ສປປ.ລາວ ຈະຂາຍໄຟຟ້າໃຫ້ມາເລເຊຍ ຜ່ານປະເທດໄທ ເພີ່ມເປັນ 300 ເມກາວັດ

ລາຍງານ 10 ກັນຍາ 2019: ໃນກອງປະຊຸມລັດຖະມົນຕີອາຊຽນດ້ານພະລັງງານ ຄັ້ງທີ 57 ແລະ ກອງປະຊຸມອື່ນທີ່ກ່ຽວຂ້ອງ (ASEAN Ministers on Energy Meeting and Associate Meeting: 37th AMEM) ທີ່ນະຄອນຫຼວງບາງກອກ, ປະເທດໄທ ລະຫວ່າງວັນທີ 2-6 ກັນຍາ ທີ່ຜ່ານມາ, ທ່ານ ສົນທິຣັດ ສົນທິຈິຣະວົງ ລັດຖະມົນຕີກະຊວງພະລັງງານຂອງໄທ, ທ່ານ ຄຳມະນີ ອິນທິລາດ ລັດຖະມົນຕີກະຊວງພະລັງງານ ແລະ ບໍ່ແຮ່ຂອງລາວ ແລະ ທ່ານ ນາງ ຢິວ ບີ ຢິນ ລັດຖະມົນຕີກະຊວງພະລັງງານ, ວິທະຍາສາດ, ເຕັກໂນໂລຊີ, ສິ່ງແວດລ້ອມ ແລະ ການປ່ຽນແປງສະພາບອາກາດຂອງມາເລເຊຍ ໄດ້ຮ່ວມຖະແຫຼງຂ່າວການຂະຫຍາຍການຮ່ວມມື ໃນການເຊື່ອມໂຍງພະລັງງານໄຟຟ້າລະຫວ່າງ ສປປ.ລາວ, ໄທ ແລະ ມາເລເຊຍ (Lao PDR, Thailand, Malaysia -Power Integration Project:LTM-PIP).

ທ່ານ ສົນທິຣັດ ສົນທິຈິຣະວົງ ກ່າວວ່າທັງສາມປະເທດເຫັນດີໃນການຖະແຫຼງຮ່ວມ ວ່າດ້ວຍໂຄງການເຊື່ອມໂຍງດ້ານໄຟຟ້າລະຫວ່າງ ສປປ.ລາວ, ໄທ ແລະ ມາເລເຊຍ ໄລຍະທີ 2 ໂດຍຂະຫຍາຍສັນຍາຊື້-ຂາຍໄຟຟ້າເພີ່ມອີກ 2 ປີ ແລະ ເພີ່ມປະລິມານການຊື້-ຂາຍສູງສຸດເປັນ 300 ເມກາວັດ ຈາກເດີມ 100 ເມກາວັດ ທັງນີ້ໄດ້ມີການຮ່ວມກັນຮ່າງສັນຍາຊື້-ຂາຍໄຟຟ້າສະບັບເພີ່ມເຕີມ (Supplememtary Agreement) ຂອງສັນຍາຊື້-ຂາຍໄຟຟ້າ (Energy Purchase and Wheeling Agreement) ເຊິ່ງໄທຈະໄດ້ນຳຮ່າງເອກະສານເຂົ້າຂໍຮັບຄວາມເຫັນຊອບຕາມຂະບວນການພາຍໃນ ເຊິ່ງຄາດວ່າຈະມີການລົງນາມພາຍໃນປີ 2019 ນີ້.

ໂຄງການ LTM-PIP ໄດ້ມີການລົງນາມໃນສັນຍາຊື້-ຂາຍໄຟຟ້າ ໂດຍຜູ້ອຳນວຍການລັດວິສາຫະກິດໄຟຟ້າຂອງທັງສາມປະເທດ ແລະ ມີລັດຖະມົນຕີກະຊວງພະລັງງານຂອງທັງສາມປະເທດເປັນສັກຂີພິຍານ ໃນລະຫວ່າງກອງປະຊຸມ AMEM ຄັ້ງທີ 35 ລະຫວ່າງວັນທີ 25-29 ກັນຍາ 2017 ທີ່ປະເທດຟິລິບປິນ ແລະ ໄດ້ມີການຊື້-ຂາຍໄຟຟ້າຕາມສັນຍາລະບຸ 1 ມັງກອນ 2018-31 ທນວາ 2019 ໂດຍກຳນົດປະລິມານສູງສຸດ 100 ເມກະວັດ ຕໍ່ມາໃນກອງປະຊຸມ AMEM ຄັ້ງທີ 36 ທີ່ປະເທດສິງກະໂປ ລັດຖະມົນຕີພະລັງງານຂອງທັງສາມປະເທດໄດ້ເຫັນດີຮ່ວມກັນ ໃຫ້ມີການສຶກສາຄວາມເປັນໄປໄດ້ສຳລັບໂຄງການ LTM-PIP ໄລຍະທີ 2 ໂດຍເພີ່ມປະລິມານການຊື້-ຂາຍສູງສຸດເປັນ 300 ເມກາວັດ ເຊິ່ງຕໍ່ມາຄະນະປະຕິບັດງານໄດ້ເຫັນດີໃຫ້ມີການເຮັດຮ່າງສັນຍາຊື້-ຂາຍໄຟຟ້າເພີ່ມເຕີມ ຄາດວ່າຈະສາມາດລົງນາມຮ່ວມກັນ 3 ປະເທດໄດ້ພາຍໃນທ້າຍປີນີ້.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube