ຈີນຖາມ ສ.ອາເມຣິກາ ຫາກມີການປະທ້ວງທີ່ຮຸນແຮງຄືໃນຮົງກົງຢູ່ ສ.ອາເມຣິກາ ຈະແກ້ໄຂແນວໃດ

ລາຍງານ 12 ກັນຍາ 2019, ທ່ານ ນາງ ຫົວ ຊຸນຫຍິງ ໂຄສົກກະຊວງການຕ່າງປະເທດຂອງຈີນ ກ່າວໃນຕອນໜຶ່ງຂອງການຖະແຫຼງ ເມື່ອວັນພຸດ ທີ່ຜ່ານມາ ໂດຍການຄັ້ງຄຳຖາມໄປຍັງສະຫະລັດ ອາເມຣິກາ ວ່າຫາກສະຖານະການຄວາມຮຸນແຮງທີ່ກຳລັງດຳເນີນຢູ່ໃນຮົງກົງ ເກີດຂຶ້ນໃນເມືອງໃດເມືອງໜຶ່ງຂອງ ສ.ອາເມເຣິກາ ລັດຖະບານ ສ.ອາເມຣິກາຈະດຳເນີນການດ້ວຍຮູບແບບໃດ, ພ້ອມທັງກ່າວເຖິງການແກ້ໄຂບັນຫາການປະທ້ວງທາງການເມືອງຂອງຄົນຜິວສີ ແລະ ກຸ່ມນິຍົມຜິວຂາວ ທັງໃນເມືອງບໍຕິມໍ, ລັດແມຣິແລນ ເມື່ອປີ 2015 ແລະ ເມືອງພອດແລນ ລັດອໍຣິກອນ ເມື່ອເດືອນທີ່ຜ່ານມາ ຕະຫຼອດຮອດເຫດການ Occupy Wall Street ໃນນະຄອນນິວຢອກ ເມື່ອປີ 2011 ວ່າຄົງຈະໜ້າປະທັບໃຈຕໍ່ສາຍຕາຊາວໂລກ.

ຄຳຖະແຫຼງດັ່ງກ່າວຂອງໂຄສົກກະຊວງການຕ່າງປະເທດຂອງຈີນ ຄືການຕອບໂຕ້ຕໍ່ການທີ່ສະມາຊິກສະພາຜູ້ແທນປະຊາຊົນກຸ່ມໜຶ່ງຂອງ ສ.ອາເມຣິກາ ສະເໜີຮ່າງກົດໝາຍປົກປ້ອງຮົງກົງ ວ່າດ້ວຍການຫ້າມຜູ້ປະກອບການໃນປະເທດສົ່ງອອກອຸປະກອນຄວບຄຸມຝູງຊົນທີ່ບໍ່ເປັນອັນຕະລາຍເຖິງຊີວິດ ໃຫ້ແກ່ຕຳຫຼວດຮົງກົງ, ໂດຍສະເພາະແກັດນ້ຳຕາ, ກະບອງ, ໂລ້ ແລະ ຊຸດປ້ອງກັນສຳລັບຕຳຫຼວດປາບຈະລາຈົນ, ເຊິ່ງຫາກຮ່າງກົດໝາຍຜ່ານການລົງມະຕິຈາກທັງຈາກສະພາລ່າງ ແລະ ສະພາສູງ ແລະ ທ່ານ ໂດໂນ ທຣຳ ລົງນາມຮັບຮອງ ກົດໝາຍຈະມີຜົນບັງຄັບໃຊ້ພາຍໃນ 30 ວັນ, ນອກຈາກນີ້ ກົດໝາຍຍັງລະບຸໃຫ້ກະຊວງການຕ່າງປະເທດ ສ.ອາເມຣິກາຕ້ອງສົ່ງລາຍງານຕໍ່ສະພາ ຊີ້ແຈງລາຍການອຸປະກອນປາບປາມຈະລາຈົນທີ່ສົ່ງອອກໄປຍັງຮົງກົງຄືນຫຼັງ 5 ປີ ກ່ອນກົດໝາຍມີຜົນບັງຄັບໃຊ້ອີກດ້ວຍ, ຂະນະທີ່ສຳນັກງານຕຳຫຼວດຮົງກົງອອກຖະແຫຼງການຕໍ່ກັບບັນຫາດັ່ງກ່າວນີ້ວ່າ ຫາກເກີດຂຶ້ນຈິງ ກໍ່ສາມາດຫາຊື້ຈາກແຫຼ່ງອື່ນໄດ້.

ນອກຈາກນີ້, ໂຄສົກກະຊວງການຕ່າງປະເທດຂອງຈີນ ຍັງກ່າວວ່າການທີ່ສະພາ ສ.ອາເມຣິກາ ພິຈາລະນາຮ່າງກົດໝາຍດັ່ງກ່າວ ສະທ້ອນການຂາດຄວາມເຂົ້າໃຈໃນປະຫວັດສາດ ແລະ ສະຖານະການທີ່ເກີດຂຶ້ນຈິງໃນຮົງກົງ, ທັງຍັງເປັນການຂັດຂວາງການປະຕິບັດງານຂອງເຈົ້າໜ້າທີ່ຕຳຫຼວດຮົງກົງ ເຊິ່ງກຳລັງພະຍາຍາມຢ່າງສຸດຄວາມສາມາດໃນການຟື້ນຟູຄວາມສະຫງົບ ກ່ອນກ່າວປິດທ້າຍວ່າ ວຽກງານພາຍໃນຂອງຮົງກົງກໍ່ຄືວຽກງານພາຍໃນຂອງ ສປ.ຈີນ ພ້ອມທັງຍົກຄຳເວົ້າຂອງປະມານເໝົາ ເຈີຕົງ ວ່າ “ມົດໂຕໜຶ່ງຢູ່ເທິງຍອດຕົ້ນໄມ້ທີ່ກຳລັງໂອນກວາຍ ອວດອ້າງວ່າຕົນເປັນໃຫຍ່ ແຕ່ມັນກໍ່ບໍ່ອາດຫ່ອນສັ່ນຄອນຕົ້ນໄມ້ໄດ້ທັງຕົ້ນ”


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube