ອີຣານກ່າວ ຖານທັບທຸກແຫ່ງຂອງ ສ.ອາເມຣິກາ ໃນຕາເວັນອອກກາງຢູ່ໃນລັດສະໜີຂີປະນາວຸດອີຣານ

ລາຍງານ 15 ກັນຍາ 2019 ພາຍຫຼັງທີ່ກຸ່ມກະບົດຮູຕີໃນເຢເມນ ທີ່ເປັນແນວຮ່ວມຂອງອີຣານ ໄດ້ປະກາດສະແດງຄວາມຮັບຜິດຊອບ ຕໍ່ການໃຊ້ໂດຣນຕິດລະເບີດ ໂຈມຕີໂຮງກັ່ນນ້ຳມັນ 2 ແຫ່ງຂອງບໍລິສັດຊາອູດີອາຣາມໂກ ທາງພາກຕາເວັນອອກຂອງອາຣັບບີ ຊາອູດິດ ເມື່ອວັນເສົາ ຜ່ານມາ ສົ່ງຜົນໃຫ້ປະລິມານການຜະລິດນ້ຳມັນຂອງອາຣັບບີ ຊາອູດິດ ຫຼຸດລົງກວ່າເຄິ່ງໜຶ່ງ ໂດຍ 1 ໃນ 2 ໂຮງງານ ທີ່ຖືກໂຈມຕີ ເປັນໂຮງງານແປຮູບປິໂຕຣລຽມຂະໜາດໃຫຍ່ທີ່ສຸດຂອງໂລກ.

ໂດຍທ່ານ ໄມ ພອມແພວ ລັດຖະມົນຕີກະຊວງການຕ່າງປະເທດສະຫະລັດ ອາເມຣິກາ ໄດ້ລົງຂໍ້ຄວາມຜ່ານ Twitter ກ່າວຫາວ່າອີຣານຢູ່ເບື້ອງຫຼັງການໂຈມຕີ ແລະ ການກວດສອບຂອງ ສ.ອາເມຣິກາ ພົບວ່າການໂຈມຕີຄັ້ງນີ້ບໍ່ໄດ້ມາຈາກເຢເມນ.

ທ່ານ ພົນອາກາດຈັດຕະວາ ອາມີ ອາລີ ຮາຈິຊາເດ ຜູ້ບັນຊາການກອງທັບອາກາດ ແລະ ກອງກຳລັງອະວະກາດ ກອງທັບປະຕິວັດອີຣານ ກ່າວຕອບໂຕ້ວ່າ ທຸກຄົນຄວນຮັບຊາບໄວ້ວ່າຖານທັບທຸກແຫ່ງ ແລະ ເຮືອບັນທຸກຍົນຮົບທຸກລຳຂອງ ສ.ອາເມຣິກາ ໃນຕາເວັນອອກກາງ ຢູ່ໃນລັດສະໜີ 2,000 ກິໂລແມັດຮອບອີຣານ ນັ້ນໝາຍຄວາມວ່າຢູ່ໃນໄລຍະການຍິງໂຈມຕີຂອງຂີປະນາວຸດອີຣານ.

ໃນດ້ານຂອງສຳນັກຂ່າວ Tasnim ຂອງອີຣານກໍ່ໄດ້ລາຍງານໂດຍອ້າງອີງຄຳເວົ້າຂອງພົນອາກາດຈັດຕະວາ ອາມີ ອາລີ ຮາຈິຊາເດ ເຊັ່ນກັນວ່າ ອີຣານພ້ອມສະເໜີສຳລັບການເຮັດສົງຄາມ ເຕັມຮູບແບບກັບ ສ.ອາເມຣິກາ.

ຈາກການເປີດເຜີຍຂອງເຈົ້າໜ້າທີ່ປະຈຳທຳນຽບຂ່າວ, ທ່ານ ໂດໂນ ທຣຳ ປະທານປະເທດ ສ.ອາເມຣິກາ ໄດ້ແຈ້ງໄປຍັງເຈົ້າຊາຍໂມຮຳເໝັດ ບິນ ຊັດມານ ມະກຸດລາຊະກຸມມານແຫ່ງອາຣັບບີ ຊາອູດິດ ຜູ້ປົກຄອງສູງສຸດຂອງປະເທດໃນທາງພຶດຕິໄນວ່າ ສ.ອາເມຣິກາ ພ້ອມຈະຮ່ວມມືໃນການປະຕິບັດງານ ເພື່ອຮັບປະກັນຄວາມໝັ້ນຄົງຂອງອາຣັບບີ ຊາອູດິດ.

ຂ່າວທີ່ກ່ຽວຂ້ອງ: ໂຮງກັ່ນນ້ຳມັນ 2 ແຫ່ງຂອງຊາອູດິດ ຖືກກອງກຳລັງຕິດອາວຸດຮູຕີໂຈມຕີດ້ວຍໂດຣນ


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube