ຊ້າງປ່າຢຽບຄົນລາວ ທີ່ໄປຮັບຈ້າງກີດຢາງຢູ່ໄທ ຈົນເສຍຊີວິດ

ລາຍງານ 16 ກັນຍາ 2019, ອີງຕາມການລາຍງານຂອງສຳນັກຂ່າວມະຕິຊົນໃຫ້ຮູ້ວ່າ: ທ້າວ ແຫວນ ໄຊຍະເພັດ ອາຍຸ 27 ປີ ສັນຊາດລາວ ທີ່ໄປຮັບຈ້າງກີດຢາງ ແລະ ອາໄສຢູ່ປະເທດໄທໄດ້ 10 ກວ່າປີແລ້ວ ຖືກຊ້າງໄລ່ຢຽບຈົນເສຍຊີວິດ ທີ່ຕຳບົນຂຸນຊ່ອງ, ອຳເພີແກ່ງຫາງແມວ, ຈັງຫວັດຈັນທະບຸຣີ.

ແຫຼ່ງຂ່າວລະບຸອີກວ່າ ຮ່າງຜູ້ເສຍຊີວິດມີຮ່ອງຮອຍການຖືກຊ້າງປ່າຢຽບ ແລະ ເຕະທີ່ລຳຕົວຈົນກະດູກຫັກຫຼາຍບ່ອນ, ໃນຕອນທີ່ເກີດເຫດຜູ້ເສຍຊີວິດໄດ້ໄປຖ້າພໍ່ກັບແມ່ ທີ່ຈະເຂົ້າມາເກີດຢາງນຳກັນຢູ່ຕູບໃນສວນຢາງ ຈາກນັ້ນໄດ້ມີຊ້າງປ່າໂຕໃຫຍ່ຍ່າງເຂົ້າມາທີ່ຕູບ ຜູ້ເສຍຊີວິດຈຶ່ງແລ່ນ ເຮັດໃຫ້ຊ້າງແລ່ນໄລ່ ແຕ່ຜູ້ເສຍຊີວິດສະດຸດລົ້ມ ເຮັດໃຫ້ຊ້າງນຳທັນຈຶ່ງຢຽບທີ່ລຳຕົວ ຈົນກະດູກຫັກເສຍຊີວິດໃນທີ່ເກີດເຫດ, ຈາກນັ້ນພໍ່-ແມ່ຂອງຜູ້ເສຍຊີວິດໄດ້ຍິນສຽງຊ້າງປ່າ ຈຶ່ງໄດ້ຍ່າງເຂົ້າໄປເບິ່ງລູກຊາຍ ກໍ່ພົບວ່າຊ້າງຍັງເຝົ້າຮ່າງຜູ້ເສຍຊີວິດຢູ່ ຈຶ່ງໄດ້ປະສານໃຫ້ເຈົ້າໜ້າທີ່ມາຊ່ວຍໄລ່ຊ້າງໃຫ້ກັບເຂົ້າປ່າ ເພື່ອຈະນຳເອົາຜູ້ເສຍຊີວິດໄປໂຮງໝໍ, ເຈົ້າໜ້າທີ່ໃຊ້ເວລາດົນເຖິງ 1-2 ຊົ່ວໂມງ ຈຶ່ງສາມາດໄລ່ຊ້າງເຂົ້າປ່າໄດ້ ກ່ອນທີ່ຈະນຳຮ່າງຜູ້ເສຍຊີວິດສົ່ງໂຮງໝໍ ແຕ່ສຸດທ້າຍໄດ້ເສຍຊີວິດໃນເວລາຕໍ່ມາ.

ໃນເບື້ອງຕົ້ນ ເຈົ້າໜ້າທີ່ທີ່ກ່ຽວຂ້ອງຂອງໄທ ໄດ້ໃຫ້ການຊ່ວຍເຫຼືອຄອບຄົວຜູ້ເຄາະຮ້າຍ ໂດຍການມອບເງິນຈຳນວນໜຶ່ງໃຫ້ກັບຄອບຄົວຜູ້ເສຍຊີວິດ ພ້ອມທັງຈະປະສານຂໍຄວາມຊ່ວຍເຫຼືອເພີ່ມເຕີມແກ່ຄອບຄົວດັ່ງກ່າວ ເນື່ອງຈາກມີຖານະທຸກຍາກ.

- Advertisement -