ທ່ານນາຍົກ ເຄື່ອນໄຫວວຽກງານທີ່ແຂວງສະຫວັນນະເຂດ, ພົບປະປະຊາຊົນ ແລະ ພະນັກງານຫຼັກແຫຼ່ງ

ໃນວັນທີ 14 ສິງຫາ 2019 ທີ່ຜ່ານມາ, ທ່ານ ທອງລຸນ ສີສຸລິດ ນາຍົກລັດຖະມົນຕີ ພອ້ມດວ້ຍທ່ານລັດຖະມົນຕີ ແລະ ຮອງລັດຖະມົນຕີ ກະຊວງກ່ຽວຂ້ອງ ໄດ້ໄປເຄື່ອນໄຫວຢ້ຽມຢາມ ແລະ ຊຸກຍູ້ການຜະລິດ ຢູ່ແຂວງສະຫວັນນະເຂດ ໂດຍມີທ່ານ ສັນຕິພາບ ພົມວິຫານ ເຈົ້າແຂວງໆສະຫວັນນະເຂດພ້ອມດ້ວຍຄະນະໃຫ້ການຕ້ອນຮັບ.

ໃນໂອກາດດັ່ງກ່າວ, ທ່ານນາຍົກລັດຖະມົນຕີ ພ້ອມດ້ວຍຄະນະ ໄດ້ໄປຢ້ຽມຢາມບ້ານຄຳປ່າແໜ ເມືອງຈຳພອນ ເຊິ່ງເປັນບ້ານພັດທະນາຊົນນະບົດ ແລະ ລົບລ້າງຄວາມທຸກຍາກ ເປັນໂຄງການແບບມີສ່ວນຮ່ວມຈັດຕັ້ງປະຕິບັດໂດຍທ່ານ ເກຍ ອຸ່ສິດທິເດດ ເຈົ້າຂອງໂຮງງານນ້ຳດື່ມ-ນ້ຳກ້ອນ ໂລມາຄຳນັບແຕ່ປີ 2015 ຫາປີ 2018 ມີມູນຄ່າທັງໝົດ 22 ຕື້ກວ່າກີບ. ໃນນັ້ນ, ທຶນຂອງໂຮງງານນ້ຳດື່ມ-ນ້ຳກ້ອນ ໂລມາຄຳ 67%, ງົບປະມານຂອງລັດ 9%, ທຶນຊ່ວຍເຫຼືອຈາກສາກົນ 13% ແລະ ທຶນຈາກບັນດາບໍລິສັດ ແລະ ພາກສ່ວນຕ່າງໆ 11%. ຜ່ານການຈັດຕັ້ງປະຕິບັດໂຄງການ ຢູ່ບ້ານຄຳປ່າແໜ ແລະ ບ້ານປ່າກ້ວຍ ເຫັນວ່າປະຊາຊົນຈຳນວນ 77 ຄອບຄົວເປົ້າໝາຍສາມາດ ບັນລຸການລົບລ້າງຄວາມທຸກຍາກ ໄດ້ຈຳນວນໜຶ່ງ, ປັດຈຸບັນໂຄງການນີ້ ໄດ້ມອບໂອນໃຫ້ແກ່ອົງການປົກຄອງບ້ານສືບຕໍ່ ໃນເດືອນເມສາ 2019.

ໂອກາດນີ້, ທ່ານ ນາຍົກລັດຖະມົນຕີ ໄດ້ສະແດງຄວາມດີໃຈທີ່ໄດ້ມາຢ້ຽມຢາມບ້ານຄຳປ່າແໜ, ພ້ອມທັງຊົມເຊີຍ ທ່ານ ເກຍ ອູ່ສິດທິເດດ ທີ່ເປັນນັກພັດທະນາດີເດັ່ນ ແລະ ຊົມເຊີຍປະຊາຊົນທີ່ຕັດສິນໃຈໃຫ້ການຮ່ວມມືເປັນຢ່າງດີເພື່ອເຂົ້າຮ່ວມໂຄງການ ເຊິ່ງເປັນການປະຕິບັດຕາມນະໂຍບາຍຂອງລັດຖະ ບານໃນການລົບລ້າງຄວາມທຸກຍາກ, ທັງນີ້ ເຫັນວ່າບ້ານຄຳປ່າແໜມີຊື່ສຽງໃນທາງບວກຫຼາຍຂຶ້ນ, ເປັນບ້ານທີ່ເປັນຕົວແບບໃນການຫັນການດຳລົງຊີວິດ, ຫັນປ່ຽນວິທີການທຳມາຫາກິນ ແລະ ວິຖີຊີວິດເລື່ອນລອຍແບບເກົ່າມາສູ່ແບບໃໝ່ເຮັດການຜະລິດຄົງທີ່ ແລະ ໝັ້ນຄົງ ເຮັດການພັດທະນາບ້ານມີການຂະຫຍາຍຕົວຢ່າງແທ້ຈິງ.

ທ່ານ ນາຍົກລັດຖະມົນຕີ ຍັງໄດ້ຊີ້ນຳໃຫ້ທຸກພາກສ່ວນສືບຕໍ່ພື້ນຖານທີ່ດີນີ້ ເພື່ອພັດທະນາທັງສອງບ້ານ, ເດັດຂາດບໍ່ໃຫ້ຖອຍຫລັງໄປສູ່ສະພາບເດີມ, ຮຽກຮ້ອງໃຫ້ປະຊາຊົນປັບປ່ຽນວິທີທຳມາຫາກິນໃຫ້ກ້າວໜ້າ, ຫ່າງໄກຢາເສບຕິດ, ເຄົາລົບການຈັດຕັ້ງ, ໃຫ້ການຮ່ວມມື ແລະ ເຊື່ອໝັ້ນການຈັດຕັ້ງ ຕໍ່ອົງການປົກຄອງທ້ອງຖິ່ນຂອງຕົນ ທີ່ຈະມາຊ່ວຍແນະນຳ ແລະ ນຳພາວິທີການທຳມາຫາກິນແບບໃໝ່ ທີ່ເໝາະສົມໃຫ້ແກ່ປະຊາຊົນ.

ຈາກນັ້ນ, ທ່ານນາຍົກລັດຖະມົນຕີ ແລະ ຄະນະໄດ້ເດີນທາງໄປຢ້ຽມຢາມເຂດເສດຖະກິດພິເສດສະຫວັນ-ເຊໂນເຂດ(ສະຫວັນປັກ) ແລະ ທ່າບົກສະຫວັນນະເຂດ (Dry Port) ເຊິ່ງທ່ານໄດ້ຊີ້ນຳໃຫ້ຂະແໜງການກ່ຽວຂ້ອງຮີບຮ້ອນສ້າງລະບຽບການພາຍໃນ ເພື່ອຮັບປະກັນການຄຸ້ມຄອງເຂົ້າສູ່ລະບຽບການ ແລະ ດຶງດູດເອົາບໍລິສັດຂົນສົ່ງຕ່າງໆ ມາໃຫ້ຢູ່ຈຸດດຽວ; ມີເຈົ້າໜ້າທີ່ພາສີຢູ່ຈຸດດຽວ ເພື່ອສະດວກ ແລະຮັບປະກັນການເກັບພາສີຕ່າງໆ ໃຫ້ຄົບຖ້ວນ; ໃຫ້ເຂດເສດຖະກິດພິເສດເພີ່ມທະວີການດຶງດູດນັກລົງທຶນຂອງຕ່າງປະເທດ ເຂົ້າມາໃນເຂດໃຫ້ຫຼາຍຂຶ້ນ.

ໃນເວລາຕໍ່ມາ, ທ່ານ ທອງລຸນ ສີສຸລິດ ພ້ອມດ້ວຍຄະນະ ໄດ້ໄປຢ້ຽມຢາມໂຮງໝໍແຂວງສະຫວັນນະເຂດ ເຊິ່ງໄດ້ຮັບການສ້າງຕັ້ງຂຶ້ນໃນປີ 1920, ປະກອບມີ 200 ຕຽງ ໂດຍທ່ານຜູ້ອຳນວຍການໂຮງໝໍແຂວງໄດ້ລາຍງານສະພາບການແຜ່ລະບາດຂອງພະຍາດໄຂ້ຍຸງລາຍ ທີ່ເກີດຂຶ້ນນັບຕັ້ງແຕ່ເດືອນ ມັງກອນ 2019 ມາຮອດປັດຈຸບັນ ມີຜູ້ຕິດເຊື້ອພະຍາດໄຂ້ຍຸງລາຍແລ້ວ 4,110 ຄົນ ແລະ ໄດ້ມາປິ່ນປົວຢູ່ໂຮງໝໍແຂວງ 2,022 ຄົນ, (ເປັນເດັກນ້ອຍ 620 ຄົນ ແລະ ຜູ້ໃຫຍ່ 1,202 ຄົນ), ເສຍຊີວິດແລ້ວ 20 ຄົນ (ເດັກນ້ອຍ 11 ຄົນ ແລະ ຜູ້ໃຫຍ່ 9 ຄົນ). ພ້ອມນີ້, ທ່ານ ຫົວໜ້າພະແນກສາທາລະນະສຸກແຂວງ ກໍ່ໄດ້ລາຍງານເພີ່ມເຕີມ ກ່ຽວກັບວຽກງານສາທາລະນະສຸກ ຢູ່ແຂວງ ແລະ ການຈັດຕັ້ງປະຕິບັດ 10 ຕົວຊີິ້ວັດເຊິ່ງບາງຕົວຊີ້ວັດ ຍັງມີຄວາມທ້າທາຍທີ່ຈະບັນລຸຕາມແຜນ.

ທ່ານ ນາຍົກລັດຖະມົນຕີ ໄດ້ມີຄຳເຫັນຊົມເຊີຍໂຮງໝໍແຂວງ ແລະ ພະແນກສາທາລະນະສຸກ ກໍຄືພະນັກງານແພດໝໍພະຍາບານ ທີ່ເອົາໃຈໃສ່ແກ້ໄຂບັນຫາຫຍຸ້ງຍາກໂດຍສະເພາະການລະບາດຂອງພະຍາດໄຂ້ຍຸງລາຍ, ພ້ອມທັງຊີ້ນຳໃຫ້ເອົາໃຈໃສ່ປະຕິບັດຈັນຍາບັນຂອງແພດໝໍ ກໍ່ຄືຈັນຍາບັນຂອງພະນັກງານ-ລັດຖະກອນ, ປັບປຸງຄຸນນະພາບຂອງໂຮງໝໍ ແລະ ການບໍລິການໃຫ້ແກ່ປະຊາຊົນ; ສືບຕໍ່ເພີ່ມທະວີວຽກງານປ້ອງການລະບາດຂອງພະຍາດໄຂ້ຍຸງລາຍ ຖືເອົາການປ້ອງກັນແຕ່ຫົວທີເປັນສິ່ງສຳຄັນໂດຍສະເພາະການໂຄສະນາເຜີຍແຜ່, ການຮ່ວມມືກັບປະຊາຊົນໃນການທຳລາຍແຫລ່ງໜອນນ້ຳຍຸງລາຍ, ໃຫ້ປຸກລະດົມນັກຮຽນແພດ ແລະ ຊາວໜຸ່ມອາສາສະໝັກໃຫ້ຊ່ວຍກັນ; ເຝົ້າລະວັງ ແລະ ປ້ອງກັນການລະບາດຂອງພະຍາດໄອໄກ່ ແລະ ປຸກລະດົມໃຫ້ປະຊາຊົນມາສັກຢາກັນພະຍາດ; ສູ້ຊົນຈັດຕັ້ງປະຕິບັດ 10 ຕົວຊີ້ວັດໃຫ້ໄດ້ຕາມຄາດໝາຍ ເພື່ອຮັບປະກັນການຈັດຕັ້ງປະຕິບັດເປົ້າໝາຍການພັດທະນາແບບຍືນຍົງ; ໃຫ້ຂະແໜງການກ່ຽວຂ້ອງເອົາໃຈໃສ່ການຈ່າຍເງິນຍາມໃຫ້ແກ່ໂຮງໝໍ ແລະ ໃຫ້ຮີບຮ້ອນຄົ້ນຄວ້າກົນໄກການເບີກຈ່າຍໃຫ້ໄດ້ໄວຂຶ້ນ.

ໃນວັນດຽວກັນ, ທ່ານນາຍົກລັດຖະມົນຕີ ໄດ້ໃຫ້ກຽດໂອ້ລົມ ແລະ ຊີ້ນຳຄະນະນຳ-ພະນັກງານຫລັກແຫຼ່ງແຂວງ ໂດຍໄດ້ຊົມເຊີຍແຂວງສະຫວັນນະເຂດ ທີ່ເອົາໃຈໃສ່ພັດທະນາແຂວງມີຫລາຍດ້ານມີຄວາມຄືບໜ້າດີ, ເອົາໃຈໃສ່ແກ້ໄຂປະກົດການຫຍໍ້ທໍ້ທາງສັງຄົມ, ຮັບປະກັນຄວາມສະຫງົບໄດ້ດີ. ພ້ອມນີ້ ໄດ້ຊີ້ນຳໃຫ້ແຂວງ ສືບຕໍ່ເອົາໃຈໃສ່ຍູ້ແຮງການລົງທຶນພາຍໃນ ແລະ ຕ່າງປະເທດ ໂດຍປະຕິບັດນະໂຍ ບາຍ 3 ເປີດຢ່າງແທ້ຈິງ; ວຽກງານພັດທະນາຊົນນະບົດ ແລະ ລົບລ້າງຄວາມທຸກຍາກ ໂດຍເອົາຕົວແບບຂອງການພັດທະນາບ້ານຄຳປ່າແໜ ເປັນການຊຸກຍູ້ໃຫ້ເສດຖະກິດເຂົ້າໄປຊ່ວຍປະຊາຊົນຫຼາຍຂຶ້ນ, ຊຸກຍູ້ຂະບວນຮັກຊາດ-ພັດທະນາ, ປຸກລະດົມ ແລະ ດຶງດູດນັກທຸລະກິດລົງໄປຊ່ວຍປະຊາຊົນ; ເອົາໃຈໃສ່ການເກັບລາຍຮັບ ໂດຍການຈຳກັດການຮົ່ວໄຫລ ແລະ ເກັບໃຫ້ຄົບຖ້ວນ. ຄຽງຄູ່ກັນນີ້ ໃຫ້ເອົາໃຈໃສ່ດ້ານວັດທະນະທຳ ແລະ ສັງຄົມ ໂດຍສະເພາະການແກ້ໄຂສຸກເສີນບັນຫາການລະບາດຂອງພະຍາດໄຂ້ຍຸງລາຍ; ສືບຕໍ່ແກ້ໄຂປະກົດການຫຍໍ້ທໍ້ໃນສັງຄົມ ແລະ ຕິດຕາມຫາງສຽງສັງຄົມທີ່ຜ່ານສື່ສັງຄົມອອນລາຍ; ກະກຽມຮອບດ້ານໃຫ້ແກ່ ການເປີດກອງປະຊຸມໃຫຍ່ 3 ຂັ້ນຂອງແຂວງໂດຍສະເພາະຕ້ອງເອົາໃຈໃສ່ຍູ້ແຮງການສ້າງຂະບວນ, ວຽກງານບຸກຄະລາກອນ, ເພີ່ມທະວີຄວາມເປັນເອກະພາບພາຍໃນ ແລະ ກະກຽມຮັບມືກັບສິ່ງທ້າທາຍຕ່າງໆ.