ເຈົ້າໜ້າທີ່ໄທ ຈັບແກ້ງຄ້າຢາເສບຕິດລາຍໃຫຍ່ ທີ່ອ້າງວ່າມີຮ້ານຂາຍຄຳ-ແລກປ່ຽນເງິນຕາຢູ່ ສປປ.ລາວ

ລາຍງານ 19 ກັນຍາ 2019, ອີງຕາມການລາຍງານຂອງສຳນັກຂ່າວໄທໃຫ້ຮູ້ວ່າ ເຈົ້າໜ້າທີ່ຕຳຫຼວດຂອງໄທ ໄດ້ຈັບກຸມແກ້ງເຄືອຂ່າຍຢາເສບຕິດລາຍໃຫຍ່ຂອງພາກອີສານ ປະເທດໄທ ຊື່ທ້າວ ຣັດຊະພູມ ສຸດຫຼ້າ ຜູ້ຕ້ອງຫາທີ່ເຮັດໜ້າທີ່ຮັບໂອນເງິນໃນບັນຊີຕົວການໃຫຍ່ທີ່ຕິດຕໍ່ກັບເຄືອຂ່າຍໃນ ສປປ.ລາວ ພ້ອມຂອງກາງເງິນສົດ 1.5 ລ້ານບາດ ແລະ ເງິນກີບ 5 ລ້ານກີບ, ບັນຊີທະນາຄານ 4 ເຫຼັ້ມ, ລົດກະບະ, ສາຍຄໍຄຳໜັກ 5 ບາດ, ແຫວນເພັດ 1.8 ກະລັດ ແລະ ຊັບສິນອື່ນໆລວມ 24 ລາຍການ, ຂະນະທີ່ການຂະຫຍາຍຜົນກວດສອບບັນຊີທະນາຄານຂອງຕົວການໃຫຍ່ທີ່ຫຼາຍກວ່າ 10 ບັນຊີ ພົບວ່າໃນໄລຍະ 4 ເດືອນ ມີເງິນໝຸນວຽກກວ່າ 200 ລ້ານບາດ.

ເຖິງຢ່າງໃດກໍ່ຕາມ, ທ້າວ ຣັດຊະພູມ ແມ່ນໄດ້ໃຫ້ການປະຕິເສດທຸກຂໍ້ກ່າວຫາ ແລະ ໄດ້ກ່າວວ່າຕົນເຮັດທຸລະກິດຮ້ານຂາຍຄຳ ແລະ ຮັບແລກປ່ຽນເງິນຕາໃນ ສປປ.ລາວ ຈະຖອນເງິນຄັ້ງລະ 500,000-5,000,000 ບາດ ໂອນເງິນເຂົ້າບັນຊີລູກຄ້າ ແລະ ນຳເງິນຂ້າມຈາກລາວມາໃຫ້ລູກຄ້າ, ແຕ່ຕຳຫຼວດກໍ່ອ້າງວ່າມີຫຼັກການແໜ້ນໜາ ວ່າມີສ່ວນກ່ຽວຂ້ອງກັບເງິນຄ້າຢາເສບຕິດ ລັກສະນະເປັນຂະບວນການຟອກເງິນຜິດກົດໝາຍ ເບື້ອງຕົ້ນເຈົ້າໜ້າທີ່ແຈ້ງຂໍ້ຫາສົມຄົບໂດຍຕົກລົງກັນຕັ້ງແຕ່ 2 ຄົນຂຶ້ນໄປ ເພື່ອກະທຳຄວາມຜິດຖານຟອກເງິນ ພ້ອມສົ່ງຕົວດຳເນີນຄະດີຕາມກົດໝາຍ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube