ໄພນ້ຳຖ້ວມ 6 ແຂວງພາກກາງ-ໃຕ້,​ ປະຊາຊົນຫຼາຍແສນຄົນ ຈາກກວ່າ 85,000 ຄອບຄົວໄດ້ຮັບຜົນກະທົບ

ໃນວັນທີ 7 ກັນຍາ 2019 ທ່ານ ທອງລຸນ ສີສຸລິດ ນາຍົກລັດຖະມົນຕີ ພ້ອມດ້ວຍຄະນະ ໄດ້ລົງເຄື່ອນໄຫວຢ້ຽມຢາມ ເພື່ອພົບປະໂອ້ລົມ, ໃຫ້ກຳລັງໃຈພໍ່ແມ່ປະຊາຊົນ ແລະ ຊຸກຍູ້ການແກ້ໄຂໄພນ້ຳຖ້ວມ ຢູ່ແຂວງສະຫວັນນະເຂດ, ສາລະວັນ ແລະ ຈຳປາສັກ.

ການເຄື່ອນໄຫວຂອງທ່ານນາຍົກລັດຖະມົນຕີ ໄດ້ເລີ່ມຕົ້ນດ້ວຍການໄປຢ້ຽມຢາມ ແລະ ພົບປະໂອ້ລົມກັບພໍ່ ແມ່ປະຊາຊົນ ທີ່ໄດ້ຮັບຜົນກະທົບຈາກໄພພິບັດນໍ້າຖ້ວມ ຢູ່ເມືອງຈຳພອນ, ແຂວງສະຫວັນນະເຂດ ໃນນັ້ນ, ໄດ້ຮັບຟັງ ການລາຍງານສະພາບຜົນກະທົບ ແລະ ການແກ້ໄຂໄພພິບັດນໍ້າຖ້ວມ ທີ່ເກີດຂຶ້ນຢູ່ພາຍໃນແຂວງສະຫວັນນະເຂດ ຈາກທ່ານ ສັນຕິພາບ ພົມວິຫານ, ເຈົ້າແຂວງໆສະຫວັນນະເຂດ, ເຊິ່ງເຫັນວ່າ: ທົ່ວແຂວງ ປະສົບໄພນໍ້າຖ້ວມມ ຈຳນວນ ມີ 9 ເມືອງ, 86 ບ້ານ, 29,000 ກວ່າຄອບຄົວ, ນໍ້າຖ້ວມພື້ນເນື້ອທີ່ການຜະລິດ ປະມານ 37,000 ເຮັກຕາ, ໜອງປາ 446 ໜອງ, ສັດລ້ຽງ (ງົວ-ຄວາຍ) ຕາຍ 19 ໂຕ, ລະບົບຊົນລະປະທານ 26 ແຫ່ງ, ເສັ້ນທາງ 48 ເສັ້ນ ແລະ ອື່ນໆ.

ໃນເວລາຕໍ່ມາ, ທ່ານ ນາຍົກລັດຖະມົນຕີ ພ້ອມດ້ວຍຄະນະ ໄດ້ເດີນທາງຢ້ຽມຢາມ, ພົບປະໂອ້ລົມ ແລະ ໃຫ້ກຳລັງໃຈ ແກ່ຜູ້ໄດ້ຮັບຜົນກະທົບຢູ່ເມືອງຄົງເຊໂດນ, ແຂວງສາລະວັນ, ເຊິ່ງເປັນອີກເມືອງໜຶ່ງທີ່ໄດ້ຮັບຜົນກະທົບ ຈາກໄພນ້ຳຖ້ວມ ໜັກໜ່ວງຫຼາຍພໍສົມຄວນ, ເຮັດໃຫ້ເສັ້ນທາງເຊື່ອມຕໍ່ຫາແຂວງຈຳປາສັກ ແລະ ເທດສະບານແຂວງສາລະວັນ ຖືກຕັດຂາດບໍ່ສາມາດສັນຈອນໄປມາໄດ້ ເປັນໄລຍະເວລາ 2-3 ວັນ, ໄດ້ສົ່ງຜົນກະທົບຕໍ່ການດຳລົງຊີວິດຂອງພໍ່ແມ່ປະຊາຊົນຈຳນວນ 71 ບ້ານ, 10,147 ຄອບຄົວ ຖືກຜົນກະທົບຈາກໄພນ້ຳຖ້ວມ; ເນື້ອທີ່ທຳການຜະລິດຖືກນ້ຳຖ້ວມທັງໝົດ 16,900 ເຮັກຕາ, ໃນນີ້ ເນື້ອທີ່ ກະສິກຳເສຍຫາຍ 15,300 ເຮັກຕາ, ເນື້ອທີ່ໜອງປາ 52 ເຮັກຕາ, ເສັ້ນທາງຄົມມະນາຄົມຖືກນ້ຳຖ້ວມ 32 ກິໂລ ແມັດ, ທາງເຂົ້າຫາແຕ່ລະບ້ານຖືກຕັດຂາດ ແລະ ອື່ນໆ.

ຫຼັງຈາກນັ້ນ, ທ່ານນາຍົກລັດຖະມົນຕີ ພ້ອມດ້ວຍຄະນະ ໄດ້ສືບຕໍ່ເດີນທາງໄປຢ້ຽມຢາມ ແລະ ເຄື່ອນໄຫວ ຕິດຕາມເບິ່ງສະພາບນໍ້າຖ້ວມ ແລະ ການແກ້ໄຂຜົນກະທົບທີ່ເກີດຂຶ້ນ ຢູ່ແຂວງຈຳປາສັກ, ເຊິ່ງເຫັນວ່າ: ໃນທົ່ວແຂວງໄດ້ຮັບຜົນກະທົບຈາກໄພນໍ້າຖ້ວມ ຈຳນວນ 396 ບ້ານ, 37,662 ຄອບຄົວ, ພົນລະເມືອງ 176,685 ຄົນ; ບ້ານທີ່ຖືກນໍ້າຖ້ວມ 104 ບ້ານ, ປະຊາຊົນຖືກຍົກຍ້າຍຊົ່ວຄາວ 6,466 ຄອບຄົວ, ລວມຈຳນວນພົນ 40,033 ຄົນ, ເສັ້ນທາງ 281 ກິໂລແມັດ, ເນື້ອທີ່ນາ 34,327 ເຮັກຕາ, ເນື້ອທີ່ສວນ 3,017 ເຮັກຕາ, ລະບົບຊົນລະປະທານ 46 ແຫ່ງ ແລະ ອື່ນໆ.

ສຳລັບແຂວງຄຳມ່ວນ, ອີງຕາມການລາຍງານຂອງໜັງສືພິມແຂວງຄຳມ່ວນໃຫ້ຮູ້ວ່າ: ທົ່ວແຂວງມີຈຳນວນ 6 ເມືອງທີ່ໄດ້ຮັບຜົນກະທົບຈາກໄພພິບັດນ້ຳຖ້ວມ ປະກອບມີ 55 ບ້ານ, ມີພົນລະເມືອງ 50,927 ຄົນ, ຈຳນວນ 10,170 ຫຼັງຄາເຮືອນ, 8,997 ຄອບຄົວ, ມີເນື້ອທີ່ນາທັງໝົດ 15,650 ເຮັດຕາ, ເນື້ອທີ່ປູກພືດ 594 ເຮັກຕາ.

ທ່ານນາຍົກລັດຖະມົນຕີ ໄດ້ສະແດງຄວາມເປັນຫ່ວງເປັນໄຍ, ຖາມເຖິງສະພາບຊີວິດການເປັນຢູ່ຂອງປະຊາຊົນ, ສະພາບນໍ້າຖ້ວມ ແລະ , ຜົນເສຍຫາຍ, ການຊ່ວຍເຫຼືອ ແລະ ແກ້ໄຂບັນຫາຕ່າງໆ, ຄວາມຮຽກຮ້ອງຕ້ອງການອັນຈຳເປັນ ແລະ ອື່ນໆ.

ພ້ອມທັງ ສະແດງຄວາມ ຊົມເຊີຍ ຕໍ່ຄວາມເອົາໃຈໃສ່, ຄວາມສາມັກຄີຮັກແພງ ຂອງອົງການປົກຄອງທ້ອງຖິ່ນ ແລະ ພາກສ່ວນຕ່າງໆ ທີ່ໄດ້ໃຫ້ ການຊ່ວຍເຫຼືອຜູ້ປະສົບໄພນ້ຳຖ້ວມໄດ້ດີ ແລະ ທັນການ ໂດຍສະເພາະ ອ້າຍເອື້ອຍນ້ອງທະຫານ, ເຈົ້າໜ້າທີ່ຕຳຳຫຼວດ, ອາສາສະໝັກກູ້ໄພ, ປະຊາຊົນດ້ວຍກັນ ແລະ ອື່ນໆ ທີ່ໄດ້ປະກອບສ່ວນເຫື່ອແຮງ ແລະ ວັດຖຸສິ່ງຂອງ ເຂົ້າໃນການ ຊ່ວຍເຫຼືອ, ຍົກຍ້າຍປະຊາຊົນ, ລຳລຽງວັດຖຸສິ່ງຂອງທີ່ຈຳເປັນ, ສັດລ້ຽງ… ໄປສູ່ເຂດທີ່ປອດໄພ.

ທ່ານນາຍົກລັດຖະມົນຕີ ໃຫ້ເນັ້ນໜັກໃຫ້ອົງການປົກຄອງທ້ອງຖິ່ນ ແລະ ພາກສ່ວນທີ່ກ່ຽວຂ້ອງ ສືບຕໍ່ເອົາໃຈໃສ່ຕື່ມບາງດ້ານ ເປັນຕົ້ນ ໃຫ້ເອົາໃຈໃສ່ກອບກູ້, ຍົກຍ້າຍປະຊາຊົນ ແລະ ວັດຖຸສິ່ງຂອງ ທີ່ຈຳເປັນໄປຢູ່ທີ່ປອດໄພໃຫ້ໄດ້ທັງໝົດ; ໃຫ້ເອົາໃຈໃສ່ເບິ່ງແຍງດູແລສຸຂະພາບ, ສຸຂະອະນາໄມ ຂອງປະຊາຊົນໃຫ້ດີ, ມີພື້ນຖານໂຄ່ງລ່າງຮັບໃຊ້ (ຫ້ອງນໍ້າ) ລວມທັງ ອຸປະກອນການແພດ ແລະ ຢາປົວພະຍາດ ທີ່ພຽງພໍ, ໃຫ້ມີແພດໝໍບໍລິການດ້ານສາທາລະນາສຸກ ຢ່າງເປັນປົກກະຕິ ແລະ ທົ່ວເຖິງ ໃນແຕ່ລະຈຸດເຕົ້າໂຮມ; ໃຫ້ສະໜອງເຄື່ອງອຸປະໂພກ-ບໍລິໂພກທີ່ຈຳເປັນ ເຊັ່ນ: ອາຫານການກິນ, ນໍ້າດື່ມ-ນໍ້າໃຊ້ ທີ່ສະອາດ, ເຄື່ອງໃຊ້ຂອງສອຍ ແລະ ອື່ນໆ ໃຫ້ແກ່ຜູ້ປະສົບໄພ ຢ່າງພຽງພໍ ແລະ ທັນການ; ການແກ້ໄຂໄພພິບັດ ຕ້ອງມີການຈັດຕັ້ງບັນຊາ, ແບ່ງຄວາມຮັບຜິດຊອບລະອຽດຈະແຈ້ງ, ລົງເລິກຊີ້ນຳໃຫ້ ແທດ ຕົວຈິງ, ມີລະບົບການປະສານງານທີ່ສະດວກ, ວ່ອງໄວ, ມີແຜນການແກ້ໄຂທີ່ດີ, ມີການຕິດຕາມ-ກວດກາ ຢ່າງເປັນປົກກະຕິ, ເມື່ອພົບບັນຫາຍຸ້ງຍາກ ໃຫ້ມີການປຶກສາຫາລືກັນ ຫຼື ຂໍທິດຊີ້ນຳຈາກຂັ້ນເທິງຢ່າງທັນການ, ເດັດຂາດ ບໍ່ໃຫ້ຊັກຊ້າແກ່ຍາວ; ໃຫ້ເອົາໃຈໃສ່ ຕໍ່ວຽກງານການປ້ອງກັນຄວາມສະຫງົບ, ປົກປັກຮັກສາວັດຖຸສິ່ງຂອງ ຂອງປະຊາຊົນ ໃຫ້ດີ, ບໍ່ໃຫ້ມີການສວຍໂອກາດເກີດຂຶ້ນ ໂດຍສະເພາະ ບັນຫາຂີ້ລັກ ແລະ ການຂຶ້ນລາຄາສິນຄ້າທີ່ອາດເກີດຂຶ້ນ; ເອົາໃຈໃສ່ຕ້ານຫາງສຽງບໍ່ດີ ໂດຍສະເພາະ ການໃສ່ຮ້າຍປ້າຍສີ, ການໃຫ້ຂໍ້ມູນທີ່ບໍ່ຖືກ ຕ້ອງກັບຄວາມເປັນຈິງ ກໍ່ຄືການ ສ້າງຄວາມປັ່ນປ່ວນຕ່າງໆ; ເອົາໃຈໃສ່ປຸກລະດົມກຳລັງແຮງພາຍໃນ ກໍ່ຄືທ້ອງຖິ່ນ ເຂົ້າໃນການຊ່ວຍເຫຼືອ ແລະ ແກ້ໄຂບັນຫາໄພພິບັດຄັ້ງນີ້ ຢ່າງມີປະສິດທິຜົນ; ຮີບຮ້ອນຄົ້ນຄວ້າຈັດສັນຫາວັດຖຸສິ່ງຂອງ ທີ່ຈຳເປັນ ເພື່ອຕອບສະໜອງຄວາມຮຽກຮ້ອງຕ້ອງການອັນຮີບດ່ວນ ເປັນຕົ້ນ ອາຫານ, ນ້ຳດື່ມການກິນ, ເຮືອ, ພະຫະນະຮັບໃຊ້, ເຄື່ອງໃຊ້ສອຍຕ່າງໆ, ຢາປົວພະຍາດ… ທີ່ເຫັນວ່າບໍ່ທັນພຽງພໍ ເພື່ອແກ້ໄຂບັນເທົາທຸກ ແລະ ຊ່ວຍເຫຼືອແລະ ປັບປຸງຊີວິດການເປັນ ຢູ່ຂອງປະຊາຊົນ ໃຫ້ກັບຄືນສູ່ສະພາບປົກກະຕິໂດຍໄວ.

ໃນໂອກາດລົງຢ້ຽມຢາມ ແລະ ພົບປະອົງການປົກຄອງທ້ອງຖິ່ນ ແລະ ພໍ່ແມ່ປະຊາຊົນ ຜູ້ປະສົບໄພນໍ້າຖ້ວມ ຄັ້ງນີ້, ທ່ານນາຍຍົກລັດຖະມົນຕີ ໄດ້ມອບເງິນຊ່ວຍເຫຼືອບັນເທົາທຸກໃນເບື້ອງຕົ້ນ ຈຳນວນໜຶ່ງ ໃຫ້ 3 ແຂວງດັ່ງກ່າວ. ສະຫວັນນະເຂດຈຳນວນ 300 ລ້ານກີບ, ແຂວງສາລະວັນ 400 ລ້ານກີບ ແລະ ແຂວງຈຳປາສັກຈຳນວນ 500 ລ້ານກີບ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube