ປ.ທຣຳ ກ່າວວ່າໄດ້ລັອກເປົ້າການໂຈມຕີ ໄປທີ່ຜູ້ລົງມືກໍ່ເຫດລະເບີດໂຮງກັ່ນນ້ຳມັນຊາອູດິດແລ້ວ

ລາຍງານ 16 ກັນຍາ 2019, ສືບເນື່ອງມາຈາກເຫດຝູງໂດຣນຂອງກອງກຳລັງຕິດອາວຸດຮູຕີ ໂຈມຕີໂຮງກັ່ນນ້ຳມັນອັບກາອິກ ແລະ ຄູຣານິສ ເຊິ່ງເປັນໜຶ່ງໃນນິຄົມການຜະລິດນ້ຳມັນດິບຂະໜາດໃຫຍ່ຂອງຊາອູດິອາຣາມໂກ ລັດວິສາຫະກິດດ້ານພະລັງງານລາຍໃຫຍ່ທີ່ສຸດຂອງອາຣັບບີ ຊາອູດິດ ທີ່ຕັ້ງຢູ່ທາງຝັ່ງຕາເວັນອອກຂອງປະເທດ ເມື່ອວັນເສົາທີ່ຜ່ານມາ ສົ່ງຜົນໃຫ້ຊາອູດິອາຣາມໂກປະກາດລະງັບການຜະລິດໂດຍບໍ່ມີກຳນົດ ຈາກການນປະເມີນຈະສົ່ງຜົນກະທົບຕໍ່ປະລິມານການຜະລິດຕໍ່ວັນສູງເຖິງ 5.7 ລ້ານບາເຣວ ຫຼື ເທົ່າກັບ 50% ຂອງປະລິມານການກັ່ນນ້ຳມັນດິບໃນອາຣັບບີ ຊາອູດິດໂດຍສະເລ່ຍຕໍ່ວັນ ແລະ ຄາດວ່າຈະສົ່ງຜົນຕໍ່ອຸປະສົງໃນຕະຫຼາດໂລກປະມານ 5% ໃນໄລຍະໃກ້ນີ້ ໝາຍຄວາມວ່າລາຄານ້ຳມັນດິບໃນຕະຫຼາດໂລກຈະປັບຕົວສູງຂຶ້ນຢ່າງແນ່ນອນ.

ທ່ານ ໂດໂນ ທຣຳ ປະທານປະເທດສະຫະລັດ ອາເມຣິກາ ໄດ້ກ່າວຜ່ານ Twitter ວ່າສາຍການຜະລິດນ້ຳມັນດິບຂອງອາຣັບບີ ຊາອູດິດຖືກໂຈມຕີ ໃນຂະນະທີ່ຕົວຜູ້ຮ້າຍກໍ່ຊັດເຈນ ຕາມຫຼັກຖານຕອນນີ້ ສ.ອາເມຣິກາ ພ້ອມລັອກເປົ້າໂຈມຕີເປົ້າໝາຍຂອງສັດຕູແລ້ວ ລໍຖ້າພຽງການສືບສວນຂອງລັດຖະບານອາຣັບບີ ຊາອູດິດເທົ່ານັ້ນ ແລະ ການອະນຸຍາດໃຫ້ ສ.ອາເມຣິກາປະຕິບັດການໃນຮູບແບບໃດ ທ່າທີດັ່ງກ່າວຂອງຜູ້ນຳ ສ.ອາເມຣິກາເກີດຂຶ້ນບໍ່ພໍເທົ່າໃດຊົ່ວໂມງ ພາຍຫຼັງທີ່ກອງທັບປະຕິວັດອີຣານ ອອກຖະແຫຼງການວ່າ ຖານທັບຂອງ ສ.ອາເມຣິກາ ທຸກແຫ່ງທີ່ຕັ້ງຢູ່ໃນຕາເວັນອອກກາງ ຢູ່ພາຍໃນຂອບເຂດລັດສະໝີການໂຈມຕີທາງທະຫານຂອງຕົນ, ສ່ວນກະຊວງການຕ່າງປະເທດອີຣານປະຕິເສດຂໍ້ກ່າວຫາທັງໝົດຂອງ ສ.ອາເມຣິກາ ພ້ອມກ່າວວ່ານັ້ນຄືການຫາເລື່ອງ.

ເຖິງແມ່ນວ່າພາຍຫຼັງເກີດເຫດ ກຸ່ມກະບົດຮູຕີໃນເຢເມນ ທີ່ມີແນວຄິດນິຍົມອີຣານໄດ້ອອກມາປະກາດຮັບວ່າເປັນຢູ່ລົງມືກໍ່ເຫດ ເພື່ອຕອບໂຕ້ປະຕິບັດການທາງທະຫານຂອງອາຣັບບີ ຊາອູດິດໃນເຢເມນ ແຕ່ຕໍ່ມາທ່ານ ໄມ ພອມແພວ ລັດຖະມົນຕີກະຊວງການຕ່າງປະເທດ ສ.ອາເມຣິກາ ກ່າວວ່າຜູ້ຢູ່ເບື້ອງຫຼັງຕົວຈິງຄືອີຣານ ພ້ອມທັງສະແດງຫຼັກຖານເປັນພາບຖ່າຍຈາກດາວທຽມສອດແນມ ວ່າຝູງໂດຣນບໍ່ຕ່ຳກວ່າ 10 ລຳສ້າງຄວາມເສຍຫາຍໃຫ້ກັບໂຮງກັ່ນນ້ຳມັນທັງສອງແຫ່ງລວມ 19 ຈຸດ ແລະ ທິດທາງຂອງການບິນໂດຣນ ລວມທັງລັດສະໝີຂອງອາວຸດທີ່ໃຊ້ໂຈມຕີມາຈາກທາງຕາເວັນຕົກສຽງໃຕ້ ເຊິ່ງເປັນທີ່ຕັ້ງຂອງອີຣານ ບໍ່ແມ່ນເຢເມນທີ່ຢູ່ທາງໃຕ້ຂອງອາຣັບບີ ຊາອູດິດ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube