ການຊ່ວຍເຫຼືອໄພນ້ຳຖ້ວມ 6 ແຂວງພາກກາງ ແລະ ພາກໃຕ້ຍັງບໍ່ພໍພຽງ ລັດຂໍລະດົມການບໍລິຈາກເພີ່ມ

ອີງຕາມການລາຍງານຂອງສັງສີພິມວຽງຈັນທາມ 7 ກັນຍາ 2019 ໃຫ້ຮູ້ວ່າ: ເຖິງແມ່ນວ່າປະຊາຊົນໃນຂອບເຂດທົ່ວປະເທດໄດ້ອອກມາໃຫ້ການຊ່ວຍເຫຼືອໃນດ້ານຕ່າງໆນັບແຕ່ໄດ້ເກີດເຫດນ້ຳຖ້ວມ 6 ແຂວງ ພາກກາງ ແລະ ພາກໃຕ້ ນັບແຕ່ທ້າຍເດືອນແລ້ວນີ້ມາເຖິງປັດຈຸບັນ ແຕ່ຄວາມຕ້ອງການຂອງຜູ້ທີ່ຖືກຜົນກະທົບຈາກໄພພິບັດດັ່ງກ່າວຍັງມີຫຼາຍ.

ສະນັ້ນ, ກະຊວງແຮງງານ ແລະ ສະຫວັດດີການສັງຄົມ ໃນມື້ວານນີ້ 06 ກັນຍາ 2019 ໄດ້ອອກແຈ້ງການ ຫຼ້າສຸດເພື່ອຂຸ້ນຂ້ຽວປຸກລະດົມການຊ່ວຍເຫຼືອບັນເທົາທຸກໃຫ້ແກ່ຜູ້ຖືກເຄາະຮ້າຍດັ່ງກ່າວ.

ໃນແຈ້ງການໄດ້ລະບຸໄວ້ວ່າ: ດ້ວຍຄວາມເປັນຫ່ວງເປັນໃຍຕໍ່ບຸກຄົນ ແລະ ຄອບຄົວຜູ້ປະສົບເຄາະຮ້າຍ ຈາກໄພພິບັດຄັ້ງນີ້, ພັກ ແລະ ລັດ ກໍ່ໄດ້ມີການຈັດຕັ້ງຊີ້ນໍາ ການຊ່ວຍ ເຫຼືອສຸກເສີນຮີບດ່ວນ ດ້ວຍການສົມ ທົບລະຫວ່າງ ສູນກາງ ແລະ ທ້ອງຖິ່ນ ເປັນຕົ້ນ ການກອບກູ້ເອົາຊີວິດ ແລະ ຊັບສິນຂອງປະຊາຊົນ, ເຊິ່ງໄດ້ເຮັດໃຫ້ຜູ້ປະສົບເຄາະຮ້າຍມີຄວາມປອດໄພ ແລະ ໄດ້ຮັບການບັນເທົາທຸກເບື້ອງຕົ້ນ. ດັ້ງນັ້ນ, ກະຊວງ ແຮງງານ ແລະ ສະຫວັດດີການສັງຄົມ ໃນນາມປະທານຄະນະກໍາມະການປ້ອງກັນ ແລະ ຄວບຄຸມໄພພິບັດບັນດາເຜົ່າ ໄດ້ອອກແຈ້ງການສະບັບນີ້ ເຖິງເພື່ອນມິດສະຫາຍຜູ້ຢູ່ໃກ້ ແລະ ຢູ່ໄກ ເພື່ອຂໍການຊ່ວຍເຫຼືອອັນຮີບດ່ວນໃນຄັ້ງນີ້ດ້ວຍ ເປັນຕົ້ນ: ເຂົ້າສານ, ອາຫານ-ນໍໍາດື່ມ, ຢາປົວພະຍາດ, ເຄື່ອງໃຊ້ໃນຄົວເຮືອນ ຫຼື ວັດຖຸເງິນຄໍາ ແລະ ອື່ນໆ.

ສໍາລັບຜູ້ທີ່ປະສົງຢາກປະກອບສ່ວນ ໃນການແກ້ໄຂບັນເທົາທຸກໃນຄັ້ງນີ້ ສາມາດປະກອບສ່ວນດ້ວຍຕົນເອງ ຫຼື ປະສານງານມາຍັງ ກົມສັງຄົມສົງເຄາະ ໃນນາມກອງເລຂາຄະນະກໍາມະການ ປ້ອງກັນ ແລະ ຄວບຄຸມໄພພິບັດ ແຫ່ງຊາດ (ກະຊວງແຮງງານ ແລະ ສະຫວັດດີການສັງຄົມ ຕຶກ 3 ຊັ້ນ) ຫຼື ໂອນເຂົ້າບັນຊີ: ກອງທຶນຊ່ວຍເຫຼືອຜູ້ ປະສົບເຄາະຮ້າຍ ຈາກໄພພິບັດ ກະຊວງແຮງງານ ແລະ ສະຫວັດດີການສັງຄົມ (Fund Assistance to Disaster Victims-Ministry of Labour and Social Welfare) ເລກບັນຊີ:

  1. ບັນຊີສະກຸນເງິນກີບ: 010110001508937001
  2. ບັນຊີສະກຸນເງິນບາດ: 010110201508937001
  3. ບັນຊີສະກຸນເງິນໂດລາ: 010110101508937001

ທ່ານສາມາດຕິດຕໍ່ທາງກົມສັງຄົມສົງ ເຄາະໄດ້ທຸກໆວັນເລີ່ມແຕ່ ເວລາ 07:30 ໂມງ ເປັນຕົ້ນໄປ.
ໂທ: 020 22228154, 020 55622477, 020 59695968, 020 22219355, 020 54864666, 020 22238555, 020 22727273, 021 213005 ແລະ 021 222776.

ເນື່ອງຈາກສະພາບອາກາດ ແລະ ພາຍຸໜູນເຂດຮ້ອນໂພດູ ຫົວທີ 2 ແລະ ລົມພະຍຸດີເປຣຊັນ ຄາຈິກິ ພັດຜ່ານບັນດາແຂວງພາກກາງ ແລະ ພາກໃຕ້ ຂອງ ສປປ.ລາວ ໃນທ້າຍເດືອນສິງຫາ ຫາຕົ້ນ ເດືອນກັນຍາ 2019 ເຮັດໃຫ້ຝົນຕົກໜັກ ແລະ ນ້ໍາຖ້ວມ ຢູ່ 6 ແຂວງ ຄື: ແຂວງ ຄໍາມ່ວນ, ສະຫວັນນະເຂດ, ຈໍາປາສັກ, ສາລະວັນ, ເຊກອງ ແລະ ອັດຕະປື ສົ່ງຜົນກະທົບໂດຍກົງຕໍ່ຊີວິດ ແລະ ຊັບສິນ ທັງພາກລັດ ແລະ ຂອງປະຊາຊົນ, ສ້າງຄວາມເສຍຫາຍ ຕໍ່ທີ່ຢູ່ອາໄສ, ບ້ານເຮືອນ, ພື້ນທີ່ການຜະລິດ, ສັດລ້ຽງ, ເສັ້ນທາງ, ຂົວ, ໂຮງໝໍ, ໂຮງຮຽນ, ສຸກສາລາ, ໄຟຟ້າ, ແຫຼ່ງນ້ໍາກິນ-ນ້ໍາໃຊ້, ອື່ນໆ ເປັນຈໍານວນຫຼວງຫຼາຍ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube