັກແຫ່ງໜຶ່ງ ຂອງເມືອງແກັດຊິນາ ຫ່າງຈາກນະຄອນເຊັນປີເຕີສະເບີກ ປະມານ 40 ກມ, ເຊິ່ງພິທີລ້າງບາບຕາມປະເພນີຂອງຊາວລັດເຊຍອໍທໍດັອກ ຈະຕ້ອງເອົາເດັກນ້ອຍລົງຈຸ່ມນ້ຳສັກສິດ 3 ຄັ້ງ ເພື່ອຮັບລ້າງບາບຕາມຄວາມເຊື່ອ.

ເດັກນ້ອຍຄົນດັ່ງກ່າວໄດ້ຮ້ອງໄຫ້ສຽງດັງ ແລະ ມີທ່າທີຂັດຂືນ, ນັກບວດຈຶ່ງພະຍາຍາມໃຊ້ຄວາມຮຸນແຮງກົດເດັກນ້ອຍລົງນ້ຳ, ຈາກເຫດການດັ່ງກ່າວໄດ້ສ້າງຄວາມບໍ່ພໍໃຈໃຫ້ຜູ້ປົກຄອງເດັກນ້ອຍ ແລະ ຜູ້ທີ່ໄດ້ເຫັນຈາກວິດີໂອ ຈົນເຖິງຂັ້ນມີການແຈ້ງຂໍ້ກ່າວຫາຕໍ່ເຈົ້າໜ້າທີ່ຕຳຫຼວດ, ໂດຍລາຍງານລະບຸວ່າ ນັກບວດຄົນດັ່ງກ່າວນັ້ນຖືກສິກແລ້ວ ເພາະສັງຄົມຮັບບໍ່ໄດ້.