ກຸ່ມແບ່ງແຍກດິນແດນ 3 ແຂວງພາກໃຕ້ຂອງໄທ ອ້າງວ່າໄດ້ເຈລະຈາລັບກັບລັດຖະບານໄທ

ລາຍງານ 17 ສິງຫາ 2019: ທ່ານ ປັກ ຟາຄີ (Pak Fakir) ອາຍຸ 70 ແກນນຳອາວຸໂສຂອງຂະບວນການແນວຮ່ວມປະຕິວັດແຫ່ງຊາດມະລາຢູປັດຕະນີ ຫຼື BRN ເປີດເຜີຍຕໍ່ສຳນັກຂ່າວ Reuter ວ່າຄະນະເຈົ້າໜ້າທີ່ຂອງ BRN ໄດ້ພົບປະແບບລັບໆກັບເຈົ້າໜ້າທີ່ລັດຖະບານໄທຊຸດໃໝ່ ທີ່ປະເທດໜຶ່ງໃນອາຊີຕາເວັນອອກສຽງໃຕ້ ເມື່ອວັນສຸກ 16 ສິງຫາ ທີ່ຜ່ານມາ ແລະ ໃນລະຫວ່າງການພົບປະຫາລື BRN ໄດ້ຍື່ນເງື່ອນໄຂຂໍ້ຮຽກຮ້ອງ ໃຫ້ລັດຖະບານໄທປ່ອຍຕົວຜູ້ຕ້ອງສົງໄສກໍ່ຄວາມບໍ່ສະຫງົບ ໃນພື້ນທີ່ 3 ແຂວງພາກໃຕ້ຂອງໄທ ທີ່ຖືກຈັບກຸມ ແລະ ກັກຂັງຢູ່ທັງໝົດ ພ້ອມທັງຕ້ອງດຳເນີນການສືບສວນສອບສວນຢ່າງໂປ່ງໃສ ຕາມຂໍ້ກ່າວຫາທຳຮ້າຍເຈົ້າໜ້າທີ່ຄວາມໝັ້ນຄົງຂອງໄທ.

ທ່ານ ປັກ ຟາຄີ ກ່າວວ່າເງື່ອນໄຂທີ່ກ່າວມາ ເປັນຂັ້ນຕອນໄປສູ່ການເຈລະຈາສັນຕິພາບຢ່າງເປັນທາງການ ເຊິ່ງຂະນະນີ້ຂະບວນການຍັງຢູ່ໃນຂັ້ນເລີ່ມຕົ້ນ, ການເຈລະຈາທີ່ຜ່ານມາລັດຖະບານໄທຄືກັບດັ່ງນ້ຳມັນ ມື່ນປານອ່ຽນ ພ້ອມກັບຢ້ຳວ່າ ຕົ້ນເຫດຂອງບັນຫາສຳລັບຂະບວນການ BRN ຄືການຖືກຍຶດຄອງດິນແດນ ໂດຍບັນຫາດັ່ງກ່າວຖືກຍົນຂຶ້ນມາປຶກສາຫາລືແລ້ວ ໃນລະວຫ່າງການເຈລະຈາຫຼາຍຄັ້ງຜ່ານມາ.

ທ່ານ ປັກ ຟາຄີ ຍັງກ່າວເຖິງເຫດການວາງລະເບີດ ໃນຫຼາຍພື້ນທີ່ຂອງນະຄອນຫຼວງບາງກອກ ເມື່ອວັນທີ 2 ສິງຫາ ທີ່ຜ່ານມາ ວ່າບໍ່ແມ່ນສີມືຂອງກຸ່ມ BRN ເນື່ອງຈາກ BRN ຈະບໍ່ໂຈມຕີນອກເໜືອຈາກພື້ນທີ່ 3 ແຂວງຊາຍແດນພາກໃຕ້ຂອງໄທ ເພາະບໍ່ຕ້ອງການໃຫ້ຖືກຕີລາຄາວ່າເປັນກຸ່ມກໍ່ການຮ້າຍ, “ພວກຮົາຮັກດິນແດນອານາເຂດຂອງພວກເຮົາ ເປັນຫຍັງຈຶ່ງຈະຕ້ອງອອກໄປກໍ່ເຫດນອກດິນແດນ” ທ່ານ ປັກ ຟາຄີ ກ່າວ “ເຫດທີ່ເກີດຂຶ້ນຄືສີມືຂອງກຸ່ມອື່ນແນ່ນອນ”.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube