ດາວທຽມສອດແນມ ສ.ອາເມຣິກາ ເຜີຍແຜ່ພາບລົດຕັງຈີນ ໃນເສິນເຈິ້ນ ໃກ້ກັບຮົງກົງ

ລາຍງານ 15 ສິງຫາ 2019, ດາວທຽມສອດແນມ “MAXAR Worldview” ຂອງບໍລິສັດ ມາຊາ ເຕັກໂນໂລຊີ ຈາກສະຫະລັດ ອາເມຣິກາ ເຜີຍແຜ່ພາບຖ່າຍດາວທຽມ ທີ່ສະແດງໃຫ້ເຫັນລົດຕັງ ແລະ ຍາຍພາຫະນະຫຸ້ມເກາະຂອງກອງກຳລັງຕຳຫຼວດຕິດອາວຸດປະຊາຊົນຈີນ ບໍ່ຕ່ຳກວ່າ 500 ຄັນ ຈອດລວມກັນຢູ່ທີ່ສະໜາມກີລາໃຈກາງເມືອງເສິນເຈິ້ນ ທີ່ຫ່າງຈາກຊາຍແດນເກາະຮົງກົງພຽງ 25 ກິໂລແມັດ, ຂະນະທີ່ກະຊວງການຕ່າງປະເທດ ສ.ອາເມຣິກາ ອອກຖະແຫຼງການສະແດງຄວາມເປັນຫ່ວງຕໍ່ພາບດັ່ງກ່າວ ວ່າເປັນສັນຍາເຕືອນວ່າອິດສະຫຼະພາບຂອງຮົງກົງ ກຳລັງຈະຖືກຮິບຮອນ ແລະ ເຕືອນວ່າຫາກສະຖານະການໃນຮົງກົງຍັງຕົກຕ່ຳໄປເລື້ອຍໆ ເຂດບໍລິຫານພິເສດຮົງກົງອາດສູນເສຍສະຖານະພິເສດທາງການຄ້າ ແລະ ວຽກງານລະຫວ່າງປະເທດກັບລັດຖະບານ ສ.ອາເມຣິກາ ຕາມກົດໝາຍສະບັບປີ 1992.

ເຖິງຢ່າງໃດກໍ່ຕາມ, ກອງກຳລັງຕຳຫຼວດຕິດອາວຸດປະຊາຊົນຈີນ ໄດ້ອອກຖະແຫຼງການເມື່ອຕົ້ນອາທິດນີ້ ວ່າການເຄື່ອນພົນທີ່ເກີດຂຶ້ນເປັນພຽງການເຄື່ອນຍ້າຍກຳລັງພົນ ເພື່ອກຽມເຝິກຊ້ອມການສະແດງ ແລະ ເຝິກຊ້ອມການຮັກສາຄວາມປອດໄພໃນງານສະເຫຼີມສະຫຼອງວັນຊາດຈີນ 1 ຕຸລາ ທີ່ປີນີ້ມີຄວາມໝາຍຄວາມສຳຄັນພິເສດ ເນື່ອງຈາກຄົບຮອບ 70 ປີຂອງການສະຖາປະນາສາທາລະນະລັດ ປະຊາຊົນຈີນ ຈຶ່ງຂໍໃຫ້ທຸກຝ່າຍຢ່າແຕກຕື່ນ.

ໃນດ້ານຂອງທ່ານ ໂດໂນ ທຣຳ ປະທານປະເທດ ສ.ອາເມຣິກາ ໄດ້ລົງຂໍ້ຄວາມໃນ Twitter ວ່າໂດຍສ່ວນຕົວຕົນເຊື່ອໝັ້ນວ່າທ່ານ ສີ ຈິ້ນຜິງ ປະທານປະເທດຈີນ ແລະ ຄະນະຕ້ອງບັນລຸຂໍ້ຕົກລົງທາງການຄ້າກັບ ສ.ອາເມຣິກາ, ແຕ່ກ່ອນອື່ນຜູ້ນຳຈີນຄວນແກ້ໄຂສະຖານະການໃນຮົງກົງ ໃຫ້ຢຸດຕິໂດຍໄວບົນຫຼັກການພື້ນຖານດ້ານມະນຸດສະທຳ ເຊິ່ງຕົນເຊື່ອວ່າລັດຖະບານຈີນສາມາດເຮັດໄດ້ ແລ້ວຫຼັງຈາກນັ້ນອາດມີການພົບປະຫາລືລະດັບຜູ້ນຳເກີດຂຶ້ນກໍ່ໄດ້.

ເຖິງຢ່າງໃດກໍ່ຕາມ, ສານສູງສຸດຂອງຮົງກົງມີຄຳສັ່ງໃຫ້ສະໜາມບິນສາກົນຮົງກົງ ເປັນພື້ນທີ່ຄຸ້ມຄອງຊົ່ວຄາວ ແລະ ກຸ່ມຜູ້ປະທ້ວງຕໍ່ຕ້ານລັດຖະບານຕ້ອງຊຸມນຸມກັນສະເພາະໃນເຂດທີ່ສະໜາມບິນກຳນົດໃຫ້ເທົ່ານັ້ນໂດຍມີລາຍງານການປະທະກັນອີກຄັ້ງລະຫວ່າງກຸ່ມຜູ້ປະທ້ວງກັບເຈົ້າໜ້າທີ່ຕຳຫຼວດ ຕາມທ້ອງຖະໜົນ ເຂດຊາມໂຊຍໂປ ເຊິ່ງເປັນເຂດທີ່ພັກອາໄສໃນຝັ່ງເກົາລູນ ເມື່ອວັນພຸດທີ່ຜ່ານມາ.