ການປະທ້ວງໃນຮົງກົງຍັງດຳເນີນໄປຢ່າງດຸເດືອດ ເຖິງຈະມີຄຳສັ່ງຫ້າມ, ສ່ວນແກນນຳບາງສ່ວນໄດ້ປະກັນຕົວ

ລາຍງານ 31 ສິງຫາ 2019: ຈາກກໍລະນີທີ່ເຈົ້າໜ້າຕຳຫຼວດຮົງກົງທຳການຈັບກຸມ ແລະ ດຳເນີນຄະດີກັບນັກເຄື່ອນໄຫວຄົນສຳຄັນແລ້ວຢ່າງໜ້ອຍ 7 ຄົນ ໃນຂໍ້ຫາຮ່ວມກັນໂຮມຊຸມນຸມໂດຍບໍ່ໄດ້ຮັບອະນຸຍາດ ແລະ ປິດລ້ອມສຳນັກງານໃຫຍ່ຕຳຫຼວດ ໃນນເຂດຫວ່ານໄຈ໋, ພ້ອມທັງເຈດຕະນາທຳລາຍຊັບສິນຂອງທາງການ ເມື່ອວັນທີ 21 ມິຖຸນາ ທີ່ຜ່ານມາ, ໂດຍຜູ້ທີ່ຖືກຈັບກຸ່ມ ແລະ ດຳເນີນຄະດີລວມເຖິງທ້າວ ໂຈຊົວ ຫວ່ອງ ເລຂາທິການພັກເດໂມຊິສໂຕ, ນາງ ແອກເນສ ໂຈວ ສະມາຊິກພັກເດໂມຊິສໂຕ ແລະ ທ້າວ ແອນດີ ຊານ ທີ່ເປັນຫົວໜ້າພັກເອກະລາດແຫ່ງຊາດຮົງກົງ ທີ່ຄະນະຜູ້ບໍລິຫານຮົງກົງປະກາດໃຫ້ເປັນ “ອົງກອນນອກຮີດ” ເມື່ອເດືອນກັນຍາ ປີທີ່ຜ່ານມາ ຈາກການມີນະໂຍບາຍຕໍ່ຕ້ານ ສປ.ຈີນ ແລະ ຫຼັກການ 1 ປະເທດ 2 ລະບອບຢ່າງເປີດເຜີຍ ໂດຍທ້າວ ແດນດຼູ ຊານ ຖືກຈັບກຸ່ມລະຫວ່າງກຽມເດີນທາງຈາກຮົງກົງໄປຍີ່ປຸ່ນ ເມື່ອຄືນວັນພະຫັດທີ່ຜ່ານມາ.

ຫຼ້າສຸດສານຮົງກົງຕາເວັນອອກ ອະນຸຍາດໃຫ້ປະກັນຕົວສະເພາະສະມາຊິກພັກເດໂມຊິສໂຕເທົ່ານັ້ນຄື ທ້າວ ໂຈຊົວ ຫວ່ອງ ແລະ ທາງ ແອກເນສ ໂຈວ ດ້ວຍຫຼັກຊັບຄ້ຳປະກັນຄົນລະ 10,000 ໂດລາຮົງກົງ ແລະ ຕ້ອງມາລາຍງານຕົວອາທິດລະ 2 ວັນ, ແຕ່ຫຼັງຈາກໄດ້ຮັບການປ່ອຍຕົວ ທ້າວ ໂຈຊົວ ຫວ່ອງ ກ່າວປະນາມທ່ານ ສີ ຈິ້ນຜິງ ປະທານປະເທດຈີນ ແລະ ລັດຖະບານ ສປ.ຈີນ ຢ່າງກົງໄປກົງມາວ່າ ຜູ້ນຳຈີນເຈດຕະນາຮິບຮອນສິດທິ ແລະ ເສລີພາບຂອງຄົນຮົງກົງ ແລະ ຮຽກຮ້ອງປະຊາຄົມໂລກຮ່ວມກັນກົດດັນລັດຖະບານຈີນ ວ່າໃຊ້ອຳນາດສຸກເສີນ ຫຼື ກົດດັນທາງທະຫານບໍ່ແມ່ນທາງອອກ.

ເຖິງແມ່ນວ່າຕຳຫຼວດຮົງກົງຈະໄດ້ສັ່ງຫ້າມບໍ່ໃຫ້ໂຮມກັນຊຸມນຸມໃນວັນເສົານີ້ (31 ສິງຫາ) ຢ່າງເດັດຂາດ ໂດຍໃຫ້ເຫດຜົນດ້ານຄວາມປອດໄພສາທາລະນະ ແລະ ແນວຮ່ວມສິດທິມະນຸດພົນລະເຮືອນ (CHRF) ທີ່ເປັນໜຶ່ງໃນແກນນຳຂອງການປະໂຮມຊຸມນຸມປະທ້ວງລັດຖະບານຮົງກົງຕັ້ງແຕ່ກາງເດືອນມິຖຸານາ ທີ່ຜ່ານມາ ກໍ່ໄດ້ປະກາດຍົກເລີກກິດຈະກຳການປະທ້ວງຄັ້ງໃຫຍ່ໃນທ້າຍອາທິດນີ້ ທີ່ຈະເປັນການໂຮມຊຸມນຸມເພື່ອລະນຶກວັນຄົບຮອບ 5 ປີ ຂອງການຂະບວນການໂຮມຊຸນນຸມປະຕິວັດຄັນຮົ່ມເຫຼືອງ ເມື່ອເດືອນກັນຍາ 2014, ແຕ່ຜູ້ຊຸມນຸມຈຳນວນຫຼາຍພັນຄົນຍັງຄົງອອກມາເດີນຂະບວນໄປຕາມຖະໜົນຫົນທາງໃນຮົງກົງ ແລະ  ປິດເສັ້ນທາງໃນເຂດທຸລະກິດການເງິນ.

ສະຖານະການຍິ່ງເຄັ່ງຕຶງ ເມື່ອເຂົ້າສູ່ຊ່ວງບ່າຍ ເມື່ອກຸ່ມຜູ້ຊຸມນຸມປະທ້ວງຫົວຮຸນແຮງໄດ້ດຶກແກວ່ງກ້ອນຫິນ, ຈູດໄຟເຜົາ ແລະ ສ່ອງແສງເລເຊີໃສ່ຕຳຫຼວດທີ່ຕັ້ງສິ່ງກີດຂວາງບໍລິເວນດ້ານນອກຂອງອາຄານລັດຖະສະພາຮົງກົງ, ດັ່ງນັ້ນ, ຕຳຫຼວດຈຶ່ງຕ້ອງໃຊ້ລົດສີດນ້ຳແຮງດັນສູງ ແລະ ຍິງແກັດນ້ຳຕາເພື່ອສະຫຼາຍການຊຸມນຸມ ແຕ່ກຸ່ມຜູ້ຊຸມນຸມກໍ່ຍັງງັດເອົາກ້ອນອິດທີ່ປູທາງຍ່າງມາເປັນອາວຸດດຶກແກວ່ງໃສ່ຕຳຫຼວດ, ເມື່ອເຂົ້າສູ່ຊ່ວງຄ່ຳກຸ່ມຜູ້ຊຸມນຸມກໍ່ໄດ້ກະຈາຍກຳລັງຝ່າສິ່ງກີດຂວາງດ້ານນອກອາຄານລັດຖະສະພາ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube