ກອງທັບຕອບໂຕ້ ພວກຂ່າວບິດເບືອນອອນລາຍ ທີ່ວ່າທາງການບໍ່ໃສ່ໃຈຊ່ວຍເຫຼືອປະຊາຊົນທີ່ຖືກນ້ຳຖ້ວມ

ໜັງສືພິມກອງທັບປະຊາຊົນລາວລາຍງານວ່າ: ຕໍ່ກັບຂ່າວບິດເບືອນໃສ່ຮ້າຍປ້າຍສີຂອງກຸ່ມຄົນບໍ່ຫວັງດີ ແລະ ປັ່ນປ່ວນໃນສັງຄົມ ໃຫ້ເຂົ້າໃຈຜິດຕໍ່ການຊ່ວຍເຫຼືອຜູ້ປະສົບໄພນ້ໍາຖ້ວມ, ເມື່ອວັນທີ 18 ກັນຍາ ທີ່ຜ່ານມາ ທ່ານ ພັນເອກ ສິງຄໍາ ພິມມະວົງ ຫົວໜ້າຫ້ອງການບໍລິຫານກົມໃຫຍ່ການເມືອງກອງທັບກ່າວວ່າ: ຕໍ່ກັບສື່ສັງຄົມອອນລາຍຂອງພວກບໍ່ຫວັງດີ ໄດ້ອອກຂ່າວບິດເບືອນໃສ່ຮ້າຍປ້າຍສີ, ໂດຍອ້າງວ່າມີສຽງຈົ່ມຈາກຜູ້ປະສົບໄພບໍ່ໄດ້ຮັບການ ຊ່ວຍເຫຼືອຈາກຂັ້ນເທິງ ແມ່ນບໍ່ມີມູນຄວາມຈິງ, ເປັນການປັນປ່ວນຂອງກຸ່ມຄົນບໍ່ຫວັງດີ.

ຈາກການລົງເກັບກຳຕົວຈິງເຫັນວ່າ: ກຳລັງທຸກພາກສ່ວນໄດ້ມີການຮ່ວມໄມ້ຮ່ວມມືກັນ ແລະ ມີການວາງແຜນຢ່າງລະອຽດ ແຕ່ຂັ້ນສູນກາງລົງຮອດທ້ອງຖິ່ນ, ຄະນະຮັບຜິດຊອບທີ່ກ່ຽວຂ້ອງທຸກຂັ້ນ ໄດ້ມີການເຄື່ອນໄຫວເຮັດໜ້າທີ່ ດ້ວຍຄວາມຮັບຜິດຊອບສູງ ແລະ ລາຍງານສະພາບການໃຫ້ຂັ້ນເທິງໄດ້ຮັບຊາບຢ່າງຕໍ່ເນື່ອງ, ຕິດຕາມກວດກາສະພາບອາກາດ, ລະດັບນ້ຳຕະຫຼອດ 24 ຊົ່ວໂມງ, ອອກແຈ້ງການໂຄສະນາຜ່ານສື່ຕ່າງໆ ແລະ ປະກາດທາງໂທລະໂຄ່ງປະຈໍາແຕ່ລະທ້ອງຖິ່ນໃນການຮັບມື, ກອບກູ້ ແລະ ຊ່ວຍເຫຼືອຜູ້ປະສົບໄພໃຫ້ວ່ອງໄວ ທັນການ, ທຸກພາກສ່ວນໄດ້ສຸມໃສ່ລະດົມກຳລັງແຮງ ແລະ ພາຫະນະເຂົ້າໃນການກອບກູ້ຊີວິດ ແລະ ປ້ອງກັນຮັກສາຊັບສິນຂອງພໍ່ແມ່ປະຊາຊົນເອົາໄວ້ໂດຍໄວ.

ໂດຍສະເພາະກໍາລັງປະກອບອາວຸດ ແມ່ນເປັນກຳລັງຫຼັກໃນການກອບກູ້ໄພນ້ຳຖ້ວມຄັ້ງນີ້, ເຊິ່ງຫຼັງຈາກໄດ້ຮັບຄຳສັ່ງຈາກຂັ້ນເທິງແລ້ວກໍ່ໄດ້ຮີບຮ້ອນຈັດຕັ້ງກຳລັງພົນ ແລະ ເຫຼົ່າຮົບວິຊາສະເພາະລົງຊ່ວຍເຫຼືອຢ່າງຮີບດ່ວນ ໂດຍສົມທົບກັບອໍານາດການປົກຄອງເຂດທີ່ເກີດໄພນໍ້າຖ້ວມເລັ່ງລັດຈັດຕັ້ງກໍາລັງຂອງຕົນລົງກອບກູ້ຊ່ວຍເຫຼືອປະຊາຊົນ ແລະ ເຄື່ອນຍ້າຍອອກຈາກພື້ນທີ່ອັນຕະລາຍ, ຈົນມາຮອດວັນທີ 5 ກັນຍາ, ກໍາລັງປະກອບອາວຸດໄດ້ພົບຄວາມຫຍຸ້ງຍາກຫຼາຍດ້ານ ເນື່ອງຈາກລະດັບນ້ໍາຖ້ວມເພີ່ມຂຶ້ນສູງ ແລະ ມີນໍ້າໄຫຼຊຸແຮງ ຈຶ່ງໄດ້ເພີ່ມກຳລັງ ແລະ ພາຫະນະ, ໂດຍໄດ້ນຳໃຊ້ຍົນລຳລຽງສະບຽງອາຫານ ແລະ ເຄື່ອນຍ້າຍພໍ່ແມ່ປະຊາຊົນອອກຈາກພື້ນທີ່ອັນຕະລາຍ, ເມື່ອຫຼາຍມື້ຕໍ່ມາລະດັບນ້ຳໄດ້ຫຼຸດລົງກຳລັງປະກອບອາວຸດ ແລະ ພາກສ່ວນອື່ນໆ ກໍ່ຍັງໄດ້ສືບຕໍ່ໃຫ້ການຊ່ວຍເຫຼືອດ້ານກຳລັງ ແລະ ພາຫະນະເຂົ້າໃນການຟື້ນຟູປົວແປງເຮືອນຊານບ້ານຊ່ອງ, ພື້ນທີ່ທຳການຜະລິດ, ລົງຢ້ຽມຢາມໃຫ້ກຳລັງໃຈ, ແຈກຢາຍອາຫານ ແລະ ຊ່ວຍເຫຼືອວັດຖຸປັດໄຈໃນເບື້ອງຕົ້ນ, ລົງ ກວດກາ, ປິ່ວປົວສຸຂະພາບ ແລະ ອື່ນໆ ແນໃສ່ເຮັດໃຫ້ຊີວິດການເປັນຢູ່ຂອງພໍ່ແມ່ປະຊາຊົນເຂດນ້ຳຖ້ວມໃຫ້ໄດ້ຮັບການຟື້ນຟູ ແລະ ກັບຄືນສູ່ສະພາບປົກກະຕິໂດຍໄວ.

ທ່ານ ບຸນກອງ ວົງສາຍແພງ ນາຍບ້ານວິໄຊສົງ ເມືອງສອງຄອນ ແຂວງສະຫວັນນະເຂດບອກ ກ່າວກັບນັກຂ່າວວ່າ: ຢູ່ໃນຂອບເຂດ ອ້ອມແອມບ້ານວິໄຊສົງມີ 4 ບ້ານ ທີ່ໄດ້ຮັບຜົນກະທົບຈາກນ້ໍາຖ້ວມໜັກສຸດເລີ່ມແຕ່ວັນທີ 1 ກັນຍາ, ເຊິ່ງຜ່ານມາ ທາງການເພີ່ນໄດ້ມີການແຈ້ງເຕືອນໃຫ້ພໍ່ແມ່ປະຊາຊົນເຄື່ອນຍ້າຍຊັບສິນມີຄ່າອອກຈາກພື້ນທີ່ໂດຍດ່ວນແລ້ວ ແຕ່ຍ້ອນຄວາມເຊື່ອຂອງປະຊາຊົນ ໃນການດຳລົງຊີວິດຕິດພັນກັບແມ່ນ້ຳແຕ່ນ້ອຍຈົນໃຫຍ່ໃນເຂດດັ່ງກ່າວບໍ່ເຄີຍມີນ້ຳຖ້ວມໜັກປານນີ້ມາກ່ອນ, ຈຶ່ງເຮັດໃຫ້ພໍ່ແມ່ປະຊາຊົນຖືເບົາໃນການກະກຽມ ແລະ ຮັບມືກັບໄພນ້ຳຖ້ວມຄັ້ງນີ້ຊັກຊ້າຈົນສ້າງຄວາມເສຍຫາຍ ແກ່ຊີວິດ ແລະ ຊັບສິນມີຄ່າຂອງພໍ່ແມ່ປະຊາຊົນເປັນຈຳນວນຫຼາຍ. ແຕ່ເຖິງຢ່າງໃດກໍ່ຕາມ ທຸກພາກສ່ວນກໍ່ໄດ້ໃຫ້ການຊ່ວຍເຫຼືອຢ່າງສຸດຂີດ, ສະເພາະ ກຳລັງປະກອບອາວຸດ ໄດ້ລະດົມກຳລັງ ແລະ ພາຫະນະຊ່ວຍກອບກູ້ຊ່ວຍເຫຼືອປະຊາຊົນເຮົາຢ່າງວ່ອງໄວທັນການ ສາມາດຮັກສາຊີວິດ ແລະ ຊັບສິນຂອງພໍ່ແມ່ປະຊາຊົນໄດ້ເປັນຈຳນວນຫຼວງຫຼາຍ.