ໂຮງກັ່ນນ້ຳມັນ 2 ແຫ່ງຂອງຊາອູດິດ ຖືກກອງກຳລັງຕິດອາວຸດຮູຕີໂຈມຕີດ້ວຍໂດຣນ

ລາຍງານ 15 ກັນຍາ 2019 ໂດຍອີງຕາມການລາຍງານຂອງ SPA ສຳນັກຂ່າວແຫ່ງຊາດອາຣັບບີ ຊາອູດິດ ໄດ້ເຜີຍແຜ່ຖະແຫຼງການຂອງເຈົ້າຊານອາລດຸນລາຊິສ ບິນ ຊາລມານ ລັດຖະມົນຕີກະຊວງພະລັງງານອາຣັບບີ ຊາອູດິດ ວ່າບໍລິສັດຊາອູດິອາຣາມໂກ ລັດວິສາຫະກິດດ້ານພະລັງງານລາຍໃຫຍ່ທີ່ສຸດຂອງປະເທດ ໄດ້ຕັດສິນໃຈລະງັບການຜະລິດທີ່ໂຮງກັ່ນອັບກາອິກ ແລະ ຄູຣານິສ ເຊິ່ງເປັນນິຄົມການຜະລິດນ້ຳມັນດິບຂະໜາດໃຫຍ່ຂອງຊາອູດິອາຣາມໂກ ຕັ້ງຢູ່ທາງຝັ່ງຕາເວັນອອກຂອງປະເທດ ໂດຍການລະງັບການຜະລິດຢ່າງບໍ່ມີກຳນົດຄັ້ງນີ້ ຄິດໄລ່ເປັນປະລິມານປະມານ 5.7 ລ້ານບາເຣວ ແລະ ຈະສົ່ງຜົນຕໍ່ປະລິມານການຜະລິດ 50% ຂອງປະລິມານການກັ່ນນ້ຳມັນດິບໃນອາຣັບບີ ຊາອູດິດໂດຍສະເລ່ຍຕໍ່ວັນ.

ການເຄື່ອນໄຫວດັ່ງກ່າວ ເກີດຂຶ້ນພາຍຫຼັງທີ່ຝູງໂດຣນ ບໍ່ຕ່ຳກວ່າ 10 ລຳໂຈມຕີໂຮງກັ່ນທັງສອງແຫ່ງຫຼາຍຄັ້ງ ເມື່ອຕອນເຊົ້າມືດຂອງວັນເສົາ ທີ່ຜ່ານມາ ສົ່ງຜົນໃຫ້ເກີດການລະເບີດ ແລະ ໄຟລຸກໄໝ້ໄປທົ່ວບໍລິເວນ, ເຖິງແມ່ນວ່າພາຍຫຼັງເກີດເຫດກອງກຳລັງຕິດອາວຸດຮູຕີ ທີ່ຍຶດຄອງນະຄອນຫຼວງຊານາ ປະເທດເຢເມນເປັນເຂດທີ່ໝັ້ນມາຕັ້ງແຕ່ເດືອນກັນຍາ 2014 ໄດ້ປະກາດວ່າເປັນຜູ້ປະຕິບັດການໂຈມຕີດັ່ງກ່າວ ແລະ ຢືນຢັນວ່າຈະໂຈມຕີຊັບສິນດ້ານນ້ຳມັນດິບຂອງອາຣັບບີ ຊາອູດິດອີກ ຫາກອີກຝ່າຍັງບໍ່ຢຸດຕິປະຕິບັດການທາງທະຫານໃນເຢເມນ.

ເຖິງຢ່າງໃດກໍ່ຕາມ, ລັດຖະບານສະຫະລັດ ອາເມຣິກາບໍ່ເຊື່ອເຊັ່ນນັ້ນ, ໂດຍທ່ານ ໄມ ພອມແພວ ລັດຖະມົນຕີກະຊວງການຕ່າງປະເທດ ສ.ອາເມຣິກາ ກ່າວວ່າຜູ້ຢູ່ເບື້ອງຫຼັງຕົວຈິງຂອງການກໍ່ເຫດຄັ້ງນີ້ຄື “ອີຣານ“ ຜ່ານປະຕິບັດການຂອງຕົວແທນຄືກະບົດຮູຕີ ແລະ ຮຽກຮ້ອງປະຊາຄົມໂລກຮ່ວມກັນປະນາມເຫດການທີ່ເກີດຂຶ້ນ.

ໃນດ້ານຂອງລັດຖະບານອີຣານ ຍັງບໍ່ສະແດງທ່າທີຕໍ່ຂໍ້ກ່າວຫາຂອງທ່ານ ໄມ ພອມແພວ ເຊິ່ງມີທິດທາງຈະຫຼຸດຄວາມເປັນໄປໄດ້ໃນການພົບປະລະຫວ່າງທ່ານ ໂດໂນ ທຣຳ ປະທານປະເທດ ສ.ອາເມຣິກາ ກັບທ່ານ ຮັສຊັນ ໂຣຮານີ ຜູ້ນຳອີຣານ ນອກຮອບການປະຊຸມສະມັດຊາໃຫຍ່ສະຫະປະຊາຊາດ ທີ່ນະຄອນນິວຢອກ ສ.ອາເມຣິກາ ໃນຊ່ວງທ້າຍເດືອນນີ້.

ເຊິ່ງໂຮງກັ່ນອັບກາອິກ ເຄີຍຕົກເປັນເປົ້າໝາຍຂອງການໂຈມຕີໂດຍກຸ່ມອັນ-ກໍອິດະມາແລ້ວ ເມື່ອປີ 2006 ໂດຍການລະເບີດຂ້າຕົວຕາຍ ສົ່ງຜົນໃຫ້ເຈົ້າໜ້າທີ່ຮັກສາຄວາມປອດໄພເສຍຊີວິດ 2 ຄົນ ນອກເໜືອຈາກມືລະເບີດ, ຂະນະທີ່ກະຊວງພາຍໃນຂອງອາຣັບບີ ຊາອູດິດ ອອກຖະແຫຼງການວ່າບໍ່ມີຜູ້ເສຍຊີວິດຈາກເຫດການໂຈມຕີຄັ້ງນີ້ ແລະ ສາມາດຄວບຄຸມສະຖານະການໄດ້.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube