ຈີນເຄື່ອນກອງກຳລັງເຈົ້າໜ້າທີ່ ໄປຈຸດເຊື່ອມຕໍ່ລະຫວ່າງຮົງກົງ ກັບ ແຜ່ນດິນໃຫຍ່ ຂົ່ມຂວັນຜູ້ປະທ້ວງ (ວິດີໂອ)

ລາຍງານ 12 ສິງຫາ 2019: ສື່ລັດຖະບານຈີນຫຼາຍສຳນັກ ໄດ້ເຜີຍແຜ່ວິດີໂອ ທີ່ສະແດງໃຫ້ເຫັນລົດຕັງ ປະມານ 24 ຄັນ ແລ່ນຜ່ານໃຈກາງເມືອງກວາງໂຈວ ໄປຍັງເມືອງເສິນເຈິ້ນ ມົນທົນກວາງຕຸ້ງ ທາງພາກຕາເວັນອອກສຽງໃຕ້ ຕິດເຂດແດນເຂດບໍລິຫານພິເສດຮົງກົງ ທີ່ກຳລັງເກີດເຫດຄວາມບໍ່ສະຫງົບ ຈາກການປະທ້ວງຂອງກຸ່ມຜູ້ຮຽກຮ້ອງປະຊາທິປະໄຕ ລວມເຖິງການບຸກຢຶດສະໜາມບິນສາກົນຮົງກົງໃນວັນຈັນນີ້ ສົ່ງຜົນກະທົບຕໍ່ການເດີນທາງເຂົ້າ-ອອກຂອງຖ້ຽວບິນລະຫວ່າງປະເທດ.

ພາຍໃນວິດີໂອສະແດງໃຫ້ເຫັນ ລົດບັນທຸກທະຫານຫຼາຍຄັນ ແລ່ນອອກຈາກຄ້າຍທະຫານໃນມົນທົນຝູຈ້ຽນ ໄປຍັງເມືອງເສິນເຈິ້ນເຊັ່ນກັນ ໂດຍຂໍ້ຄວາມປະກອບວິດີໂອ ຂອງໜັງສືພິມປະຊາຊົນລາຍວັນ ຂຽນວ່າ ກອງກຳລັງຕຳຫຼວດປະຊາຊົນຈີນ ມີໜ້າທີ່ຄວບຄຸມການກໍ່ຈະລາຈົນ, ຄວາມວຸ້ນວາຍ, ຄວາມຮຸນແຮງ, ກິດຈະກຳອາຊະຍາກຳ, ການໂຈມຕີກໍ່ການຮ້າຍ ແລະ ເຫດການອື່ນໆ ທີ່ເປັນໄພຕໍ່ຄວາມໝັ້ນຄົງຂອງສັງຄົມ, ສ່ວນ Global Time ຂຽນວ່າ ກອງກຳລັງຕຳຫຼວດປະຊາຊົນຈີນ ກຳລັງລວມຕົວກັນຢູ່ເມືອງເສິນເຈິ້ນ ຕິດເຂດແດນຮົງກົງກ່ອນປະຕິບັດການຊ້ອມຮົບຄັ້ງໃຫຍ່.

ໃນຕອນເຊົ້າຂອງວັນດຽວກັນ, ທ່ານ ຫຍາງ ກວງ ໂຄສົກສຳນັກງານວຽກງານຮົງກົງ ແລະ ມາເກົ້າຂອງສະພາແຫ່ງລັດ ທີ່ເປັນໜ່ວຍງານຂອງ ສປ.ຈີນ ທີ່ມີອຳນາດຄຸ້ມຄອງຮົງກົງ ແລະ ມາເກົ້າ ອອກຖະແຫຼງການປະນາມກຸ່ມຜູ້ປະທ້ວງໃນຮົງກົງ ວ່າກໍ່ຄວາມຮຸນແຮງຢ່າງຕໍ່ເນື່ອງ ແລະ ໃຊ້ອຸປະກອນອັນຕະລາຍໃນການທຳຮ້າຍເຈົ້າໜ້າທີ່ຕຳຫຼວດ ຖືເປັນການກໍ່ອາຊະຍາກຳຮ້າຍແຮງ ແລະ ສະແດງໃຫ້ເຫັນເຖິງສັນຍານເລີ່ມຕົ້ນຂອງການກໍ່ການຮ້າຍ, ກຸ່ມຜູ້ປະທ້ວງຢຽບຍ່ຳກົດໝາຍ ແລະ ລະບຽບຂອງສັງຄົມ.