ຈີນຊີ້ແຈງເຫດເຄື່ອນພົນໄປເສິນເຈິ້ນ, ຂະນະທີ່ UN ຮຽກຮ້ອງໃຫ້ຈີນອົດທົນອົດກັ້ນຕໍ່ກຸ່ມຜູ້ປະທ້ວງໃນຮົງກົງ

ລາຍງານ 13 ສິງຫາ 2019: ກອງກຳລັງຕຳຫຼວດຕິດອາວຸດປະຊາຊົນຈີນ ອອກຖະແຫຼງການວ່າ ການລວມພົນທີ່ສະໜາມກິລາໃນເມືອງເສິນເຈິ້ນ ເຊິ່ງປະກອບດ້ວຍເຈົ້າໜ້າຫຼາຍກວ່າ 10,000 ຄົນ ແລະ ຍານພາຫະນະຫຸ້ມເກາະ ພ້ອມອາວຸດຍຸດໂທປະກອນຈຳນວນຫຼາຍ ທີ່ລວມເຖິງເຮືອສະເທືອນນ້ຳສະເທືອນບົກ ເປັນພຽງການເຄື່ອນຍ້າຍກຳລັງພົນເພື່ອກຽມເຝິກຊ້ອມການສະແດງໃນວັນຊາດຈີນທີ 1 ຕຸລາ ໂດຍໃນປີນີ້ເປັນປີທີ່ສຳຄັນ ເນື່ອງຈາກເປັນການສະເຫຼີມສະຫຼອງຄົບຮອບ 70 ປີ ການສະຖາປະນາສາທາລະນະລັດ ປະຊາຊົນຈີນ ຈຶ່ງຮຽກຮ້ອງທຸກຝ່າຍຢ່າແຕກຕື່ນ.

ເຖິງຢ່າງໃດກໍ່ຕາມ, ການເຄື່ອນໄຫວດັ່ງກ່າວ ທີ່ເກີດຂຶ້ນເມື່ອວັນຈັນ ທີ່ຜ່ານມາ ເປັນມື້ດຽວກັນກັບທີ່ກຸ່ມຜູ້ປະທ້ວງຕໍ່ຕ້ານລັດຖະບານໄດ້ໂຮມຊຸມນຸມປະທ້ວງຢູ່ສະໜາມບິນສາກົນຮົງກົງ ກ່ອນຈະສະຫຼາຍຕົວໄປໃນຕອນເຊົ້າຂອງວັນອັງຄານນີ້ຕາມເວລາທ້ອງຖິ່ນ ແລ້ວກັບມາລວມຕົວກັນອີກຄັ້ງເມື່ອຕອນບ່າຍຂອງວັນດຽວກັນ ອັນໄດ້ສົ່ງຜົນໃຫ້ສະໜາມບິນປະກາດປິດໃຫ້ບໍລິການເປັນວັນທີ 2 ຕິດຕໍ່ກັນ, ໂດຍບັນຍາກາດຂອງການໂຮມຊຸມນຸມແຕກຕ່າງຈາກການປັກຫຼັກໂຮມຊຸມນຸມເມື່ອ 3 ວັນທີ່ຜ່ານມາ ເນື່ອງຈາກຸ່ມຜູ້ປະທ້ວງສ່ວນໃຫຍ່ບໍ່ພໍໃຈເປັນຢ່າງຍິ່ງ ຕໍ່ຂ່າວຜູ້ປະທ້ວງແມ່ຍິງຄົນໜຶ່ງ ຕາໄດ້ຮັບບາດເຈັບສາຫັດເບື້ອງໜຶ່ງ ຈົນອາດຕ້ອງສູນເສຍຕາ ທີ່ເກີດຈາກພາລະກິດການສະຫຼາຍການຊຸມນຸມຂອງເຈົ້າໜ້າທີ່ ເມື່ອວັນອາທິດທີ່ຜ່ານມາ.

ໃນດ້ານຂອງສະຫະປະຊາຊາດ (UN) ອອກຖະແຫຼງການຂໍ້ໃຫ້ຈີນອົດທົດອົດກັ້ນຕໍ່ສະຖານະການໃນຮົງກົງ, ຂະນະທີ່ທ່ານ ອະເລັກຊອງເດຼ ເຄຣາ ທີ່ປຶກສາດ້ານນະໂຍບາຍຕ່າງປະເທດຂອງຄະນະກຳມະການເອີຣົບ ກ່າວວ່າການເຄື່ອນໄຫວທີ່ເກີດຂຶ້ນຂອງກອງກຳລັງຕຳຫຼວດຕິດອາວຸດປະຊາຊົນຈີນໃນຄັ້ງນີ້ ເປັນສັນຍານວ່າຄວາມຮຸນແຮງກຳລັງຈະເກີດຂຶ້ນ ເນື່ອງຈາກອາທິດທີ່ຜ່ານມາ ກອງກຳລັງທີ່ມີຄວາມຊຳນານສູງໃນການປາບປາມການກໍ່ການຮ້າຍ ແລະ ການສະຫຼາຍການຈະລາຈົນ ຕະຫຼອດຮອດສະຖານການອື່ນໆ ທີ່ສ້າງຄວາມບໍ່ສະຫງົບພາຍໃນປະເທດ ທີ່ຢູ່ພາຍໃຕ້ອະທິປະໄຕຂອງ ສປ.ຈີນ ເຝິກຊ້ອມການສະຫຼາຍການປະທ້ວງ ທີ່ສະຖານະການສົມມຸດຄືກັນກັບໃນຮົງກົງຫຼາຍ.

ເຊິ່ງນັກວິເຄາະຕີລາຄາວ່າ ຍັງຂ້ອນຂ້າງຍາກທີ່ຈະປະເມີນທ່າທີຂອງລັດຖະບານຈີນ ວ່າຈະໃຊ້ມາດຕະການຂັ້ນເດັດຂາດຫຼືບໍ່ ໂດຍອາດເປັນພຽງສົງຄາມຈິດຕະສາດກໍ່ໄດ້ ແລະ ຕອນນີ້ຈີນກຳລັງປະເຊີນກັບສົງຄາມການຄ້າທີ່ຄູ່ກໍລະນີຄືສະຫະລັດ ອາເມຣິກາ ເຊິ່ງ ສປ.ຈີນ ໄດ້ເຕືອນສະເໝີວ່າຢ່າແຊກແຊງວຽກງານພາຍໃນຂອງຮົງກົງ, ແຕ່ທັງສຳນັກຂ່າວຊິນຫົວ ແລະ ສະຖານນີໂທລະພາບສູນກາງແຫ່ງປະເທດຈີນລາຍງານວ່າ ເມື່ອເຖິງຍາມຕ້ອງຕໍ່ສູ້ ແລະ ຄວບຄຸມການກໍ່ການຮ້າຍ ຜູ້ເຮັດໜ້າທີ່ຄວບຄຸມສະຖານະການຈະໃຊ້ໄມ້ອ່ອນບໍ່ໄດ້ ສະຖານະການໃນຮົງກົງຕອນນີ້ບໍ່ພຽງແຕ່ຮຸນແຮງ ແຕ່ຍິ່ງວຸ້ນວາຍ ແລະ ແຕກແຍກ, ເຊິ່ງຈະສ້າງຄວາມມົວໝອງໃຫ້ກັບປະຫວັດສາດຈີນ ຂັ້ນຕອນຕໍ່ໄປທີ່ຈະຕ້ອງດຳເນີນການຄືການທຳຄວາມສະອາດ.