ຜູ້ນຳຕວັກກີ-ລັດເຊຍ-ອີຣານ ຈັດກອງປະຊຸມສຸດຍອດອີກຄັ້ງ ເພື່ອຫາທາງແກ້ໄຂສົງຄາມຊີຣີ

ລາຍງານ 16 ກັນຍາ 2019, ທ່ານ ເຣເຊບ ເທຢິບ ເອີໂດກັນ ປະທານປະເທດຕວັກກີ ຈະເປັນເຈົ້າພາບຈັດກອງປະຊຸມສຸດຍອດອີກຄັ້ງກັບທ່ານ ວະລາດິເມຍ ປູຕິນ ປະທານປະເທດລັດເຊຍ ແລະ ທ່ານ ຮັສຊັນ ໂຣຮານີ ປະທານປະເທດອີຣານເພື່ອປຶກສາຫາລືບັນຫາຊີຣີ ໃນວັນຈັນນີ້.

ກອງປະຊຸມສຸດຍອດດັ່ງກ່າວ ຈະເກີດຂຶ້ນທີ່ນະຄອນຫຼວງອັງກາຣາ ປະເທດຕວັກກີ ແລະ ຈະເປັນຄັ້ງທີ 5 ນັບຕັ້ງແຕ່ປີ 2017 ຫຼັງຈາກສົງຄາມກາງເມືອງຊີຣີໄດ້ເກີດຂຶ້ນ ເມື່ອຕົ້ນປີ 2011, ລັດເຊຍ ແລະ ອີຣານເປັນພັນທະມິດກັບທ່ານ ບາຊາ ອັນ-ອັສຊາດ ປະທານປະເທດຊີຣີ, ຂະນະທີ່ຕວັກກີສະໜັບສະໜູນຝ່າຍຕໍ່ຕ້ານ ແລະ ຕ້ອງການໂຄ່ນລົ້ມທ່ານ ບາຊາ ອັນ-ອັສຊາດ ແຕ່ເມື່ອເຫັນວ່າໂຄ່ນລົ້ມບໍ່ໄດ້ ຈຶຶ່ງປ່ຽນໄປໃຫ້ຄວາມສຳຄັນກັບການຢຸດຢັ້ງຄື້ນຜູ້ອົບພະຍົບທີ່ຫຼັ່ງໄຫຼຈາກເມືອງອິດລິບ ທາງພາກຕາເວັນຕົກສຽງເໜືອຂອງຊີຣີ ທີ່ຫຼັ່ງໄຫຼເຂົ້າຕວັກກີ ເຊິ່ງຕວັກກີໄດ້ຕັ້ງດ່ານສັງເກດການ 12 ແຫ່ງໃນເມືອງດັ່ງກ່າວ ເພື່ອຄຸ້ມຄອງເຂດກັນຊົນ (safe zone) ຕາມທີ່ຕົກລົງກັບລັດເຊຍເມື່ອປີ ທີ່ຜ່ານມາ, ເພື່ອປ້ອງກັນການເກີດສົງຄາມເຕັມຮູບແບບ ແຕ່ດ່ານເຫຼົ່ານີ້ເລີ່ມຄອນແຄນ ແລະ ໜຶ່ງໃນນັ້ນຖືກກອງທັບຊີຣີປິດລ້ອມ ເມື່ອເດືອນ ທີ່ຜ່ານມາ.

ຂະນະທີ່ລັດເຊຍ ຍັງໃຊ້ປະຕິບັດການໂຈມຕີທາງອາກດໃນພູມມິພາກນີ້ ເຖິງແມ່ນວ່າຈະເຮັດຂໍ້ຕົກລົງຢຸດຍິງກັບຕວັກກີ ຄັ້ງຫຼ້າສຸດ ເມື່ອວັນທີ 31 ສິງຫາ 2019 ທີ່ຜ່ານມາ ໂດຍໃຫ້ເຫດຜົນວ່າຍັງມີກຸ່ມກໍ່ການຮ້າຍຈຳນວນຫຼາຍໃຊ້ພື້ນທີ່ນີ້ໂຈມຕີກອງກຳລັງລັດຖະບານຊີຣີຢູ່.

ນອກຈາກນີ້, ຕວັກກີຍັງມີເສິກອີກດ້ານໜຶ່ງ ກັບກອງກຳລັງຊາວເຄິດໃນຊີຣີ ທີ່ຕວັກກີຖືວ່າເປັນພັນທະມິດຂອງກຸ່ມຕິດອາວຸດເຄິດໃນຕວັກກີ ທີ່ພະຍາຍາມແບ່ງແຍກດິນແດນທາງໃຕ້ຂອງປະເທດ, ຕວັກກີໄດ້ໃຊ້ກຳລັງຂ້າມແດນໂຈມຕີກັບກຸ່ມນີ້ຢູ່ສະເໝີ ແຕ່ກຸ່ມນີ້ໄດ້ຮັບການສະໜັບສະໜູນຈາກ ສ.ອາເມຣິກາ ເພາະເປັນກຸ່ມຫຼັກທີ່ສູ້ກັບກຸ່ມລັດອິດສະລາມ ຫຼື IS ໃນຊີຣີ.

- Advertisement -