ເກົາຫຼີຍິງຂີປະນາວຸດອີກແລ້ວ ຖືເປັນຄັ້ງທີ 6 ໃນຮອບບໍ່ເຖິງເດືອນ

ລາຍງານ 17 ສິງຫາ 2019: ສຳນັກຂ່າວ KCNA ຂອງທາງການເກົາຫຼີເໜືອລາຍງານວ່າ ທ່ານ ຄິມ ຈອງ-ອຶນ ຜູ້ນຳສູງສຸດຂອງເກົາຫຼີເໜືອ ລົງພື້ນທີ່ແຫ່ງໜຶ່ງທາງພາກຕາເວັນອອກຂອງປະເທດ ເມື່ອວັນສຸກທີ່ຜ່ານມາ ເພື່ອສັງເກດ ແລະ ຕິດຕາມການທົດລອງອາວຸດຊະນິດໃໝ່ ແລະ ຜົນການທົດສອບເປັນທີ່ໜ້າເພິ່ງພໍໃຈຢ່າງຍິ່ງ.

ເຊິ່ງລາຍງານຂອງ KCNA ບໍ່ໄດ້ລະບຸວ່າອາວຸດດັ່ງກ່າວນັ້ນແມ່ນຫຍັງ ແຕ່ຂໍ້ມູນຂອງກະຊວງປ້ອງກັນປະເທດເກົາຫຼີໃຕ້ຢືນຢັນວ່າ ເປັນຂີປະນາວຸດພິໄສໃກ້ ຄືກັບດັ່ງທີ່ທົດລອງກ່ອນໜ້ານັ້ນທັງ 5 ຄັ້ງ ຕັ້ງແຕ່ວັນທີ 25 ກໍລະກົດ ທີ່ຜ່ານມາ, ໂດຍໃນການທົດລອງຄັ້ງນີ້ ເປັນຄັ້ງທີ 6 ເກົາຫຼີເໜືອຍິງຂີປະນາວຸດ 2 ລູກ ມີພິໄສການຍິງປະມານ 230 ກິໂລແມັດ ແລະ ລະດັບຄວາມສູງປະມານ 30 ກິໂລແມັດ ກ່ອນຕົກລົງທະເລຕາເວັນອອກ ຄືກັບທຸກເທື່ອຜ່ານມາ.

ເຖິງຢ່າງໃດກໍ່ຕາມ, ການທົດລອງຂີປະນາວຸດ ຄັ້ງທີ 6 ຂອງລັດຖະບານເກົາຫຼີເໜືອ ເກີດຂຶ້ນພຽງບໍ່ພໍເທົ່າໃດວັນ ກ່ອນທີ່ທ່ານ ສະຕີເຟນ ບີກັນ ທູດພິເສດວຽກງານເກົາຫຼີເໜືອຂອງສະຫະລັດ ອາເມຣິກາ ຈະເດີນທາງຢ້ຽມຢາມຍີຸ່ປຸ່ນ ແລະ ເກົາຫຼີໃຕ້ໃນອາທິດໜ້າ, ນອກຈາກນີ້ ລາຍງານຂອງ KCNA ຍັງຄົງວິຈານການຊ້ອມຮົບຮ່ວມປະຈຳປີລະຫວ່າງ ສ.ອາເມຣິກາ ແລະ ເກົາຫຼີໃຕ້ ທີ່ເກີດຂຶ້ນຕະຫຼອດໄລຍະເດືອນນີ້ ວ່າຈະມີຜົນຕໍ່ນະໂຍບາຍລະຫວ່າງສອງເກົາຫຼີຢ່າງແນ່ນອນ ແລະ ການທີ່ລັດຖະບານເກົາຫຼີໃຕ້ຍັງຄົງຢືນຢັນຄຳສັ່ງຊື່ຍົນຂັບໄລ່ F-35 ຈາກ ສ.ອາເມຣິກາ ຍິ່ງເຮັດໃຫ້ລັດຖະບານເກົາຫຼີເໜືອຕີລາຄາວ່າ ບໍ່ມີຄວາມຈຳເປັນທີ່ຈະເຈລະຈາກັບເກົາຫຼີໃຕ້ຕໍ່ໄປ ໂດຍເກົາຫຼີເໜືອປະນາມການຊ້ອມຮົບລະຫວ່າງ ສ.ອາເມຣິກາ ແລະ ເກົາຫຼີໃຕ້ມາໂດຍຕະຫຼອດ ເຖິງແມ່ນວ່າຈະຫຼຸດລະດັບການຊ້ອມຮົບແລ້ວກໍ່ຕາມ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube