ການປະທ້ວງຮົງກົງ ຂະຫຍາຍກວ້າງສູ່ເອີຣົບ ມີທັງສະໜັບສະໜູນ-ຕໍ່ຕ້ານ ແລະ ເປັນກາງປະຊັນໜ້າກັນ

ລາຍງານ 18 ສິງຫາ 2019: ກຸ່ມຜູ້ປະທ້ວງສະໜັບສະໜູນ ແລະ ຕໍ່ຕ້ານ ສປ.ຈີນ ໂຮມຊຸມນຸມ ແລະ ເດີນຂະບວນປະທ້ວງໃນເມືອງໃຫຍ່ຫຼາຍແຫ່ງຂອງປະເທດໃນເອີຣົບ ເມື່ອວັນເສົາ ທີ່ຜ່ານມາ ເຊັ່ນ: ໃນນະຄອນຫຼວງປາຣີສ ປະເທດຝຣັ່ງ ເຖິງຈະມີການປະທະກັນລະຫວ່າງຜູ້ສະໜັບສະໜູນ ແລະ ບໍ່ຕໍ່ຕ້ານ ສປ.ຈີນ ແດ່ກໍ່ຕາມ ແຕ່ໃນພາບລວມຕຳຫຼວດທ້ອງຖິ່ນສາມາດຄວບຄຸມສະຖານະການໄດ້.

ແຕ່ສະຖານະການການເດີນຂະບວນ ແລະ ໂຮມຊຸມນຸມປະທ້ວງໃນຕ່າງປະເທດທີ່ທຸກຝ່າຍໃຫ້ຄວາມສົນໃຈຫຼາຍທີ່ສຸດຄື ທີ່ນະຄອນຫຼວງລອນດອນ ປະເທດອັງກິດ ອະດີດເຈົ້າອານານິຍົມຮົງກົງ ແນ່ນອນວ່າຄົນຈີນສ່ວນໃຫຍ່ເດີນຂະບວນສະໜັບສະໜູນການປະຕິບັດໜ້າທີ່ຂອງຕຳຫຼວດຮົງກົງ ຮ່ວມກັບຄົນຮົງກົງບາງສ່ວນ ໂດຍມີການໂບກທຸງຊາດຈີນ ແລະ ຊູປ້າຍຂໍ້ຄວາມ “ຊາດດຽວ ຈີນດຽວ” ແລະ “ຮົງກົງເປັນສ່ວນໜຶ່ງຂອງຈີນຕະຫຼອດໄປ”, ສ່ວນຝ່າຍກົງກັນຂ້າມທີ່ອອກມາໂຮມຊຸມນຸມປະຊັນກັນ ນອກເໜືອຈາກຄົນຮົງກົງແລ້ວ ຍັງມີຄົນໄຕ້ຫວັນຮ່ວມນຳ ເຊິ່ງມີການໂບກທຸງຮົງກົງພ້ອມຊູແຜ່ນປ້າຍຂໍ້ຄວາມວ່າ “ເສລີພາບເພື່ອຮົງກົງ“ ແລະ “ໄຕ້ຫວັນສະໜັບສະໜູນເສລີພາບຂອງຮົງກົງ”, ນອກຈາກນັ້ນຍັງມີການເດີນຂະບວນຂອງຝ່າຍທີ່ເປັນກາງຕໍ່ຕ້ານການໃຊ້ຄວາມຮຸນແຮງທຸກຮູບແບບອີກດ້ວຍ.

ຂະນະທີ່ສະຖານະການການໂຮມຊຸມນຸມປະທ້ວງຢູ່ຮົງກົງ ເມື່ອຄືນວັນເສົາທີ່ຜ່ານມາ ໄດ້ສ້າງຄວາມສະບາຍໃຈໃຫ້ກັບທຸກຝ່າຍຫຼາຍຂຶ້ນ ເນື່ອງຈາກເກືອບຖືໄດ້ວ່າເປັນຄັ້ງທຳອິດໃນຮອບຕະຫຼອດ 11 ອາທິດທີ່ເຄັ່ງຕຶງ ທີ່ເຈົ້າໜ້າທີ່ບໍ່ໄດ້ໃຊ້ແກັດນ້ຳຕາ ເຖິງຈະມີການຊຸມນຸມປະທ້ວງປະຊັນກັນລະຫວ່າງຝ່າຍສະໜັບສະໜູນ ແລະ ຝ່າຍຕໍ່ຕ້ານລັດຖະບານຮົງກົງ ແລະ ສປ.ຈີນ, ແຕ່ສຸດທ້າຍຕ່າງຝ່າຍຕ່າງຍຸຕິການຊຸມນຸມຕາມກຳນົດຂອງເຈົ້າໜ້າທີ່, ແຕ່ກໍ່ຍັງມີກຸ່ມຫົວຮຸນແຮງຈຳນວນໜຶ່ງໄປຊຸມນຸມກັນຢູ່ໜ້າສະຖານນີຕຳຫຼວດໃນເຂດມົງກົກ ເຊິ່ງເປັນໜຶ່ງໃນເຂດການຄ້າສຳຄັນຂອງຝັ່ງເກົາລູນ ທີ່ບັນຍາກາດເປັນໄປດ້ວຍຄວາມເຄັ່ງຕຶງຫຼາຍຊົ່ວໂມງ ກ່ອນທີ່ຝ່າຍຜູ້ຊຸມນຸມຈະສະຫຼາຍຕົວໄປເອງ, ເຖິງຢ່າງໃດກໍ່ຕາມ ບັນຍາກາດຍັງຄົງວາງໃຈບໍ່ໄດ້ເຕັມຮ້ອຍ ເນື່ອງຈາກຍັງຈະມີການເດີນຂະບວນປະທ້ວງໃນວັນອາທິດ 18 ສິງຫານີ້ອີກ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube