ມີກະແສຂ່າວວ່າ ຜູ້ນຳເກົາຫຼີເໜືອເຊີນ ປ.ທຣຳ ຢ້ຽມຢາມນະຄອນຫຼວງປຽງຢາງ

ລາຍງານ 16 ກັນຍາ 2019, ໂດຍອ້າງອີງຈາກລາຍງານຂອງໜັງສືພິມຈຸງອັງ ຂອງເກົາຫຼີໃຕ້ ທີ່ສຳພາດແຫຼ່ງຂ່າວການທູດ ທີ່ຍັງບໍ່ມີການລະບຸຊັດເຈນວ່າເປັນເກົາຫຼີໃຕ້, ເກົາຫຼີເໜືອ ຫຼື ສະຫະລັດ ອາເມຣິກາ ວ່າທ່ານ ຄິມ ຈອງ-ອຶນ ຜູ້ນຳສູງສຸດຂອງເກົາຫຼີເໜືອ ໄດ້ສົ່ງຈົດໝາຍເຖິງທ່ານ ໂດໂນ ທຣຳ ປະທານປະເທດ ສ.ອາເມຣິກາ 2 ສະບັບເມື່ອເດືອນສິງຫາ ທີ່ຜ່ານມາ ໂດຍເນື້ອໃນສຳຄັນຂອງຈົດໝາຍສະບັບທຳອິດ ຄືການເຊີນຜູ້ນຳ ສ.ອາເມຣິກາຢ້ຽມຢາມນະຄອນຫຼວງປຽງຢາງຢ່າງເປັນທາງການ ເຊິ່ງຫາກທ່ານ ໂດໂນ ທຣຳຕອບຮັບຈະສ້າງປະຫວັດສາດ ເປັນປະທານປະເທດ ສ.ອາເມຣິກາໃນຕຳແໜ່ງຄົນທຳອິດທີ່ຢ້ຽມຢາມເກົາຫຼີເໜືອຢ່າງເປັນທາງການ ພາຍຫຼັງທີ່ໄດ້ສ້າງປະຫວັດສາດການເປັນຜູ້ນຳ ສ.ອາເມຣິກາໃນຕຳແໜ່ງຄົນທຳອິດ ທີ່ຍ່າງຂ້າມເຂດແດນທາງທະຫານຈາກຝັ່ງເກົາຫຼີໃຕ້ໄປຍັງເກົາຫຼີເໜືອມາແລ້ວ ເມື່ອເດືອນມິຖຸນາ ທີ່ຜ່ານມາ.

ຂະນະທີ່ເນື້ອໃນສຳຄັນຂອງຈົດໝາຍສະບັບທີ່ສອງ ຄືການສົ່ງສັນຍານຄວາມພ້ອມຂອງທ່ານ ຄິມ ຈອງ-ອຶນ ໃນການພົບປະຫາລືຢ່າງເປັນທາງການຄັ້ງໃໝ່ກັບຜູ້ນຳ ສ.ອາເມຣິກາ ໂດຍທັງສອງໄດ້ປະຊຸມສຸດຍອດຮ່ວມກັນຢ່າງເປັນທາງການມາແລ້ວ 2 ຄັ້ງ, ຄັ້ງທຳອິດທີ່ສິງກະໂປ ເມື່ອເດືອນມິຖຸນາ 2018, ຄັ້ງທີ 2 ທີ່ນະຄອນຫຼວງຮ່າໂນ້ຍ ປະເທດຫວຽດນາມ ເມື່ອເດືອນກຸມພາ ທີ່ຜ່ານມາ, ສ່ວນຄັ້ງທີ່ພົບປະກັນຢູ່ເຂດປອດທະຫານຝັ່ງເກົາຫຼີໃຕ້ ຖືເປັນການພົບປະຫາລືແບບກະທັນຫັນ.

ເຖິງແມ່ນວ່າກະຊວງການຕ່າງປະເທດເກົາຫຼີໃຕ້, ທຳນຽບຂາວ ແລະ ກະຊວງການຕ່າງປະເທດ ສ.ອາເມຣິກາ ລວມເຖິງສື່ເກົາຫຼີເໜືອເອງ ແມ່ນຍັງບໍ່ສະແດງທ່າທີຕໍ່ບັນຫາດັ່ງກ່າວ ແຕ່ທ່ານ ໂດໂນ ທຣຳ ເຄີຍກ່າວເມື່ອວັນທີ 9 ສິງຫາ ທີ່ຜ່ານມາ ວ່າຕົນໄດ້ຮັບຈົດໝາຍທີ່ມີເນື້ອໃນອັນຈົບງາມ ຄວາມຍາວ 3 ໜ້າເຈ້ຍ ຈາກທ່ານຜູ້ນຳເກົາຫຼີເໜືອ, ນອກຈາກນີ້ລາຍງານຂອງໜັງສືພິມຈຸງອັງ ຍັງເປີດເຜີຍປະມານ 1 ອາທິດ ພາຍຫຼັງທີ່ທ່ານ ໂດໂນ ທຣຳ ປົດທ່ານ ຈອນ ໂບຕັ້ນ ທີ່ປຶກສາດ້ານຄວາມໝັ້ນຄົງແຫ່ງຊາດ ທີ່ມີຈຸດຢືນທີ່ແຂງກະດ້າງຕໍ່ເກົາຫຼີເໜືອ ແລະ ມີກະແສຂ່າວອີກວ່າ ໜຶ່ງໃນປັດໄຈທີ່ຜູ້ນຳ ສ.ອາເມຣິກາ ປົດທ່ານ ຈອນ ໂບຕັ້ນ ຍ້ອນຄວາມລົ້ມແຫຼວຈາກການປະຊຸມກັບເກົາຫຼີເໜືອທີ່ນະຄອນຫຼວງຮ່າໂນ້ຍ ເຊິ່ງສົ່ງຜົນໃຫ້ການແກ້ໄຂບັນຫານິວເຄຼຍຢູ່ແຫຼມເກົາຫຼີຕ້ອງຢຸດລົງນັບແຕ່ນັ້ນມາ.