ຈີນປະຕິເສດຂໍ້ຮຽກຮ້ອງທັງໝົດຂອງຜູ້ປະທ້ວງຮົງກົງ ແລະ ປະກາດພ້ອມເຂົ້າຄວບຄຸມສະຖານະການ

ລາຍງານ 13 ສິງຫາ 2019: ສະຖານີວິທະຍຸໂທລະພາບສູນກາງແຫ່ງປະເທດຈີນ (CCTV) ແລະ ສຳນັກຂ່າວຊິນຫົວຂອງທາງການຈີນ ໄດ້ສະເໜີລາຍງານທີ່ມີເນື້ອໃນໄປໃນທິດທາງດຽວກັນ ວ່າສະຖານະການໂຮມຊຸມນຸມປະທ້ວງໃນຮົງກົງ ເຊິ່ງແກ່ຍາວມາດົນກວ່າ 2 ເດືອນແລ້ວ ຖືເປັນໄພຄຸກຄາມທີ່ຮ້າຍແຮງທີ່ສຸດຕໍ່ປະເທດ ນັບຕັ້ງແຕ່ອັງກິດສົ່ງມອບເກາະແຫ່ງນີ້ກັບຄືນໃຫ້ແກ່ ສປ.ຈີນ ເມື່ອວັນທີ 1 ກໍລະກົດ 1997 ແລະ ກຸ່ມຜູ້ປະທ້ວງຫົວຮຸນແຮງກຳລັງທຳລາຍຮົງກົງ ດ້ວຍການຖ່ວງດຶງບ້ານເກີດເມືອງນອນຂອງຕົນເອງໃຫ້ຫຼົ້ມຈົມ ພ້ອມທັງລາຍງານຕື່ມວ່າ ຂໍ້ຮຽກຮ້ອງທັງໝົດຈະບໍ່ໄດ້ຮັບການປະນີປະນອມ ເນື່ອງຈາກຍິ່ງຈະເປັນການກະຕຸ້ນໃຫ້ເກີດຄວາມຮຸນແຮງ ແລະ ເປັນການທຳລາຍຜົນປະໂຫຍດຂອງຮົງກົງຫຼາຍຂຶ້ນເທົ່ານັ້ນ.

ເຊິ່ງຂໍ້ຮຽກຮ້ອງສຳຄັນຂອງຝ່າຍຕໍ່ຕ້ານລັດຖະບານຮົງກົງປະກອບມີ ການໃຫ້ຍົກເລີກຮ່າງກົດໝາຍສົ່ງຜູ້ຮ້າຍຂ້າມແດນຢ່າງຖາວອນ, ທ່ານ ນາງ ແຄຣີ ແລມ ຫົວໜ້າຄະນະຜູ້ບໍລິຫານຮົງກົງຕ້ອງລາອອກ, ການປະຕິຮູບຄະນະຜູ້ບໍລິຫານຮົງກົງ, ການປ່ອຍຕົວ ແລະ ຍົກເລີກດຳເນີນຄະດີກັບຜູ້ໂຮມຊຸມນຸມທັງໝົດທີ່ຖືກຈັບກຸມ ແລະ ການຖອນຄຳເວົ້າທີ່ໃຊ້ໃນການຮຽກກຸ່ມຜູ້ຊຸມນຸມວ່າຜູ້ກໍ່ການຈະລາຈົນ, ແຕ່ທ່ານ ຫຍາງ ກວງ ໂຄສົກສຳນັກງານວຽກງານຮົງກົງ ແລະ ມາເກົ້າຂອງສະພາແຫ່ງລັດ ເຊິ່ງເປັນໜ່ວຍງານຂອງ ສປ.ຈີນ ທີ່ມີອຳນາດຄຸ້ມຄອງທາງການເມືອງ, ເສດຖະກິດ ແລະ ສັງຄົມ ລະຫວ່າງລັດຖະບານຈີນ ກັບຮົງກົງ ແລະ ມາເກົ້າ ຖະແຫຼງວ່າພຶດຕິກຳຂອງກຸ່ມຜູ້ປະທ້ວງຕໍ່ຕ້ານລັດຖະບານຮົງກົງຖືເປັນອາຊະຍາກຳທີ່ຮ້າຍແຮງ ແລະ ເປັນສັນຍານເລີ່ມຕົ້ນຂອງການກໍ່ການຮ້າຍ.

ຂະນະດຽວກັນ, ສື່ຂອງທາງການຈີນ ແລະ ຂອງພັກຄອມມູນິດຈີນລາຍງານວ່າ ເມື່ອເຖິງເວລາກໍ່ຕ້ອງຕໍ່ສູ້ ແລະ ຄວບຄຸມກັບກຸ່ມກໍ່ການຮ້າຍ ຜູ້ຄວບຄຸມຈະໃຊ້ໄມ້ອ່ອນບໍ່ໄດ້ ສະຖານະການໃນຮົງກົງຕອນນີ້ບໍ່ພຽງແຕ່ຮຸນແຮງ ແຕ່ຍິ່ງວຸ້ນວາຍ ແລະ ແຕກແຍກ, ເຊິ່ງຈະສ້າງຄວາມມົວໝອງໃຫ້ກັບປະຫວັດສາດຂອງຈີນ, ຂັ້ນຕອນຕໍ່ໄປທີ່ຈະດຳເນີນການຄືການສ້າງຄວາມສະອາດ.

ໂດຍລາຍງານດັ່ງກ່າວໄດ້ຮັບການເຜີຍແຜ່ ພາຍຫຼັງທີ່ສື່ຂອງ ສປ.ຈີນ ທຸກສຳນັກເຜີຍແຜ່ພາບຂະບວນລົດຕັງ ແລະ ລົດຫຸ້ມເກາະຂອງກອງກຳລັງຕຳຫຼວດຕິດອາວຸດປະຊາຊົນຈີນ ເຄື່ອນພົນມາປັກຫຼັກຈັ້ງທ່າຢູ່ເມືອງເສິນເຈິ້ນ ກົງກັນຂ້າມກັບຮົງກົງ ເມື່ອວັນຈັນ ທີ່ຜ່ານມາ, ໂດຍກອງກຳລັງຕຳຫຼວດຕິດອາວຸດປະຊາຊົນຈີນ ເປັນກອງກຳລັງທີ່ຜ່ານການເຝິກຊ້ອມເພື່ອປາບປາມການຈະລາຈົນໂດຍກົງຫຼາຍກວ່າ ເມື່ອທຽບກັບກອງທັບປົດປ່ອຍປະຊາຊົນຈີນ.