ປ.ປູຕິນ ສະເໜີຂາຍ S-400 ໃຫ້ຊາອູດິດ ເພື່ອໄວ້ປ້ອງກັນ ຫຼັງເກີດເຫດໂຈມຕີໂຮງກັ່ນນ້ຳມັນ

ລາຍງານ 17 ກັນຍາ 2019: ທ່ານ ວະລາດິເມຍ ປູຕິນ ປະທານປະເທດລັດເຊຍ ປະຊຸມສາມຝ່າຍຮ່ວມກັບທ່ານ ຮັສຊັນ ໂຣຮານີ ປະທານປະເທດອີຣານ ແລະ ທ່ານ ເຣເຊບ ເທຢິບ ເອີໂດກັນ ປະທານປະເທດຕວັກກີ ທີ່ນະຄອນຫຼວງອັງກາຣາ ປະເທດຕວັກກີ ເມື່ອວັນຈັນ ທີ່ຜ່ານມາ ກ່ຽວກັບສະຖານະການໃນແຂວງອິດລິບ ທາງພາກເໜືອຂອງຊີຣີ ແຕ່ໃນຕອນໜຶ່ງຂອງການຖະແຫຼງ ພາຍຫຼັງສຳເລັດການພົບປະຫາລື ມີນັກຂ່າວຕັ້ງຄຳຖາມກ່ຽວກັບເກດການຝູງໂດຣນໂຈມຕີໂຮງກັ່ນນ້ຳມັນ 2 ແຫ່ງຂອງບໍລິສັດຊາອູດິອາຣາມໂກ ທີ່ຕັ້ງຢູ່ທາງພາກຕາເວັນອອກຂອງອາຣັບບີ ຊາອູດິດ ເມື່ອວັນເສົາ ທີ່ຜ່ານມາ ສົ່ງຜົນກະທົບຕໍ່ອຸປະສົງໂລກ 5% ເພາະຊາອູດິອາຣາມໂກປະກາດລະງັບການຜະລິດຂອງໂຮງກັ່ນທັງສອງແຫ່ງຢ່າງບໍ່ມີກຳນົດ.

ທ່ານ ປູຕິນ ກ່າວວ່າລັດເຊຍຍິນດີໃຫ້ການຊ່ວຍເຫຼືອທີ່ເໝາະສົມ ແກ່ອາຣັບບີ ຊາອູດິດ ແຕ່ຍັງຮັກສາທ່າທີວ່າຈະເພີ່ມການຜະລິດນ້ຳມັນໃນໄລຍະນີ້ຫຼືບໍ່ ໂດຍລັດເຊຍເປັນຜູ້ຜະລິດນ້ຳມັນລາຍໃຫຍ່ທີ່ສຸດ ທີ່ບໍ່ແມ່ນສະມາຊິກອົງການກຸ່ມປະເທດຜູ້ສົ່ງອອກນ້ຳມັນ (OPEC), ເຖິງຢ່າງໃດກໍ່ຕາມ ທ່ານ ປູຕິນ ກ່າວວ່າ ໃນທາງການເມືອງອາຣັບບີ ຊາອູດິດສາມາດຕັດສິນໃຈເອງໄດ້ ເຊັ່ນດຽວກັບອີຣານ ແລະ ຕວັກກີ ທີ່ຊື້ລະບົບປ້ອງກັນທາງອາກາດ S-300 ແລະ S-400 ຂອງລັດເຊຍຕາມລຳດັບ ເພື່ອເພີ່ມຄວາມສາມາດຂອງອາຣັບບີ ຊາອູດິດໃນການປ້ອງກັນລະບົບໂຄງສ້າງພື້ນຖານຂອງປະເທດ.

ຂະນະທີ່ທ່ານ ຮັສຊັນ ໂຣຮານີ ກ່າວເຖິງເຫດການທີ່ເກີດຂຶ້ນກັບໂຮງກັ່ນນ້ຳມັນຂອງຊາອູດິອາຣາມໂກ ເຊິ່ງຢູ່ທາງພາກຕາເວັນອອກສຽງເໜືອຂອງເຢເມນ ວ່າເຢເມນເປັນປະເທດທີ່ຖືກອາຣັບບີ ຊາອູດິດ ແລະ ພັນທະມິດຖິ້ມລະເບີດໂຈມຕີທຸກວັນ, ຊາວເຢເມນຈຶ່ງບໍ່ເຫຼືອທາງເລືອກ ແລະ ໜຶ່ງໃນນັ້ນຄືການຕອບໂຕ້, ໃນດ້ານຂອງລັດຖະບານອາຣັບບີ ຊາອູດິດເຊື່ອວ່າອີຣານເປັນຜູ້ກໍ່ເຫດ ແຕ່ຈະເຊີນຜູ້ຊ່ຽວຊານຈາກສະຫະປະຊາຊາດ ແລະ ອົງກອນອື່ນລົງພື້ນທີ່ກວດສອບຮ່ວມອີກດ້ວຍ.

- Advertisement -