ຜູ້ບໍລິຫານເກາະຮົງກົງ ປະກາດຈະບໍ່ເຈລະຈາກັບຜູ້ປະທ້ວງຫາກຍັງກໍ່ຄວາມຮຸນແຮງ

ລາຍງານ 13 ສິງຫາ 2019: ທ່ານ ນາງ ແຄຣີ ແລມ (Carrie Lam) ຫົວໜ້າຄະນະຜູ້ບໍລິຫານເກາະຮົງກົງ ຖະແຫຼງກ່ຽວກັບສະຖານະການຄວາມຮຸນແຮງທາງການເມືອງທີ່ແກ່ຍາວເຂົ້າສູ່ອາທິດທີ 10 ວ່າ: ການເຈລະຈາຈະເກີດຂຶ້ນໄດ້ ກໍ່ຕໍ່ເມື່ອກຸ່ມຜູ້ປະທ້ວງຢຸດຕິໃຊ້ຄວາມຮຸນແຮງເທົ່ານັ້ນ, ເຊິ່ງຮົງກົງໄດ້ເກີດຄວາມວຸ້ນວາຍຄັ້ງໃຫຍ່ ເມື່ອກຸ່ມຜູ້ປະທ້ວງຕໍ່ຕ້ານລັດຖະບານ ໄດ້ເຂົ້າໄປໂຮມຊຸມນຸມຂ້າມມື້ຂ້າມວັນ ທີ່ອາຄານຜູ້ໂດຍສານຂາເຂົ້າໝາຍເລກ 1 ຂອງສະໜາມບິນສາກົນຮົງກົງ ເມື່ອຕອບບ່າຍຂອງວັນຈັນ ທີ່ຜ່ານມາ ສົ່ງຜົນໃຫ້ສະໜາມບິນປະກາດປິດບໍລິການກະທັນຫັນ, ໃນຂະນະທີ່ຂະບວນລົດຕັງຂອງກອງກຳລັງຕຳຫຼວດຕິດອາວຸດປະຊາຊົນຈີນ ກໍ່ໄດ້ຈັ້ງທ່າຢູ່ເມືອງເສິນເຈິ້ນ ກົງກັນຂ້າມກັບຮົງກົງ ໄດ້ເພີ່ມຄວາມເຄັ່ງຕຶງຂຶ້ນຕື່ມ ວ່າອາດຈະມີການສະຫຼາຍການຊຸມນຸມປະທ້ວງ ກ່ອນທີ່ກຸ່ມຜູ້ປະທ້ວງຈະທະຍອຍອອກຈາກພື້ນທີ່ ແລະ ສະໜາມບິນກໍ່ສາມາດກັບມາໃຫ້ບໍລິການໄດ້ແລ້ວ.

ຂະນະດຽວກັນ, ທ່ານ ນາງ ແຄຣີ ແລມ ຍັງໄດ້ກ່າວປົກປ້ອງການປະຕິບັດໜ້າທີ່ຂອງຕຳຫຼວດ ທີ່ຝ່າຍຕໍ່ຕ້ານປະນາມວ່າຮຸນແຮງຂຶ້ນ ວ່າການຕັດສິນໃຈຂອງເຈົ້າໜ້າທີ່ເປັນໄປຕາມສະຖານະການທີ່ເກີດຂຶ້ນຈິງ ແລະ ຢືນຢັນວ່າເຈົ້າໜ້າທີ່ທຸກຄົນປະຕິບັດໜ້າທີ່ພາຍໃຕ້ແຮງກົດດັນສູງ ແຕ່ຕ້ອງໃຊ້ຄວາມອົດທົນສຸດຂີດ, ນອກຈາກນີ້ ທ່ານ ນາງ ຍັງກ່າວເຖິງສະຖານະການທາງເສດຖະກິດຂອງຮົງກົງຕອນນີ້ວ່າ ເສຍຫາຍຢ່າງໃຫຍ່ຫຼວງ ແລະ ຕ້ອງໃຊ້ເວລາຫຼາຍປີໃນການຟື້ນຟູ, ເຊິ່ງທ່ານ ນາງ ແຄຣີ ແລມ ໃຊ້ເວລາຖະແຫຼງບໍ່ດົນ ແລະ ປະຕິເສດຕອບຄຳຖາມເລື່ອງການຈັດຕັ້ງຄະນະປະຕິບັດງານອິດສະຫຼະ ເພື່ອສອບສວນການໃຊ້ຄວາມຮຸນແຮງຂອງຕຳຫຼວດ, ພາຍຫຼັງທີ່ມີຜູ້ປະທ້ວງແມ່ຍິງຄົນໜຶ່ງຕາໄດ້ຮັບບາດເຈັບສາຫັດ ແລະ ອາດສູນເສຍຕາ ຈາກການປະທະລະຫວ່າງການສະຫຼາຍການຊຸມນຸມຂອງເຈົ້າໜ້າທີ່ ເມື່ອວັນອາທິດ ທີ່ຜ່ານມາ, ລວມທັງໄດ້ຢືນຢັນວ່າຈະບໍ່ຕອບຄຳຖາມໃດໆກ່ຽວກັບການລາອອກ ແລະ ຍັງປະຕິເສດຕອບຄຳຖາມວ່າ ອຳນາດໃນການຍົກເລີກຮ່າງກົດໝາຍສົ່ງຜູ້ຮ້າຍຂ້າມແດນຂຶ້ນຢູ່ກັບຄະນະບໍລິຫານຮົງກົງ ຫຼື ສປ.ຈີນ? ເພາະກົດໝາຍດັ່ງກ່າວເປັນຕົ້ນເຫດຂອງການປະທ້ວງຄັ້ງໃຫຍ່ນີ້.

ໃນດ້ານບັນຍາກາດທີ່ສະໜາມບິນສາກົນຮົງກົງ ເລີ່ມກັບເຂົ້າສູ່ພາວະປົກກະຕິ ໂດຍຖ້ຽວບິນເລີ່ມເຂົ້າ-ອອກ ຕັ້ງແຕ່ເຊົ້າມືດຂອງວັນອັງຄານນີ້, ເຖິງຈະຊ້າກວ່າກຳນົດແດ່, ເຖິງຢ່າງໃດກໍ່ຕາມ ຄາເທ ແປຊິຟິກ ເຊິ່ງເປັນສາຍການບິນຫຼັກຂອງຮົງກົງ ປະກາດງົດໃຫ້ບໍລິການຖ້ຽວິນຫຼາຍກວ່າ 200 ຖ້ຽວຕະຫຼອດວັນອັງຄານນີ້ ໂດຍບໍ່ໃຫ້ເຫດຜົນຊັດເຈນ, ແຕ່ຄາເທ ປາຊີຟິກ ກຳລັງປະເຊີນກັບແຮງກົດດັນຢ່າງສູງຈາກລັດຖະບານຈີນ ເຊິ່ງທ່ານ ຣູເພິດ ຮັອກ ປະທານບໍລິຫານຂອງສາຍການບິນ ກ່າວເມື່ອວັນຈັນ ທີ່ຜ່ານມາ ເຕືອນພະລັງງານທຸກລະດັບ ເລື່ອງຜົນກະທົບທາງວິໄນ ທີ່ອາດເຖິງຂັ້ນຍົກເລີກສັນຍາຈ້າງ ຫຼື ການພົ້ນສະພາບຈາກຕຳແໜ່ງໜ້າທີ່ໃນບໍລິສັດ ຫາກເຂົ້າຮ່ວມ ຫຼື ສະໜັບສະໜູນການໂຮມຊຸມນຸມປະທ້ວງກັບຝ່າຍຕໍ່ຕ້ານລັດຖະບານ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube