ອິນເດຍ-ປາກິດສະຖານເປີດສາກປະທະກັນຢູ່ແຄສເມຍ ທະຫານເສຍຊີວິດແລ້ວ 8 ຄົນ

ລາຍງານ 16 ສິງຫາ 2019: ພົນຕີ ອາຊິບ ກາຟູ ໂຄສົກກອງທັບປາກິດສະຖານ ໄດ້ລົງຂໍ້ຄວາມຜ່ານ twitter ເມື່ອວັນພະຫັດ ທີ່ຜ່ານມາວ່າ ກອງທັບອິນເດຍໄດ້ຍົກລະດັບການຍິງອາວຸດຕາມເສັ້ນຄວບຄຸມ (Line of Control) ທີ່ເປັນເສັ້ນແບ່ງເຂດແດນແຄສເມຍຂອງເປັນສອງຝັ່ງຄື ຝັ່ງປາກິດສະຖານ ແລະ ຝັ່ງອິນເດຍ ເຮັດໃຫ້ມີຜູ້ເສຍຊີວິດທັງສອງຝ່າຍ.

ພົນຕີ ອາຊິບ ກາຟູ ກ່າວວ່າ ທະຫານປາກິດສະຖານເສຍຊີວິດ 3 ຄົນ, ຂະນະດຽວກັນກອງທັບປາກິດສະຖານກໍ່ໄດ້ຕອບໂຕ້ ແລະ ເຮັດໃຫ້ທະຫານອິນເດຍເສຍຊີວິດ 5 ຄົນ, ພ້ອມທັງລະບຸອີກວ່າ ລັດຖະບານອິນເດຍອອກມາປະຕິເສດວ່າບັນຫາດັ່ງກ່າວນີ້ບໍ່ເປັນຄວາມຈິງ.

ການເຄື່ອນໄຫວຫຼ້າສຸດທີ່ເກີດຂຶ້ນຫຼັງຈາກທີ່ທ່ານ ນະເຣນທຣາ ໂມດີ ນາຍົກລັດຖະມົນຕີຂອງອິນເດຍ ໄດ້ອອກຖະແຫຼງການທົ່ວປະເທດເມື່ອວັນພະຫັດ ທີ່ຜ່ານມາ ວ່າການຍົກເລີກສະຖານະການປົກຄອງຕົນເອງຂອງແຄສເມຍ ເປັນສິ່ງທີ່ຈຳເປັນເພື່ອປົກປ້ອງປະຊາຊົນກຸ່ມນ້ອຍຈາກຄວາມບໍ່ຍຸຕິທຳ, ພ້ອມຍັງໃຫ້ຄຳໝັ້ນສັນຍາວ່າຈະເຮັດໃຫ້ແຄສເມຍກັບສູ່ຄວາມຈະເລີນຮຸ່ງເຮືອງເໝືອນດັ່ງໃນອະດີດ.