ລາວ-ກຳປູເຈຍ ເລັ່ງຮ່າງຂໍ້ກຳນົດຮ່ວມ ເພື່ອຂໍແຜນທີ່ຈາກຝຣັ່ງ ມາແກ້ໄຂບັນຫາຊາຍແດນຢ່າງສັນຕິ

ລາຍງານ 9 ກັນຍາ 2019 ໂດຍອີງຕາມການລາຍງານຂອງກະຊວງການຕ່າງປະເທດໃຫ້ຮູ້ວ່າ ທ່ານ ສະເຫຼີມໄຊ ກົມມະສິດ ລັດຖະມົນຕີກະຊວງການຕ່າງປະເທດ ໄດ້ຕ້ອນຮັບການຢ້ຽມຢາມເຮັດວຽກຂອງຄະນະຜູ້ແທນກຳປູເຈຍ ນຳໂດຍທ່ານ ປຼາກ ໂຊຄົນ ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແລະ ຮ່ວມມືສາກົນແຫ່ງລາຊະອານາຈັກກຳປູເຈຍ ເມື່ອວັນທີ 6 ກັນຍາ ທີ່ຜ່ານມາ.

ໂດຍການຢ້ຽມຢາມຄັ້ງນີ້ ແມ່ນເພື່ອປຶກສາຫາລື ແລະ ແລກປ່ຽນຄຳຄິດຄຳເຫັນກ່ຽວກັບການກະກຽມໃຫ້ແກ່ການຢ້ຽມຢາມກຳປູເຈຍຢ່າງເປັນທາງການຂອງທ່ານ ທອງລຸນ ສີສຸລິດ ນາຍົກລັດຖະມົນຕີ ໃນລະຫວ່າງວັນທີ 12-13 ກັນຍານີ້.

ພ້ອມກັນນັ້ນ ທັງສອງຝ່າຍໄດ້ສືບຕໍ່ປະຕິບັດຕາມການຕົກລົງຂອງສອງນາຍົກລັດຖະມົນຕີລາວ-ກຳປູເຈຍ ກ່ຽວກັບຮ່າງຂໍ້ກຳນົດຮ່ວມ (TOR) ວ່າດ້ວຍການສະເໜີຂໍໃຫ້ລັດຖະບານຝຣັ່ງ ສົ່ງຊ່ຽວຊານມາຊ່ວຍຖ່າຍທອດແຜນທີ່ ແລະ ສະໜອງເອກະສານທາງການ ແລະ ແຜນທີ່ທີ່ກ່ຽວຂ້ອງໃຫ້ລາວ ແລະ ກຳປູເຈຍ ເພື່ອເປັນບ່ອນອີງໃຫ້ແກ່ການແກ້ໄຂບັນຫາຊາຍແດນທີ່ຄົງຄ້າງ, ເຊິ່ງທັງສອງຝ່າຍຍັງບໍ່ທັນໄດ້ສຳຫຼວດ ແລະ ປັກຫຼັກໝາຍຊາຍແດນຮ່ວມກັນນັ້ນໃຫ້ສຳເລັດໂດຍໄວ ເພື່ອສ້າງຊາຍແດນລະຫວ່າງສອງປະເທດໃຫ້ເປັນຊາຍແດນແຫ່ງສັນຕິພາບ, ມິດຕະພາບ ແລະ ການຮ່ວມມື.

ກ່ອນກອງປະຊຸມ, ທ່ານ ປຼາກ ໂຊຄົນ ໄດ້ນຳຄະນະເຂົ້າຢ້ຽມຂ່ຳນັບທ່ານ ທອງລຸນ ສີສຸລິດ ທີ່ສຳນັກງານນາຍົກລັດຖະມົນຕີ ດ້ວຍບັນຍາກາດແຫ່ງໄມຕີຈິດມິດຕະພາບ ແລະ ຄວາມເຂົ້າອົກເຂົ້າໃຈເຊິ່ງກັນ ແລະ ກັນເປັນຢ່າງດີ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube