ຈີນເຄື່ອນພົນເຂົ້າຮົງກົງ ທັງທາງບົກ, ທາງອາກາດ ແລະ ທາງທະເລ ເພື່ອສັບປ່ຽນກອງກຳລັງໃນຖານທັບ

ລາຍງານ 29 ສິງຫາ 2019: ສຳນັກຂ່າວຊິນຫົວຂອງທາງການຈີນລາຍງານວ່າ ກອງທະຫານຮັກສາການປະຈຳຮົງກົງ ຂອງກອງທັບປະຊາຊົນຈີນ ໄດ້ທຳການສັບປ່ຽນກຳລັງພົນ ແລະ ເຄື່ອນຍ້າຍຍຸດໂທປະກອນທັງທາງບົກ, ທາງເຮືອ ແລະ ທາງອາກາດ ເມື່ອຕອນເຊົ້າມືດຂອງວັນພະຫັດນີ້ ຕາມເວລາທ້ອງຖິ່ນ ໂດຍການດຳເນີນການເປັນໄປຕາມປະຕິບັດການປົກກະຕິ ທີ່ເກີດຂຶ້ນເປັນປະຈຳທຸກປີ ນັບຕັ້ງແຕ່ກອງທັບປະຊາຊົນຈີນຕັ້ງຖານທັບໃນຮົງກົງເມື່ອ 22 ປີທີ່ຜ່ານມາ, ຂະນະທີ່ການສັບປ່ຽນກຳລັງພົນ ແລະ ຍຸດໂທປະກອນຄັ້ງນີ້ໄດ້ຮັບການອະນຸມັດຈາກຄະນະກຳມາທິການທະຫານສູນກາງພັກຄອມມູນິດຈີນ ໝາຍຄວາມວ່າເປັນການເຄື່ອນໄຫວຕາມກົດໝາຍທາງທະຫານຂອງກອງທັບປະຊາຊົນຈີນທີ່ມີຕໍ່ຮົງກົງທຸກປະການ.

ເຖິງແມ່ນວ່າຈະເປັນພຽງການສັບປ່ຽນກຳລັງພົນ ແລະ ເຄື່ອນຍ້າຍຍຸດໂທປະກອນຂອງກອງທັບປະຊາຊົນຈີນໃນຮົງກົງທີ່ເກີດຂຶ້ນເປັນປະຈຳທຸກປີ ນັບຕັ້ງແຕ່ອັງກິດ ສົ່ງຄືນເກາະຮົງກົງໃຫ້ແກ່ຈີນ ເມື່ອວັນທີ 1 ກໍລະກົດ 1997 ແຕ່ການເລືອກໄລຍະເວລາ ແລະ ການປະກາດຢ່າງເປັນທາງການທີ່ລະບຸອີກວ່າ ເພື່ອຍົກລະດັບຄວາມສາມາດຂອງກອງທັບປະຊາຊົນຈີນ ໃນການຮັກສາສະຖຽນລະພາບ ແລະ ຄວາມຈະເລີນຮຸ່ງເຮືອງຂອງຮົງກົງ ເປັນກໍລະນີທີ່ເກືອບບໍ່ເຄີຍເກີດຂຶ້ນມາກ່ອນ ທ່າມກາງລາຍງານວ່າ ກຸ່ມປະເທດຕາເວັນຕົກ ຕິດຕາມສະຖານະການການສັບປ່ຽນກຳລັງພົນຂອງກອງທັບປະຊາຊົນຈີນໃນຄັ້ງນີ້ຢ່າງໃກ້ຊິດ ວ່າມີການປ່ຽນແປງແອບແຝງໃດ ຫຼື ບໍ່.

ຂະນະທີ່ກ່ອນໜ້າການສັບປ່ຽນກຳລັງພົນຂອງກອງທັບປະຊາຊົນຈີນບໍ່ພໍເທົ່າໃດຊົ່ວໂມງ ກອງເຮືອປາຊີຟິກຂອງ ສ.ອາເມຣິກາ ທີ່ມີຖານທັບປະຈຳການຢູ່ເກາະຮາວາຍ ອອກຖະແຫຼງການວ່າລັດຖະບານຈີນປະຕິເສດຄຳຮ້ອງໃນການຂໍພິຈາລະນາອະນຸຍາດນຳເຮືອຮົບລຳໜຶ່ງເຂົ້າຈອດທຽບທ່າທີ່ເມືອງຊິງເຕົ່າ ມົນທົນຊານຕົງ ຕັ້ງຢູ່ແຄມຝັ່ງເບື້ອງຕາເວັນອອກຂອງຈີນ ໃນວັນອາທິດທີ 1 ກັນຍານີ້ ໂດຍທາງການຈີນບໍ່ໃຫ້ເຫດຜົນ ສ່ວນຖະແຫຼງການຂອງກອງເຮືອປາຊີຟິກປະຕິເສດທີ່ຈະເປີດເຜີຍຊື່ ແລະ ປະເພດຂອງເຮືອທີ່ຂໍນຳເຂົ້າຈອດທຽບທ່າຈີນ.

ນອກຈາກນີ້, 2 ອາທິດກ່ອນໜ້ານັ້ນ ຈີນບໍ່ອະນຸນາດໃຫ້ພາຫະນະ 2 ລຳຂອງກອງເຮືອປາຊີຟິກເຂົ້າຈອດທຽບທ່າໃນຮົງກົງຄືເຮືອ USS Green Bay ເຊິ່ງເປັນເຮືອສະເທືອນນ້ຳສະເທືອນບົກສຳລັບການຍົກພົນຂຶ້ນຝັ່ງ ຂໍເຂົ້າຈອດທຽບທ່າເມື່ອວັນເສົາ 17 ສິງຫາ ທີ່ຜ່ານມາ ແລະ ເຮືອຮົບຕິດຕັ້ງລະບົບຂີປະນາວຸດ USS Lake Erie ທີ່ຕ້ອງການເຂົ້າຈອດທຽບທ່າໃນເດືອນກັນຍານີ້ ທ່າມກາງສະຖານະການຄວາມເຄັ່ງຕຶງທາງການເມືອງໃນຮົງກົງ ທີ່ລັດຖະບານຈີນກ່າວຫາວ່າ ສ.ອາເມຣິກາ ແລະ ພັນທະມິດເປັນຜູ້ຈູດຊະນວນ ແລະ ລ້າງສະໝອງດ້ວຍການປູກປັ້ນແນວຄິດບິດເບື້ອນເລື່ອງອານານິຄົມ ໃຫ້ກັບກຸ່ມໄວໜຸ່ມຮົງກົງ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube