ລັດເຊຍ-ຈີນ ບໍ່ຮັບຮ່າງມະຕິ UNSC ຢຸດຍິງຢູ່ອິດລິບ ປະເທດຊີຣີ, ເພາະເຫັນວ່າເປັນການປົກປ້ອງກຸ່ມກະບົດ

ລາຍງານ 20 ກັນຍາ 2019, ສະພາຄວາມໝັ້ນຄົງແຫ່ງສະປະຊາຊາດ (UNSC) ປະຊຸມກັນເມື່ອວັນພະຫັດ 19 ກັນຍາ ທີ່ຜ່ານມາ ເພື່ອອະພິປາຍ ແລະ ລົງຄະແນນສຽງກ່ຽວກັບມະຕິທີ່ສະເໜີໂດຍເຢຍລະມັນ, ແບນຊິກ ແລະ ກູເວດ ວ່າດ້ວຍການຢຸດຍິງໃນແຂວງອິດລິບ ປະເທດຊີຣີ ເຊິ່ງຖືເປັນເຂດທີ່ໝັ້ນສຸດທ້າຍຂອງກຸ່ມກະບົດ ທີ່ຕັ້ງຢູ່ທາງພາກຕາເວັນອອກສຽງເໜືອຂອງຊີຣີ.

ເຖິງຢ່າງໃດກໍ່ຕາມ, ຮ່າງມະຕິບໍ່ຜ່ານການຮັບຮອງຈາກກອງປະຊຸມ ເຖິງແມ່ນວ່າຈະໄດ້ຮັບສຽງສະໜັບສະໜູນເຖິງ 12 ສຽງ ແລະ ງົດອອກສຽງ 1, ເນື່ອງຈາກລັດເຊຍ ແລະ ຈີນ ທີ່ເປັນ 2 ໃນ 5 ຂອງສະມາຊິກຖາວອນ UNSC ໃຊ້ອຳນາດຢຸດຢັ້ງຮ່າງມະຕິດັ່ງກ່າວ ເຊິ່ງຖືເປັນການໃຊ້ສິດຢຸດຄັ້ງຄັ້ງທີ 13 ຂອງລັດເຊຍ ແລະ ຄັ້ງທີ 7 ຂອງຈີນ ນັບຕັ້ງແຕ່ສົງຄາມຊີຣີ ເກີດຂຶ້ນເມື່ອເດືອນມີນາ 2011.

ໂດຍທ່ານ ວາສຊິລີ ເນເບນເຊຍ ເອກອັກຄະລັດຖະທິດລັດເຊຍກ່າວວ່າຮ່າງມະຕິດັ່ງກ່າວ ຂາດເນື້ອໃນສຳຄັນ ແລະ ມີບັນຫາທີ່ໜ້າສົງໄສ ນັ້ນກໍ່ຄືການຄຸ້ມຄອງກຸ່ມກໍ່ການຮ້າຍຕາມບັນຊີດຳຂອງ UNSC ເນື່ອງຈາກເນື້ອໃນຮ່າງມະຕິມີການຫ້າມປະຕິບັດການທາງທະຫານໃນພື້ນທີ່ ອັນເປັນການຂັດຂວາງຄວາມພະຍາຍາມຂອງລັດຖະບານຊີຣີ ໃນການຍຶດຄືນພື້ນທີ່ຈາກຝ່າຍກະບົດ.

ໃນດ້ານຂອງທ່ານ ຈາງ ຈຸນ ເອກອັກຄະລັດຖະທູດຈີນ ກ່າວວ່າປະຊາຄົມໂລກບໍ່ຄວນນຳບັນຫາທາງການເມືອງ ມາລວມກັບການຊ່ວຍເຫຼືອດ້ານມະນຸດສະທຳໃຫ້ແກ່ປະຊາຊົນຊີຣີ.

ສ່ວນທ່ານ ນາງ ແຄວລີ ຄຼາບ ເອກອັກຄະລັດຖະທູດສະຫະລັດ ອາເມຣິກາ ກ່າວວ່າປະເທດທີ່ໃຊ້ອຳນາດຢຸດຢັ້ງ ນຳເລື່ອງມະນຸດສະທຳມາເປັນພຽງຂໍ້ອ້າງ ໃນການໂຈມຕີກອງກຳລັງທີ່ຕໍ່ຕ້ານລັດຖະບານຊີຣີເທົ່ານັ້ນ.

ເຖິງຢ່າງໃດກໍ່ຕາມ, ມະຕິທີ່ລັດເຊຍ ແລະ ຈີນຮ່ວມກັນສະເໜີໃນເວລາຕໍ່ມາ ເຖິງແມ່ນບໍ່ມີຖ້ອຍຄຳກ່ຽວກັບການປະຕິບັດການທາງທະຫານ ເພື່ອຕໍ່ຕ້ານການກໍ່ການຮ້າຍ ໂດຍໃຊ້ຄຳວ່າ ຢຸດຕິການໂຈມຕີປະຊາຊົນ ແລະ ເຈົ້າໜ້າທີ່ບັນເທົາທຸກ ກໍ່ບໍ່ຜ່ານມະຕິຂອງກອງປະຊຸມເຊັ່ນກັນ ເນື່ອງຈາກອີກ 3 ປະເທດສະມາຊິກຖາວອນ UNSC ຄື: ສ.ອາເມຣິກາ, ອັງກິດ ແລະ ຝຣັ່ງໄດ້ໃຊ້ສິດຢຸດຢັ້ງໄວ້.