ສ.ອາເມຣິກາ ຕັ້ງສູນບັນຊາການອະວະກາດ ກ່າວວ່າເພື່ອປົກປ້ອງອິດທິພົນຂອງຕົນໃນອະວະກາດ

ລາຍງານ 30 ສິງຫາ 2019: ທ່ານ ໂດໂນ ທຣຳ ປະທານປະເທດສະຫະລັດ ອາເມຣິກາ ແລະ ທ່ານ ໄມ ເພນ ຮອງປະທານປະເທດຮ່ວມເປັນປະທານໃນການສ້າງຕັ້ງສູນບັນຊາການອະວະກາດຢ່າງເປັນທາງການ ທີ່ທຳນຽບຂາວ ເມື່ອວັນພະຫັດ (29 ສິງຫາ) ທີ່ຜ່ານມາ ໂດຍທ່ານ ໂດໂນ ທຣຳ ໄດ້ລົງນາມໃນເອກະສານຮັບຮອງມອບໃຫ້ທ່ານ ມາກ  ເອສເປີ ລັດຖະມົນຕີກະຊວງປ້ອງກັນປະເທດ ແລະ ມອບທຸງທີ່ມີກາສັນຍາລັກຂອງສູນບັນຊາການໃຫ້ແກ່ພົນເອກ ຈອນ ເຣມອນ ຜູ້ບັນຊາການຄົນທຳອິດຂອງສູນແຫ່ງນີ້.

ພົນເອກ ຈອນ ເຣມອນ ກ່າວວ່າ ເຖິງແມ່ນວ່າກອງທັບອາກາດຈະມີສຳນັກງານວຽກງານອະວະກາດຢູ່ແລ້ວ ແຕ່ພາລະກິດສຳຄັນຂອງສູນບັນຊາການອະວະກາດ ຫຼື SpaceCom ຈະເນັ້ນໄປທີ່ການພັດທະນາຄວາມສາມາດໃນທຸກດດ້ານຂອງກອງທັບ ທີ່ກ່ຽວຂ້ອງກັບອະວະກາດ ເພື່ອສ້າງຄວາມເຊື່ອໝັ້ນໃຫ້ແກ່ທຸກຝ່າຍ ວ່າອິດທິພົນຂອງ ສ.ອາເມຣິກາ ໃນອະວະກາດຈະບໍ່ຖືກຄຸກຄາມຈາກສັດຕູ ເຊິ່ງກຳລັງເລັ່ງພັດທະນາອາວຸດ ແລະ ເຕັກໂນໂລຊີທີ່ກ່ຽວຂ້ອງຫຼາກຫຼາຍຮູບແບບ ເພື່ອໂຈມຕີດາວທຽມຂອງອາເມຣິກາ, ໂດຍພົນເອກ ຈອນ ເຣມອນ ກ່າວເຖິງລັດເຊຍ ແລະ ຈີນວ່າ ທັງສອງປະເທດໄດ້ທຸ້ມງົບປະມານດ້ານອະວະກາດເພີ່ມຂຶ້ນຫຼາຍໃນໄລຍະຫຼັງໆມານີ້.

ສູນບັນຊາການອະວະກາດ ຈະຖືເປັນສູນບັນຊາການທາງທະຫານແຫ່ງທີ 11 ຂອງກະຊວງປ້ອງກັນປະເທດ ສ.ອາເມຣິກາ, ເຖິງຢ່າງໃດກໍ່ຕາມ ທ່ານ ໂດໂນ ທຣຳ ຍອມຮັບວ່າ ຕົນຍັງບໍ່ຖິ້ມແນວຄິດໃນການສ້າງຕັ້ງກອງກຳລັງອະວະກາດ ໃຫ້ເປັນເຫຼົ່າຮົບໃໝ່ຂອງກອງທັບຄືກັບກອງທັບບົກ, ກອງທັບເຮືອ, ກອງທັບອາກາດ ແລະ ກອງກຳລັງພິເສດ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube