ຈີນເຕືອນ ໃຜກໍ່ຕາມທີ່ບັງອາດແບ່ງແຍກຮົງກົງ ຈະຖືກບີບບົດໂດຍບໍ່ເຫຼືອຊາກ

ລາຍງານ 9 ກັນຍາ 2019: ບົດບັນນາທິການປະຈຳວັນຈັນນີ້ ຂອງໜັງສືພິມປະຊາຊົນຈີນ ກະບອກສຽງຂອງພັກຄອມມູນິດຈີນ ມີເນື້ອໃນສຳຄັນວ່າ ຮົງກົງເປັນດິນແດນສ່ວນໜຶ່ງຂອງ ສປ.ຈີນ, ໝາຍຄວາມວ່າ ບໍ່ສາມາດແບ່ງແຍກຈາກກັນໄດ້ຢ່າງເດັດຂາດ ແລະ ເປັນເສັ້ນຕາຍສຳຄັນທີ່ບຸກຄົນໃດກໍ່ຕາມບໍ່ຄວນທ້າທາຍລັດຖະບານຈີນ ບໍ່ວ່າຈະເປັນຜູ້ປະທ້ວງຕໍ່ຕ້ານລັດຖະບານຮົງກົງ ຫຼື ກອງກຳລັງຕ່າງຊາດທີ່ກຳລັງແຊກແຊງດ້ວຍແຜນການອັນບໍ່ດີຢູ່ໃນຕອນນີ້, ການໂຮມຊຸມນຸມປະທ້ວງໃນຮົງກົງມີທ່າອ່ຽງປ່ຽນປະເດັນຈາກບັນຫາສິດທິ ແລະ ເສລີພາບຕາມຫຼັກປະຊາທິປະໄຕ ໄປເປັນການເຄື່ອນໄຫວ ແລະ ສ້າງຄວາມຮຸນແຮງຢ່າງຕໍ່ເນື່ອງ ອັນເປັນຜົນມາຈາກການແຊກແຊງຂອງກອງກຳລັງຕ່າງປະເທດ.

ເຊິ່ງ ສປ.ຈີນ ຂໍຢ້ຳວ່າການທີ່ລັດຖະບານ ສປ.ຈີນ ຍັງບໍ່ເຄື່ອນໄຫວໃດໆ ບໍ່ໄດ້ໝາຍຄວາມວ່າບໍ່ຮັບຮູ້ ຫຼື ອ່ອນແອ, ແຕ່ຂໍປະກາດໄວ້ໃນທີ່ນີ້ວ່າ ຄວາມພະຍາຍາມໃດກໍ່ຕາມທີ່ຈະແບ່ງແຍກດິນແດນ ຫຼື ປະກາດອິດສະຫຼະພາບໃຫ້ກັບຮົງກົງ ຈະຖືກບີບບົດໂດຍບໍ່ເຫຼືອຊາກ, ຂະນະທີ່ສຳນັກຂ່າວຊິນຫົວລາຍງານໃນວັນດຽວກັນວ່າ ຫາກສະຖານະການຍັງຄົງເປັນແບບນີ້ຕໍ່ໄປ ຮົງກົງຈະໄດ້ຮັບບົດຮຽນຄັ້ງອັນໃຫຍ່ຫຼວງ ໂດຍບໍ່ໄດ້ລະບຸຊັດເຈນວ່າໝາຍເຖິງສະເພາະຜູ້ປະທ້ວງຫົວຮຸນແຮງ ຫຼື ສະຖານະການຂອງຮົງກົງໃນພາບລວມ.

ລາຍງານດັ່ງກ່າວຂອງສື່ຫຼັກທາງການຈີນທັງສອງແຫ່ງ ເກີດຂຶ້ນພາຍຫຼັງທີ່ຊາວຮົງກົງຫຼາຍພັນຄົນ ເດີນຂະບວນໄປໂຮມຊຸມນຸມຢູ່ໜ້າສະຖານກຸງສຸນໃຫຍ່ສະຫະລັດ ອາເມຣິກາ ໃນຮົງກົງ ຮຽກຮ້ອງໃຫ້ລັດຖະບານ ສ.ອາເມຣິກາຂອງທ່ານ ໂດໂນ ທຣຳ ຊ່ວຍປົດປ່ອຍຮົງກົງ, ໂດຍສະເພາະການຮຽກຮ້ອງໃຫ້ສະພາ ສ.ອາເມຣິກາ ຜ່ານຮ່າງກົດໝາຍ ວ່າດ້ວຍການສະໜັບສະໜູນປະຊາທິປະໄຕ ແລະ ສິດທິມະນຸດໃນຮົງກົງ ເຊິ່ງຈີນປະນາມຢ່າງໜັກວ່າເປັນການອອກກົດໝາຍເພື່ອແຊກແຊງວຽກງານພາຍໃນຂອງປະເທດອື່ນຢ່າງຈະແຈ້ງ.

ຂະນະທີ່ ສ.ອາເມຣິກາ ຍັງບໍ່ສະແດງທ່າທີໃດໆຕໍ່ການໂຮມຊຸມນຸມຂອງຊາວຮົງກົງໃນຄັ້ງນີ້ ເຊິ່ງຖືເປັນອາທິດທີ 14 ແລ້ວ, ແຕ່ເຖິງຢ່າງໃດກໍ່ຕາມໄດ້ມີຕົວແທນຈາກສະຖານກົງສຸນໃຫຍ່ ສ.ອາເມຣິກາ ອອກມຮັບໜັງສືຮ້ອງຂໍຂອງຝ່າຍຕໍ່ຕ້ານລັດຖະບານຮົງກົງ ແລະ ໃນຊ່ວງ້ທາຍຂອງການຈັດກິດຈະກຳດັ່ງກ່າວກໍ່ໄດ້ເກີດຄວາມຮຸນແຮງຂຶ້ນ ເມື່ອກຸ່ມຜູ້ປະທ້ວງຈຳນວນໜຶ່ງໄດ້ຈູດໄຟເຜົາ ແລະ ທຳລາຍປະຕູທາງເຂົ້າສະຖານີລົດໄຟໃຕ້ດິນ Central ເຊິ່ງຕັ້ງຢູ່ໃກ້ກັບສະຖານກົງສຸນໃຫຍ່ ສ.ອາເມຣິກາ ແລະ ບໍລິເວນນັ້ນເປັນໜຶ່ງໃນເຂດການຄ້າ ກາຍເປັນຊະນວນໃຫ້ເກີດການປະທະກັນຢ່າງດຸເດືອດອີກຄັ້ງລະຫວ່າງຜູ້ປະທ້ວງກັບຕຳຫຼວດປາບຈາລະຈົນ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube