ອິດສະຣາແອນ ຫ້າມຜູ້ແທນປະຊາຊົນ ສ.ອາເມຣິກາ ທີ່ເຫັນຕ່າງກັບ ປ.ທຣຳ ເຂົ້າປະເທດ

ລາຍງານ 16 ສິງຫາ 2019: ທ່ານ ເບນຈາມິນ ເນທັນຢາຮູ ນາຍົກລັດຖະມົນຕີອິດສະຣາແອນ ກ່າວເມື່ອວັນພະຫັດ ທີ່ຜ່ານມາ ວ່າຄະນະລັດຖະມົນຕີອິດສະຣາແອນມີມະຕິເຫັນດີຮ່ວມກັນຫ້າມບໍ່ໃຫ້ທ່ານ ນາງ ອິວຮານ ໂອມານ (Ilhan Omar) ແລະ ທ່ານ ນາງ ຣາຊິດາ ທລາອິບ (Rashida Tlaib) ເຂົ້າປະເທດ ເຊິ່ງທັງສອງເປັນສະມາຊິກສະພາປະຊາຊົນ ສ.ອາເມຣິກາ ທີ່ຈະເດີນທາງໄປອິດສະຫຼະແອນໃນອາທິດໜ້າ ໂດຍທັງສອງຄົນມີແຜນເດີນທາງໄປຍັງເຂດເວດແບັງ ແລະ ຝັ່ງຕາເວັນອອກຂອງນະຄອນເຢຣູຊາເລມອີກດ້ວຍ.

ເຊິ່ງທ່ານ ນາງ ອິວຮານ ໂອມານ ສະມາຊິກສະພາ ເຂດ 5 ລັດມິນນິໂຊຕາ ອາຍຸ 37 ປີ ເຊື້ອສາຍໂຊມາລີ ແລະ ທ່ານ ນາງ ຣາຊິດາ ທລາອິບ ສະມາຊິກສະພາ ເຂດ 13 ລັດມິຊິແກນ ອາຍຸ 42 ປີ ເຊື້ອສາຍປາແລັດສະຕິນ ໄດ້ຮັບອະນຸຍາດຈາກລັດຖະບານອິດສະຣາແອນໃຫ້ເດີນທາງໄປຍັງພື້ນທີ່ທັງສອງແຫ່ງ, ເຖິງຢ່າງໃດກໍ່ຕາມ ການປ່ຽນແປງທ່າທີຢ່າງກະທັນຫັນຂອງລັດຖະບານອິດສະຣາແອນ ເກີດຂຶ້ນພາຍໃນເວລາບໍ່ພໍເທົ່າໃດຊົ່ວໂມງ ພາຍຫຼັງທີ່ທ່ານ ໂດໂນ ທຣຳ ປະທານປະເທດ ສ.ອາເມຣິກາ ກ່າວວ່າຫາກອິດສະຫຼະແອນອະນຸຍາດໃຫ້ທັງສອງເດີນທາງໄປຍັງເຂດເວດແບັງ ແລະ ຝັ່ງຕາເວັນອອກຂອງນະຄອນເຢຣູຊາເລມ ໝາຍຄວາມວ່າລັດຖະບານອິດສະຣາແອນກຳລັງສະແດງຄວາມອ່ອນແອ.

ຂະນະດຽວກັນ,​ ຜູ້ນຳອິດສະຫຼະແອນກ່າວວ່າ ປະເທດແຫ່ງນີ້ມີເສລີພາບໃນການວິພາກວິຈານ ແຕ່ຕ້ອງບໍ່ແມ່ນບຸກຄົນທີ່ສະໜັບສະໜູນການສ້າງຄວາມແຕກແຍກ ພາຍຫຼັງທີ່ມີລາຍງານວ່າ ທ່ານ ນາງ ອິວຮານ ໂອມານ ແລະ ທ່ານ ນາງ ຣາຊິດາ ທລາອິບມີຈຸດຢືນຕໍ່ຕ້ານນະໂຍບາຍຫຼາຍດ້ານຂອງລັດຖະບານອິດສະຣາແອນຊຸດປັດຈຸບັນ ແລະ ຍັງສະໜັບສະໜູນອົງການຕໍ່ຕ້ານອິດສະຣາແອນທີ່ມີຊື່ວ່າ: Boycott, Divestment and Sanctions (BDS) ໂດຍສະມາຊິກລະດັບແກນນຳຂອງ BDS ແນ່ນອນວ່າເປັນຄົນປາແລັດສະຕິນ.

ໃນດ້ານຂອງທ່ານ ນາງ ອິວຮານ ໂອມານ ແລະ ທ່ານ ນາງ ຣາຊິດາ ທລາອິບ ກ່າວເຖິງບັນຫາທີ່ເກີດຂຶ້ນວ່າ ເປັນການຕັດສິນໃຈທີ່ບໍ່ພິຈາລະນາຢ່າງຖີ່ຖ້ວນ ແລະ ຖືເປັກນານດູໝິ່ນຄ່ານິຍົມປະຊາທິປະໄຕ.

ໂດຍທີ່ຜ່ານມາ, ທ່ານ ນາງ ອິວຮານ ໂອມານ ແລະ ສະມາຊິກສະພາຜູ້ແທນປະຊາຊົນເພດດຍິງ ພັກເດໂມແຄຼດອີກ 2 ຄົນຄື ທ່ານ ນາງ ອະເລັກຊານເດຼຍ ໂອຄາຊິໂອ-ຄໍເຕສ ສະມາຊິກສະພາ ເຂດ 14 ລັດນິວຢອກ ອາຍຸ 29 ປີ ເຊິ່ງເປັນສະມາຊິກສະພາສູງທີ່ມີອາຍຸນ້ອຍທີ່ສຸດຂອງ ສ.ອາເມຣິກາ ແລະ ມີເຊື້ອສາຍເປີໂຕຣິໂກ ແລະ ທ່ານ ນາງ ອາຢານນາ ເພຼສລີ ສະມາຊິກສະພາ ເຂດ 7 ລັດແມສຊາຊູເຊດ ອາຍຸ 45 ປີ ເຊື້ອຊາຍອາເມຣິກາ-ອາຟຣິກາ ຫຼື ຊາວຜິວສີ ເຄີຍກ່າວວິຈານທ່ານ ໂດໂນ ທຣຳ ຢ່າງໜັກເມື່ອເດືອນທີ່ຜ່ານມາຕໍ່ກັບນະໂຍບາຍຜູ້ອົນພະຍົບ, ສ່ວນໃນດ້ານຂອງຜູ້ນຳ ສ.ອາເມຣິກາ ກໍ່ໄດ້ກ່າວແບບບໍ່ເຈາະຈົງວ່າ ສ.ອາເມຣິກາເປັນປະເທດທີ່ເສລີ, ສວຍງາມ ແລະ ປະສົບຄວາມສຳເລັດທີ່ສຸດ ຫາກບຸກຄົນໃດກໍ່ຕາມກຽດຊັງປະເທດນີ້ ຫຼື ບໍ່ມີຄວາມສຸກທີ່ຈະອາໄສຢູ່ໃນປະເທດນີ້ ກໍ່ສາມາດອອກໄປໄດ້.