ສປປ.ລາວ ຈະສະເໜີປ່າສະຫງວນແຫ່ງຊາດຫິນໜາມໜໍ່ ເຂົ້າເປັນມໍລະດົກໂລກທາງທຳມະຊາດ

ລາຍງານ 29 ສິງຫາ 2019: ອີງຕາມການລາຍງານຂອງວິທະຍຸກະຈາຍສຽງແຫ່ງຊາດ ໃຫ້ຮູ້ວ່າ ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ໄດ້ຈັດກອງປະຊຸມຂອງຄະນະກຳມະການລະດັບຊາດ ເພື່ອມໍລະດົກໂລກ ພາຍໃຕ້ການເປັນປະທານຂອງທ່ານ ສຈ.ປອ. ບໍ່ແສງຄຳ ວົງດາລາ ລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ປະທານຄະນະກຳມະການລະດັບຊາດເພື່ອມໍລະດົກໂລກຂອງ ສປປ.ລາວ ໂດຍມີຜູ້ແທນຈາກຫວຽດນາມ, ອົງການປົກຄອງແຂວງຄຳມ່ວນ, ອົງການ UNESCO, IUCN ແລະ GIZ ເຂົ້າຮ່ວມ.

ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ໄດ້ສົມທົບກັບບັນດາຂະແໜງການ ແລະ ອົງການຈັດຕັ້ງທີ່ກ່ຽວຂ້ອງ ເພື່ອຂຸ້ນຂ້ຽວກະກຽມເອກະສານຄຳຮ້ອງ ກ່ຽວກັບປ່າສະຫງວນແຫ່ງຊາດຫິນໜາມໜໍ່ ເມືອງບົວລະພາ ແຂວງຄຳມ່ວນ ແລະ ປະສານສົມທັບກັບລັດຖະບານຫວຽດນາມ ໃນການນຳສະເໜີຂຶ້ນເປັນມໍລະດົກໂລກທາງທຳມະຊາດຮ່ວມຊາຍແດນ ກັບປ່າສະຫງວນຟອງຍາເກບັງ ແຂວງກວາງບິງ ຂອງຫວຽດນາມ, ເຊິ່ງຄາດວ່າປ່າສະຫງວນແຫ່ງຊາດຫິນໜາມໜໍ່ ຈະໄດ້ກາຍເປັນມໍລະດົກໂລກທາງທຳມະຊາດແຫ່ງອຳທິດຂອງ ສປປ.ລາວ, ທັງເປັນມໍລະດົກໂລກທາງທຳມະຊາດຊາຍແດນແຫ່ງທຳອິດໃນພາກພື້ນນີ້ອີກດ້ວຍ.

ປັດຈຸບັນ ສປປ.ລາວ ມີມໍລະດົກທາງດ້ານວັດທະນະທຳທີ່ເປັນຮູບປະທຳ 3 ແຫ່ງຄື: ນະຄອນປະຫວັດສາດຫຼວງພະບາງ, ວັດພູ ແຂວງຈຳປາສັກ ແລະ ທົ່ງໄຫຫິນ ແຂວງຊຽງຂວາງ, ນອກນີ້ ສຽງແຄນລາວ ກໍ່ໄດ້ຂຶ້ນບັນຊີເປັນຕົວແທນມໍລະດົກທາງວັດທະນະທຳນາມມະທຳຂອງມວນມະນຸດສະຍະຊາດອີກດ້ວຍ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube