ສ.ອາເມຣິກາ ເນລະເທດນັການທູດກູບາ 2 ຄົນ ທີ່ປະຈຳຢູ່ສຳນັກງານໃຫຍ່ UN ໃນນິວຢອກ

ລາຍງານ 20 ກັນຍາ 2019, ກະຊວງການຕ່າງປະເທດສະຫະລັດ ອາເມຣິກາ ອອກຖະແຫຼງການເມື່ອວັນພະຫັດ ທີ່ຜ່ານມາ ປະກາດໃຫ້ນັກການທູດກູບາ 2 ຄົນປະຈຳສຳນັກງານຄະນະຜູ້ແທນຖາວອນກູບາ ທີ່ສຳນັກງານໃຫຍ່ຂອງອົງການສະຫະປະຊາຊາດ (UN) ໃນນະຄອນນິວຢອກ ມີສະຖານະເປັນບຸກຄົນທີ່ບໍ່ເພິ່ງປາຖະໜາ ແລະ ຕ້ອງເດີນທາງອອກນອກປະເທດ ເນື່ອງຈາກບຸກຄົນທັງສອງມີພຶດຕິກຳເຂົ້າຂ່າຍເປັນອັນຕະລາຍຕໍ່ຄວາມໝັ້ນຄົງຂອງ ສ.ອາເມຣິກາ.

ເຊິ່ງຖະແຫຼງການຂອງລັດຖະບານ ສ.ອາເມຣິກາ ບໍ່ໄດ້ເປີດເຜີຍຊື່ນັກການທູດກູບາທັງສອງຄົນ ແລະ ເສັ້ນຕາຍທີ່ທັງສອງຕ້ອງເດີນທາງອອກຈາກປະເທດ, ແຕ່ໄດ້ຈຳກັດການເຄື່ອນໄຫວ ສຳລັບນັການທູດກູບາທີ່ເຫຼືອ ໃຫ້ຢູ່ສະເພາະໃນເຂດແມນຮັດຕັ້ນເທົ່ານັ້ນ ເຊິ່ງບໍ່ຫ່າງຈາກອາຄານສຳນັກງານໃຫຍ່ UN ແລະ ເຈົ້າໜ້າທີ່ຂອງລັດຖະບານ ສ.ອາເມຣິກາ ມີອຳນາດກວດສອບສະຖານທີ່ພັກຂອງນັກການທູດກູບາ ໂດຍອາໄສອຳນາດຕາມຂໍ້ຕົກລົງສຳນັກງານໃຫຍ່ສະຫະປະຊາຊາດ ສະບັບປີ 1947.

ມາດຕະການດັ່ງກ່າວຂອງ ສ.ອາເມຣິກາ ເກີດຂຶ້ນໃນຊ່ວງການປະຊຸມສະມັດຊາໃຫຍ່ສະຫະປະຊາຊາດ ສະໄໝສາມັນ ຄັ້ງທີ 74 ແລະ ການອະພິປາຍທົ່ວໄປຂອງບັນດາຜູ້ນຳປະເທດສະມາຊິກຈະເກີດຂຶ້ນໃນລະຫວ່າງວັນທີ 24-30 ກັນຍານີ້ ເຊິ່ງແນ່ນອນວ່າລັດຖະບານກູບາປະນາມເຫດການດັ່ງກ່າວ ໂດຍທ່ານ ບຼູໂນ ໂຣດຼິເກສ ລັດຖະມົນຕີກະຊວງການຕ່າງປະເທດກູບາ ກ່າວວ່າບໍ່ເປັນທຳຢ່າງຍິ່ງ ແລະ ມີແຕ່ຈະບັ່ນທອນສາຍພົວພັນທາງການທູດລະຫວ່າງ ສ.ອາເມຣິກາ-ກູບາໃຫ້ຕົກຕ່ຳໄປກ່າວເກົ່າໃນອະນາຄົດ.

ເຊິ່ງການເນລະເທດນັກການທູດກູບາ ປະຈຳ UN ຂອງລັດຖະບານ ສ.ອາເມຣິກາຄັ້ງນີ້ ເກີດຂຶ້ນ 2 ປີພາຍຫຼັງທີ່ທ່ານ ໂດໂນ ທຣຳ ປະທານປະເທດ ສ.ອາເມຣິກາ ສັ່ງຂັບໄລ່ນັການທູດກູບາ ປະຈຳສະຖານເອກອັກຄະລັດຖະທູດ ໃນນະຄອນຫຼວງວໍຊິງຕັນ 15 ຄົນ ເມື່ອປີ 2017 ພາຍຫຼັງທີ່ນັກການການທູດ ສ.ອາເມຣິກາ ປະຈຳນະຄອນຫຼວງຮາວານາຫຼາຍຄົນ ລົ້ມປ່ວຍດ້ວຍອາການປິດສະໜາ ເຊິ່ງສົ່ງຜົນກັບລະບົບການໄດ້ຍິນ ແລະ ການແນມເຫັນ.

- Advertisement -