ກຸ່ມຜູ້ປະທ້ວງຮົງກົງຮຽກຮ້ອງໃຫ້ ສ.ອາເມຣິກາ ມາປົດປ່ອຍຮົງກົງ ຈາກການປົກຄອງຂອງ ສປ.ຈີນ

ລາຍງານ 8 ກັນຍາ 2019: ການໂຮມຊຸມນຸມຂອງກຸ່ມຜູ້ປະທ້ວງລັດຖະບານຮົງກົງຫຼາຍພັນຄົນ ທີ່ອອກມາເດີນຂະບວນໄປຍັງໜ້າສະຖານກົງສຸນສະຫະລັດ ອາເມຣິກາ ປະຈຳຮົງກົງ ເພື່ອຮຽກຮ້ອງໃຫ້ທ່ານ ໂດໂນ ທຣຳ ປະທານປະເທດ ສ.ອາເມຣິກາ ຊ່ວຍປົດປ່ອຍຮົງກົງອອກຈາກການປົກຄອງຂອງ ສປ.ຈີນ, ໂດຍມີການປະທ້ວງດ້ວຍຄວາມຮຸນແຮງເຊັ່ນ: ຕັ້ງສິ່ງກີດຂວາງ, ທຳລາຍແວ່ນແກ້ວສະຖານີລົດໄຟຟ້າໃຕ້ດິນ ແລະ ຈູດໄຟເຜົາສິ່ງກີດຂວາງບໍລິເວນທາງເຂົ້າສະຖານີລົດໄຟໃຕ້ດິນ MRT Central ໃນເຂດສູນການຄ້າຂອງຮົງກົງ.

ຈາກການກະທຳດັ່ງກ່າວເຮັດໃຫ້ກຳລັງຕຳຫຼວດຕ້ອງເຄື່ອນເຂົ້າມາຂັດຂວາງ ແລ້ວເກີດການປະທະກັບຜູ້ຊຸມນຸມປະທ້ວງທີ່ດຶກແກວ່ງກ້ອນຫິນໃສ່ຕຳຫຼວດ ກ່ອນທີ່ຈະກະຈາຍກຳລັງຫຼົບໜີໄປໃນເຂດໃກ້ຄຽງ ດັ່ງນັ້ນ, ຕຳຫຼວດຈຶ່ງຕັດສິນໃຈຍິງແກັດນ້ຳຕາ ເພື່ອສະຫຼາຍການຊຸມນຸມ, ນອກນີ້ຍັງໄດ້ຈັບກຸມຜູ້ຊຸມນຸມປະທ້ວງຈຳນວນໜຶ່ງ.

ການປະທ້ວງດັ່ງກ່າວໄດ້ກ້າວເຂົ້າສູ່ອາທິດທີ 14 ແລ້ວເພື່ອຕໍ່ຕ້ານລັດຖະບານຮົງກົງ ພາຍຫຼັງທີ່ສະເໜີຮ່າງກົດໝາຍສົ່ງຜູ້ຮ້າຍຂ້າມແດນເຂົ້າສູ່ການພິຈາລະນາຂອງສະພາ ເມື່ອເດືອນມິຖຸນາ ທີ່ຜ່ານມາ, ແຕ່ໃນທີ່ສຸດທ່ານ ນາງ ແຄຣີ ແລມ ຜູ້ບໍລິຫານສູງສຸດຂອງຮົງກົງໄດ້ຕັດສິນໃຈຖອດຖອນຮ່າງກົດໝາຍດັ່ງກ່າວອອກໄປແລ້ວ ເຊິ່ງເປັນໜຶ່ງໃນຫ້າຂໍ້ຮຽກຮ້ອງຂອງກຸ່ມຜູ້ຊຸມນຸມ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube