ສ.ອາເມຣິກາ ເສີມກຳລັງທະຫານ ແລະ ອາວຸດໃນຊາອູດິດ ເພື່ອຄ້ຳຢັນກັບອີຣານ

ລາຍງານ 21 ກັນຍາ 2019, ທ່ານ ມາກ ເອສເປີ ລັດຖະມົນຕີກະຊວງປ້ອງກັນປະເທດສະຫະລັດ ອາເມຣິກາ ຖະແຫຼງເມື່ອວັນສຸກ 20 ກັນຍາ ທີ່ຜ່ານມາ ວ່າໄດ້ຮັບອະນຸມັດຈາກທຳນຽບຂາວ ແລະ ເປັນໄປຕາມການຮ້ອງຂໍຈາກອາຣັບບີ ຊາອູດິດ ໃຫ້ກອງທັບສະຫະລັດ ອາເມຣິກາ ເພີ່ມກຳລັງທະຫານ ແລະ ອາວຸດຍຸດໂທປະກອນທີ່ຈຳເປັນ ເພື່ອເຂົ້າປ້ອງກັນ ແລະ ສະກັດກັ້ນການໂຈມຕີທາງອາກາດ, ໂດຍນອກຈາກການຂໍຄວາມຊ່ວຍເຫຼືອຂອງລັດຖະບານອາຣັບບີ ຊາອູດິດແລ້ວ, ລັດຖະບານ ສ.ອາເມຣິກາ ໄດ້ຮັບການຕິດຕໍ່ແບບດຽວກັນນີ້ຈາກສະຫະນະຄອນ ເອເມຣັດ ອາຣັບ (UAE) ອີກດ້ວຍ ແລະ ຈະດຳເນີນການຕາມການຮ້ອງຂໍຂອງລັດຖະບານ UAE ເຊັ່ນກັນ ເພື່ອຍົກລະດັບຄວາມສາມາດດ້ານການປ້ອງກັນຕົນເອງຂອງທັງສອງປະເທດ ແລະ ການປົກປ້ອງລະບົບພື້ນຖານໂຄງລ່າງຂອງປະເທດ.

ເຖິງແມ່ນວ່າທ່ານ ມາກ ເອສເປີ ບໍ່ໄດ້ລະບຸໄລຍະເວລາ, ຈຳນວນທະຫານ ແລະ ຊະນິດຂອງອາວຸດທີ່ຈະສົ່ງເຂົ້າໄປອາຣັບບີ ຊາອູດິດ ແລະ UAE ນອກເໜືອຈາກກອງເຮືອທີ່ລອຍລຳຢູ່ໃນເຂດນ່ານນ້ຳສາກົນອ່າວເປີເຊຍ, ການເຄື່ອນໄຫວທີ່ກຳລັງຈະເກີດຂຶ້ນນີ້ຈະຍິ່ງສ້າງຄວາມບໍ່ພໍໃຈໃຫ້ແກ່ອີຣານຢ່າງແນ່ນອນ ເນື່ອງຈາກເປັນການປະກາດພຽງອາທິດດຽວ ພາຍຫຼັງທີ່ເກິດເຫດຝູງໂດຣນ ໂຈມຕີໂຮງກັ່ນນ້ຳມັນຂະໜາດໃຫຍ່ 2 ແຫ່ງຂອງບໍລິສັດຊາອູດິອາຣາມໂກ ຕັ້ງຢູ່ພາກຕາເວັນອອກຂອງອາຣັບບີ ຊາອູດິດ ເຊິ່ງທັງລັດຖະບານອາຣັບບີ ຊາອູດິດ, ສ.ອາເມຣິກາ ແລະ ພັນທະມິດໃນພູມມິພາກປະສານສຽງກ່າວຫາອີຣານ ວ່າກ່ຽວຂ້ອງໂດຍກົງ ບໍ່ແມ່ນກຸ່ມກະບົດຮູຕີໃນເຢເມນ ເຖິງແມ່ນວ່າກຸ່ມດັ່ງກ່າວຈະອອກມາຍອມຮັບວ່າເປັນຜູ້ລົງມືກໍ່ເຫດກໍ່ຕາມ.

ໃນວັນດຽວກັນ, ກະຊວງການເງິນ ສ.ອາເມຣິກາ ອອກຖະແຫຼງການເລື່ອງການຂຶ້ນບັນຊີດຳຕໍ່ທະນາຄານກາງອີຣານ ໂດຍລະບຸເຫດຜົນວ່າ ສະຖາບັນການເງິນແຫ່ງນີ້ໃຫ້ການສະໜັບສະໜູນກຸ່ມກໍ່ການຮ້າຍ ຄືກອງກຳລັງນັກຮົບຄຸດ ເຊິ່ງເປັນໜ່ວຍຮົບພິເສດໃນຕ່າງປະເທດຂອງກອງທັບປະຕິວັດອີຣານ ແລະ ກຸ່ມຮິສບອນເລາະ ເຊິ່ງຖືເປັນມາດຕະການຂວ້ຳບາດລະດັບຮຸນແຮງທີ່ສຸດເທົ່າທີ່ລັດຖະບານ ສ.ອາເມຣິກາ ເຄີຍບັງຄັບໃຊ້ກັບອີຣານ ເນື່ອງຈາກເປັນການປິດປະຕູຊ່ອງທາງການເຮັດທຸລະກຳຂອງລັດຖະບານອີຣານເກືອບທັງໝົດ.

ເຖິງຢ່າງໃດກໍ່ຕາມ, ທ່ານ ໂດໂນ ທຣຳ ປະທານປະເທດ ສ.ອາເມຣິກາ ກ່າວຫຼັງຈາກນັ້ນວ່າ ຕົນບໍ່ມີແຜນໃຊ້ມາດຕະການທາງທະຫານຕໍ່ອີຣານ, ແຕ່ກ່ອນໜ້ານັ້ນບໍ່ເທົ່າໃດວັນ ໄດ້ກ່າວວ່າໄດ້ສັ່ງໃຫ້ກອງທັບ ສ.ອາເມຣິກາ ລັອກເປົ້າໂຈມຕີອີຣານ ຕອບໂຕ້ການທີ່ກອງທັບປະຕິບັດອີຣານ ທີ່ກ່າວວ່າ ຖານທັບ ສ.ອາເມຣິກາ ທຸກແຫ່ງໃນຕາເວັນອອກກາງ ຢູ່ພາຍໃຕ້ລັດສະໝີການໂຈມຕີ.