ສ.ອາເມຣິກາ ວ່າບໍ່ຕ້ອງການເຮັດສົງຄາມກັບອີຣານ, ອີຣານ ປະກາດວ່າກຽມພ້ອມສະເໝີ

ລາຍງານ 20 ກັນຍາ 2019, ທ່ານ ໄມ ພອມແພວ ລັດຖະມົນຕີກະຊວງການຕ່າງປະເທດສະຫະລັດ ອາເມຣິກາ ກ່າວເມື່ອວັນພະຫັດ 19 ກັນຍາ ທີ່່ຜານມາ ພາຍຫຼັງສຳເລັດການຢ້ຽມຢາມອາຣັບບີ ຊາອູດິດ ແລະ ສະຫະນະຄອນ ເອເມຣັດ ອາຣັບ (UAE) ຕັ້ງແຕ່ຕົ້ນອາທິດນີ້ ວ່າມີຄວາມເປັນເອກະພາບຈາກຫຼາຍປະເທດ ໃນພູມມິພາກຕາເວັນອອກາງ ວ່າອີຣານເປັນຜູ້ກໍ່ເຫດໂຈມຕີໂຮງກັ່ນນ້ຳມັນ 2 ແຫ່ງຂອງບໍລິສັດຊາອູດິອາຣາມໂກ ທີ່ຢູ່ທາງພາກຕາເວັນອອກຂອງອາຣັບບີ ຊາອູດິດ ເມື່ອວັນທີ 14 ກັນຍາ ທີ່ຜ່ານມາ, ເຖິງແມ່ນວ່າກຸ່ມກະບົດຮູຕີ ໃນເຢເມນຈະອອກມາຮັບວ່າເປັນຜູ້ລົງມືກໍ່ເຫດແລ້ວກໍ່ຕາມ.

ທ່ານ ໄມ ພອມແພວ ກ່າວວ່າລັດຖະບານ ສ.ອາເມຣິກາ ໄດ້ປຶກສາຫາລືກັບພັນທະມິດໃນຕາເວັນອອກກກາງ ເພື່ອຮ່ວມກັນສະແຫວງຫາແນວທາງສັນຕິ ໃນການຜ່ອນຄາຍບັນຍາກາດຄວາມເຄັ່ງຕຶງ ແລະ ຫຼີກລ້ຽງການປະເຊີນໜ້າທາງທະຫານກັບອີຣານ ພ້ອມທັງສະແດງຄວາມເຊື່ອໝັ້ນວ່າ ແນວທາງດັ່ງກ່າວຈະເກີດຂຶ້ນໄດ້ຈິງ ແຕ່ກໍ່ຍັງປະຕິເສດທີ່ຈະໃຫ້ຂໍ້ມູນເພີ່ມເຕີມ.

ຄຳຖະແຫຼງ ແລະ ທ່າທີດັ່ງກ່າວຂອງທ່ານ ໄມ ພອມແພວ ເກີດຂຶ້ນພາຍຫຼັງສົງຄາມຈິດຕະສາດທາງທະຫານ ລະຫວ່າງກອງທັບປະຕິວັດອີຣານ ກັບ ທ່ານ ໂດໂນ ທຣຳ ປະທານປະເທດ ສ.ອາເມຣິກາ ໂດຍກອງທັບປະຕິວັດອີຣານປະກາດວ່າ ຖານທັບ ແລະ ເຮືອບັນທຸກຍົນຮົບທຸກລຳໃນຕາເວັນອອກກາງຂອງ ສ.ອາເມຣິກາ ຢູ່ພາຍໃຕ້ລັດສະໝີການໂຈມຕີຂອງອີຣານ, ເຊິ່ງຜູ້ນຳ ສ.ອາເມຣິກາ ກໍ່ໄດ້ອອກມາຕອບໂຕ້ທັນທີ ວ່າຕົນໄດ້ສັ່ງໃຫ້ຝ່າຍຄວາມໝັ້ນຄົງລັອກເປົ້າອີຣານໄວ້ເຊັ່ນກັນ ກ່ອນທີ່ຈະຫຼຸດລະດັບຄວາມຮຸນແຮງຂອງຄຳເວົ້າລົງວ່າ ແທ້ຈິງແລ້ວຕົນບໍ່ໄດ້ຕ້ອງການສົງຄາມ ແລະ ກັບມາໃຊ້ວິທີການເດີມຄື ສັ່ງໃຫ້ກະຊວງການເງິນເພີ່ມມາດຕະການກົດດັນທາງເສດຖະກິດຕໍ່ອີຣານ.

ໃນອີກດ້ານໜຶ່ງ, ທ່ານ ໂມຮຳໝັດ ຈາວາດ ຊາຣີບ ລັດຖະມົນຕີກະຊວງການຕ່າງປະເທດອີຣານ ກ່າວວ່າອີຣານບໍ່ເຄີຍຕ້ອງການເຮັດສົງຄາມກັບຝ່າຍໃດ ແຕ່ກອງທັບຢູ່ໃນສະຖານະກຽມພ້ອມຂັ້ນສູງສຸດຕະຫຼອດເວລາ ເພື່ອປົກປ້ອງອະທິປະໄຕ ແລະ ພື້ນແຜ່ນດິນອັນຄົບຖ້ວນ ແຕ່ຫາກອີຣານຖືກໂຈມຕີກ່ອນບໍ່ວ່າດ້ວຍວິທີໃດ ແລະ ຈາກຝ່າຍໃດກໍ່ຕາມ ສະຖານະການກໍ່ມີທິດທາງບານປາຍໄປເປັນສົງຄາມໄດ້.