ອາຊຽນມອບເຄື່ອງຊ່ວຍເຫຼືອໄພພິບັດນ້ຳຖ້ວມ 6 ແຂວງພາກກາງ-ພາກໃຕ້ ຂອງ ສປປ.ລາວ

ກະຊວງແຮງງານ ແລະ ສະຫວັດດີການສັງຄົມລາຍງານໃຫ້ຮູ້ວ່າ ໃນວັນທີ 12 ກັນຍາ 2019 ນີ້ ທີ່ນະຄອນຫລວງວຽງຈັນ, ສູນປະສານງານຊ່ວຍເຫຼືອດ້ານມະນຸດສະທຳອາຊຽນ ປະຈຳຢູ່ອິນໂດເນເຊຍ ໄດ້ນຳເຄື່ອງແຮສຸກເສີນສຳລັບຊ່ວຍເຫຼືອໄພພິບັດຂອງອາຊຽນ ຢູ່ປະເທດມາເລເຊຍ ມາມອບໃຫ້ ສປປ.ລາວ ເພື່ອນຳໄປຊ່ວຍເຫຼືອປະຊາຊົນທີ່ຖືກຜົນກະທົບຈາກໄພພິບັດນ້ຳຖ້ວມຢູ່ບັນດາແຂວງພາກກາງ ແລະ ພາກໃຕ້ຂອງລາວ.

ເຄື່ອງຊ່ວຍເຫຼືອດັ່ງກ່າວປະກອບມີ: ເຄື່ອງໃຊ້ຄົວເຮືອນຈຳນວນ 330 ແກັດ, ເຄື່ອງສຸຂະອາໄມ 2,596 ແກັດ, ເຄື່ອງເຮືອນຄົວ 1,144 ແກັດ, ມຸ້ງ 1,400 ດາງ ແລະ ກະຕຸກນ້ຳແບບພັບໄດ້ຈຳນວນ 1,400 ຕຸກ.

ເຄື່ອງດັ່ງກ່າວ ມາຮອດສະໜາມບິນສາກົນວັດໄຕ ດ້ວຍເຮືອນບິນກອງທັບອາກາດມາເລເຊຍ ໃນເວລາ 13:00 ໂມງ, ເຊິ່ງຕາງໜ້າກ່າວມອບໂດຍ ທ່ານ ນາງ ອາເດລີນາ ກາເມວ ຫົວໜ້າສູນປະສານງານຊ່ວຍເຫຼືອດ້ານມະນຸດສະທຳອາຊຽນ ແລະ ຕາງໜ້າລັດຖະບານລາວກ່າວຮັບໂດຍ ທ່ານ ວິໄລພົງ ສີສົມຫວັງ ວ່າການຫົວໜ້າກົມສັງຄົມສົງເຄາະ, ກະຊວງແຮງງານ ແລະ ສະຫວັດດີການສັງຄົມ.

ສຳລັບເຄື່ອງຊ່ວຍເຫຼືອ ແມ່ນຈະໄດ້ນຳໄປມອບໃຫ້ບັນດາແຂວງທີ່ໄດ້ຮັບຜົນກະທົບເຊິ່ງປະກອບມີ: ແຂວງຄໍາມ່ວນ, ສະຫວັນນະເຂດ, ສາລະວັນ, ເຊກອງ, ຈຳປາສັກ ແລະ ອັດຕະປື.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube