ຜູ້ນຳອິນໂດເນເຊຍ ຮຽກຮ້ອງໃຫ້ສະພາສະໜັບສະໜູນແຜນການຍ້າຍນະຄອນຫຼວງຈາກຈາກາຕາ ໄປບໍນຽວ

ລາຍງານ 16 ສິງຫາ 2019: ທ່ານ ໂຈໂກ ວິໂດໂດ ປະທານປະເທດອິນໂດເນເຊຍ ກ່າວຖະແຫຼງຕໍ່ກອງປະຊຸມສະພາໃນວັນສຸກນີ້ ຫຼື 1 ວັນ ກ່ອນຈະເຖິງວັນຊາດ 17 ສິງຫານີ້ ມີເນື້ອໃນສຳຄັນໃນຕອນໜຶ່ງຮຽກຮ້ອງໃຫ້ສະພາສະໜັບສະໜູນແຜນຍຸດທະສາດຂອງລັດຖະບານ ໃນການຍ້າຍນະຄອນຫຼວງຈາກນະຄອນຫຼວງຈາກາຕາ ທີ່ຕັ້ງຢູ່ເກາະຊວາ ເຊິ່ງທ່ານ ໂຈໂກ ວິໂດໂດ ກ່າວວ່າແອອັດຫຼາຍ ດ້ວຍຈຳນວນປະຊາກອນຫຼາຍກວ່າ 10 ລ້ານຄົນ, ໃນເນື້ອທີ່ພຽງ 6,391 ຕາລາງກິໂລແມັດ ແລະ ກຳລັງປະເຊີນກັບພາວະແຜ່ນດິນຍຸບຕົວ ແລະ ອາດຈົມລົງທະເລໃນອີກບໍ່ພໍເທົ່າໃດສິບປີຂ້າງໜ້ານີ້, ຫາກຄິດໄລ່ສະເພາະເຂດໃຈກາງເມືອງ ທີ່ເປັນສະຖານທີ່ຕັ້ງຂອງສຳນັກງານລັດຖະການ ແລະ ພື້ນທີ່ໂດຍຮອບໃນລັດສະໝີບໍ່ໄກ ມີພື້ນທີ່ພຽງ 661.5 ຕາລາງກິໂລແມັດເທົ່ານັ້ນ ປັດຈຸບັນອິນໂດເນເຊຍມີປະຊາກອນຫຼາຍກວ່າ 266 ລ້ານຄົນ ແລະ ສ່ວນໃຫຍ່ອາໄສຢູ່ເກາະຊວາ.

ເຊິ່ງທ່ານ ໂຈໂກ ວິໂດໂດ ສະເໜີສະຖານທີ່ຕັ້ງຂອງນະຄອນຫຼວງແຫ່ງໃໝ່ຢູ່ພູມມິພາກກາລິມັນຕັນ ເກາະບໍນຽວ ໃນສ່ວນທີ່ຢູ່ພາຍໃຕ້ອະທິປະໄຕຂອງອິນໂດເນເຊຍ ແລະ ຕັ້ງຢູ່ທາງຕາເວັນອອກຂອງປະເທດ ໂດຍເປັນເກາະທີ່ລັດຖະບານຍັງແບ່ງພື້ນທີ່ເທິງເກາະບໍນຽວ ທີ່ເປັນເກາະຂະໜາດໃຫຍ່ອັນດັບ 3 ຂອງໂລກ ຮອງຈາກກຣີນແລນ ແລະ ນິວກິນີ ຮ່ວມກັບອີກ 2 ປະເທດຄືບຣູໄນ ແລະ ມາເລເຊຍ. ເຖິງແມ່ນວ່າທ່ານ ໂຈໂກ ວິໂດໂດ ຍັງບໍ່ໄດ້ກ່າວຢ່າງຊັດເຈນ ວ່າຫາກແນວຄິດຂອງຕົນທີ່ປະກາດເປັນຄັ້ງທຳອິດເມື່ອທ້າຍເດືອນເມສາ ທີ່ຜ່ານມາ ໄດ້ຮັບຄວາມເຫັນດີຈາກສະພາແລ້ວ ນະຄອນຫຼວງແຫ່ງໃໝ່ຈະຕັ້ງຢູ່ສ່ວນໃດຂອງພູມມິພາກກາລິມັນຕັນ ແຕ່ຜູ້ນຳອິນໂດເນເຊຍກ່າວວ່າ ສຳລັບຕົນແລ້ວນະຄອນຫຼວງ ບໍ່ໄດ້ເປັນພຽງພື້ນທີ່ໆບົ່ງບອກເອກະລັກຂອງຄວາມເປັນຊາດ ແຕ່ຍັງສະແດງເຖິງຄວາມກ້າວໜ້າ ແລະ ຄວາມຈະເລີນຂອງຄົນພາຍໃນຊາດນັ້ນດ້ວຍ.