ສະຖານທູດ ສ.ອາເມຣິກາ ໃນນະຄອນຫຼວງກາບູນ ຖືກໂຈມຕີດ້ວຍຈະຫຼວດ

ລາຍງານ 11 ກັນຍາ 2019: ເກີດເຫດລະເບີດໃນສະຖານທູດສະຫະລັດ ອາເມຣິກາ ທີ່ນະຄອນຫຼວງກາບູນ ປະເທດອາຟະການິດສະຖານ ເມື່ອທ່ຽງຄືນທີ່ກ້າວເຂົ້າສູ່ວັນທີ 11 ກັນຍາ, ໄດ້ເຮັດໃຫ້ເກີດກຸ່ມຄວັນ ທີ່ສາມາດສັງເກດເຫັນໄດ້ໃນໄລຍະໄກ, ໂດຍໃນຂະນະທີ່ເກີດເຫດໄດ້ມີສຽງສັນຍານເຕືອນໄພພາຍໃນສະຖານທູດດັ່ງຂຶ້ນ ພ້ອມມີສຽງປະກາດຜ່ານລຳໂພງແຈ້ງວ່າ ເກີດການລະເບີດຂຶ້ນ ເພາະມີຈະຫຼວດຍິງຕົກມາໃນບໍລິເວນສະຖານທູດ ແລະ ໜຶ່ງຊົ່ວໂມງຫຼັງຈາກນັ້ນມີປະກາດແຈ້ງ ວ່າໄດ້ກວດສອບແລ້ວ ທຸກຢ່າງປອດໄພ ບໍ່ມີຜູ້ບາດເຈັບ ແຕ່ກໍ່ຍັງບໍ່ມີຄວາມເຫັນຈາກເຈົ້າໜ້າທີ່ຂອງລັດຖະບານອາຟະການິດສະຖານ ແລະ ອົງການ NATO ທີ່ປະຈຳການຢູ່ບໍລິເວນໃກ້ຄຽງ.

ຖືເປັນການໂຈມຕີຄັ້ງທຳອິດ ໃນນະຄອນຫຼວງກາບູນ ພາຍຫຼັງທີ່ທ່ານ ໂດໂນ ທຣຳ ປະທານປະເທດ ສ.ອາເມຣິກາ ໄດ້ຍົກເລີກການເຈລະຈາກັບກຸ່ມຕາລີບັນ ເພື່ອກ້າວໄປສູ່ການບັນລຸຂໍ້ຕົກລົງຢຸດຕິສົງຄາມອັນຍາວນານຂອງສະຫະລັດ ອາເມຣິກາ ໃນອາຟະການິດສະຖານ.

ນອກຈາກນີ້, ການໂຈມຕີດັ່ງກ່າວ ຍັງກົງກັບເຫດການກໍ່ການຮ້າຍຂີ່ຍົນຕຳຕຶກໃນ ສ.ອາເມຣິກາ ເມື່ອວັນທີ 11 ກັນຍາ 2001 ເຊິ່ງຖືວ່າເປັນເລື່ອງທີ່ລະອຽດອ່ອນ ເພາະໜຶ່ງໃນການໂຈມຕີທີ່ເກີດຂຶ້ນ ໄດ້ນຳມາສູ່ການທີ່ກອງທັບ ສ.ອາເມຣິກາ ນຳກຳລັງຮຸກຮານອາຟະການິດສະຖານ ເພື່ອໂຄ່ນລົ້ມກຸ່ມຕາລີບັນ ຖານໃຫ້ທີ່ພັກເຊົາແກ່ທ່ານ ໂອຊາມາ ບິນ ລາເດນ ຫົວໜ້າກຸ່ມກໍ່ການຮ້າຍອັນ-ກໍອິດະ ຜູ້ຢູ່ເບື້ອງຫຼັງການໂຈມຕີໃນຄັ້ງນັ້ນ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube