ຜູ້ນຳອີຣານກ່າວ ບັນຫາຕາເວັນອອກກາງຕ້ອງແກ້ກັນພາຍໃນ ຊາດພາຍນອກບໍ່ຄວນມາກ່ຽວຂ້ອງ

ລາຍງານ 23 ກັນຍາ 2019, ທ່ານ ຮັສຊັນ ໂຣຮານີ ປະທານປະເທດອີຣານ ກ່າວເມື່ອວັນອາທິດ ທີ່ຜ່ານມາ ໃນພິທີລະນຶກຄົບຮອບ 39 ປີ ສົງຄາມລະຫວ່າງອີຣານ ກັບ ອິຣັກ ວ່າການເຂົ້າມາໃນພູມມິພາກຕາເວັນອອກກາງຂອງກອງກຳລັງຕ່າງຊາດ ມີແຕ່ຈະສ້າງບັນຍາຄວາມປອດໄພ ແລະ ການຂາດສະຖຽນລະພາບບໍ່ພຽງແຕ່ສະເພາະກັບອີຣານ ແຕ່ຍັງລວມເຖິງທຸກປະເທດໃນຕາເວັນອອກກາງ, ສະຖານະການໃນພູມມິພາກຕອນນີ້ມີຄວາມລະອຽດອ່ອນເປັນຢ່າງຍິ່ງ, ອີຣານສະແດງອອກຢ່າງຊັດເຈນຫຼາຍຄັ້ງແລ້ວຕໍ່ບັນດາປະເທດເພື່ອນບ້ານວ່າ ອີຣານເປັນທັງພັນທະມິດ ແລະ ບ້ານພີ່ເມືອງນ້ອງ ດ້ວຍເຫດນີ້ຫາກຜູ້ທີ່ບໍ່ກ່ຽວຂ້ອງ ມີຄວາມຈິງໃຈຕໍ່ຕາເວັນອອກກາງແທ້ ຂໍໃຫ້ຢຸດຕິການໃຊ້ພູມມິພາກນີ້ເປັນສະຖານທີ່ແຂ່ງຂັນສະສົມອາວຸດ.

ຂະນະດຽວກັນ, ຜູ້ນຳອີຣານກ່າວອີກວ່າ ສະຖຽນລະພາບ ແລະ ຄວາມໝັ້ນຄົງຂອງຕາເວັນອອກກາງ ທີ່ລວມເຖິງກຸ່ມປະເທດໃນເຂດອ່າວເປີເຊຍ ຕ້ອງມາຈາກພາຍໃນ.

ໃນງານລະນຶກ 39 ປີ ສົງຄາມລະຫວ່າງອີຣານ ກັບ ອິຣັກ ກະຊວງປ້ອງກັນປະເທດອີຣານ ແລະ ກອງທັບປະຕິວັດອີຣານ ໄດ້ມີພິທີສວນສະໜາມສະແດງແສນຍານຸພາບທາງທະຫານ ທີ່ລວມເຖິງການເປີດຕົວຂີປະນາວຸດຂ້າມທະວີບ Kaman 12 ທີ່ໄດ້ຮັບການພັດທະນາໃຫ້ມີພິໄສການຍິງໄກເຖິງ 1,000 ກິໂລແມັດ ແລະ ລະບົບຣາດາທີ່ສາມາດກວດຈັບທຸ່ນລະເບີດໃຕ້ດິນ.

ໃນດ້ານຂອງທ່ານ ໂມຣຳໝັດ ຈາວາດ ຊາຣີບ ລັດຖະມົນຕີກະຊວງການຕ່າງປະເທດອີຣານ ກ່າວວ່າທ່ານ ຮັສຊັນ ໂຣຮານີ ຈະນຳສະເໜີ “ແຜນຍຸດທະສາດສັນຕິພາບຮໍມຸສ” ຕໍ່ກອງປະຊຸມສະມັດຊາໃຫຍ່ສະຫະປະຊາຊາດ ທີ່ນະຄອນນິວຢອກ ໃນອາທິດນີ້, ສ່ວນທ່ານ ໄມ ພອມແພວ ລັດຖະມົນຕີກະຊວງການຕ່າງປະເທດສະຫະລັດ ອາເມຣິກາ ກ່າວວ່າທ່ານ ໂດໂນ ທຣຳ ປະທານປະເທດ ສ.ອາເມຣິກາ ຈະນຳສະເໜີ “ແຜນການ” ຂອງລັດຖະບານ ສ.ອາເມຣິກາ ຕໍ່ກອງປະຊຸມສະມັດຊາໃຫຍ່ສະຫະປະຊາຊາດເຊັ່ນກັນ ພ້ອມທັງກ່າວຢ້ຳວ່າ ສ.ອາເມຣິກາ ບໍ່ຕ້ອງການໃຊ້ມາດຕະການທາງທະຫານ.

ເຊິ່ງສະຖານະການໃນຕາເວັນອອກາງເຄັ່ງຕຶງຂຶ້ນອີກຂັ້ນໜຶ່ງ ນັບຕັ້ງແຕ່ອາທິດທີ່ຜ່ານມາ ເມື່ອເກີດເຫດຝູງໂດຣນ ໂຈມຕີໂຮງກັ່ນນ້ຳມັນ 2 ແຫ່ງຂອງບໍລິສັດຊາອູດິອາຣາມໂກ ໃນພາກຕາເວັນອອກຂອງອາຣັບບີ ຊາອູດິດ ເມື່ອວັນທີ 14 ກັນຍາ ທີ່ຜ່ານມາ ພາຍຫຼັງເກດເຫດ ສ.ອາເມຣິກາ ກ່າວຫາວ່າອີຣານເປັນຜູ້ກະທຳ ແລະ ປະກາດເສີມທັບທັງກຳລັງພົນ ແລະ ອາວຸດໃນອາຣັບບີ ຊາອູດິດ.