ຄະນະຜູ້ແທນ ສປປ.ລາວ ເຂົ້າຮ່ວມກອງປະຊຸມ UN ວ່າດ້ວຍການປ່ຽນແປງສະພາບດິນຟ້າອາກາດ

ກະຊວງການຕ່າງປະເທດລາຍງານວ່າ: ໃນວັນທີ 23 ກັນຍາ 2019 ທີ່ຜ່ານມາ ຄະນະຜູ້ແທນ ສປປ.ລາວ ນຳໂດຍ ທ່ານ ສະເຫຼີມໄຊ ກົມມະສິດ ລັດຖະມົນຕີກະຊວງການຕ່າງປະເທດ ໄດ້ເຂົ້າຮ່ວມກອງປະຊຸມສຸດຍອດວ່າດ້ວຍການປ່ຽນແປງດິນຟ້າອາກາດ (Climate Action Summit 2019) ເຊິ່ງໄດ້ຈັດຂື້ນທີ່ສຳນັກງານໃຫຍ່ອົງການສະຫະປະຊາຊາດ (UN) ທີ່ນະຄອນນິວຢອກ, ສະຫະລັດ ອາເມຣິກາ ພາຍໃຕ້ຄຳຂວັນ “ການຕໍ່ສູ້ທີ່ພວກເຮົາເອົາຊະນະໄດ້ ແລະ ຕ້ອງຊະນະ: A Race We Can Win. A Race We Must Win”, ໂດຍມີຜູ້ນຳຂັ້ນສູງຈາກປະເທດສະມາຊິກ UN, ອົງການຈັດຕັ້ງສາກົນທີ່ເຮັດວຽກຕິດພັນກັບການປ່ຽນແປງດິນຟ້າອາກາດ, ອົງການຈັດຕັ້ງທາງສັງຄົມ ແລະ ພາກທຸລະກິດເຂົ້າຮ່ວມ.

ຈຸດປະສົງຂອງກອງປະຊຸມຄັ້ງນີ້ ແມ່ນເພື່ອປຶກສາຫາລືລະດັບສູງໃນການແກ້ໄຂບັນຫາການປ່ຽນແປງດິນຟ້າອາກາດ ແລະ ຊຸກຍູ້ການຈັດຕັ້ງປະຕິບັດສັນຍາປາຣີ ວ່າດ້ວຍການປ່ຽນແປງດິນຟ້າອາກາດ ໃຫ້ໄວຂຶ້ນຕື່ມ ແລະ ເປັນຮູບປະທຳຕາມລະດັບຄາດໝາຍ.

ໃນໂອກາດດັ່ງກ່າວ, ທ່ານ ແອນໂຕນິໂອ ກູເຕເຣສ ເລຂາທິການໃຫຍ່ UN ໄດ້ຮຽກຮ້ອງໃຫ້ປະເທດສະມາຊິກ ເພີ່ມທະວີຄວາມພະຍາຍາມໃນການຈັດຕັ້ງປະຕິບັດແຜນງານແຫ່ງຊາດ ໃນການປະກອບສ່ວນແກ້ໄຂບັນຫາການປ່ຽນແປງດິນຟ້າອາກາດຂອງແຕ່ລະປະເທດ ໃຫ້ປະກົດຜົນເປັນຈິງ ພາຍໃນປີ 2020 ເພື່ອຫຼຸດຜ່ອນການປ່ອຍທາດອາຍເຮືອນແກ້ວໃຫ້ໄດ້ 45% ພາຍໃນທົດສະວັດໜ້າ ພ້ອມທັງວາງເປົ້າໝາຍຫຼຸດຜ່ອນການປ່ອຍ ແລະ ການດູດຊຶມຊັບທາດອາຍເຮືອນແກ້ວໃຫ້ເປັນສູນ ພາຍໃນປີ 2050 ຕາມທີ່ໄດ້ກຳນົດໄວ້ໃນສັນຍາປາຣີ ວ່າດ້ວຍການປ່ຽນແປງດິນຟ້າອາກາດ.

ກອງປະຊຸມຄັ້ງນີ້ຍັງໄດ້ຕີລາຄາວ່າ ການປ່ຽນແປງຂອງດິນຟ້າອາກາດໃນປັດຈຸບັນໄດ້ກາຍເປັນໄພຂົ່ມຂູ່ຕໍ່ມວນມະນຸດ, ອຸນຫະພູມຂອງໂລກຮ້ອນແຮງຂຶ້ນກວ່າປົກກະຕິ, ລະດູໜາວໃນມະຫາສະໝຸດອາກຕິກມີອຸນຫະພູມເພີ່ມຂຶ້ນ 3 ອົງສາເຊ ນັບແຕ່ປີ 1991 ເປັນຕົ້ນມາ, ລະດັບນໍ້າທະເລເພີ່ມຂຶ້ນຢ່າງຕໍ່ເນື່ອງ, ປະຊາກອນໂລກພວມປະເຊີນໜ້າກັບໄພຂົ່ມຂູ່ຈາກການປ່ຽນແປງດິນຟ້າອາກາດ ເຊິ່ງຈະເປັນຜົນກະທົບໂດຍກົງຕໍ່ການດຳລົງຊີວິດ, ສຸຂະພາບ ແລະ ການຄ້ຳປະກັນສະບຽງອາຫານ ພ້ອມທັງເຮັດໃຫ້ເກີດຄວາມເສຍຫາຍທາງດ້ານເສດຖະກິດ-ສັງຄົມ ແລະ ສິ່ງແວດລ້ອມໃນປັດຈຸບັນ ແລະ ອະນາຄົດ.

ຕໍ່ບັນຫາດັ່ງກ່າວຄະນະຜູ້ແທນກອງປະຊຸມໄດ້ໃຫ້ທັດສະນະວ່າ ບັນຫາດັ່ງກ່າວສາມາດແກ້ໄຂໄດ້ ຖ້າພວກເຮົາຮ່ວມມືກັນຫຼຸດຜ່ອນການປ່ອຍທາດອາຍເຮືອນແກ້ວ ພາຍໃນ 10 ປີຂ້າງໜ້າ ແລະ ຫຼຸດຜ່ອນການເພີ່ມຂຶ້ນຂອງອຸນຫະພູມໂລກໃຫ້ຫຼຸດລົງຈາກ 2 ອົງສາເຊ ມາເປັນ 1.5 ອົງສາເຊ ຂອງໄລຍະກ່ອນຍຸກອຸດສະຫະກຳ. ຜົນໄດ້ຮັບຂອງກອງປະຊຸມດັ່ງກ່າວ ຈະຖືກນຳໄປສະເໜີຕໍ່ກອງປະຊຸມລັດພາຄີສົນທິສັນຍາ ວ່າດ້ວຍ ການປ່ຽນແປງດິນຟ້າອາກາດ ຄັ້ງທີ 25 (COP25) ເຊິ່ງຈະຈັດຂຶ້ນໃນເດືອນທັນວາ 2019 ທີ່ ປະເທດຈີເລ. ໃນໂອກາດເຂົ້າຮ່ວມກອງປະຊຸມຄັ້ງນີ້, ຄະນະຜູ້ແທນ ສປປ.ລາວ ກໍ່ໄດ້ເອົາໃຈໃສ່ປະກອບສ່ວນຢ່າງຫ້າວຫັນ ແລະ ໃຫ້ຄຳໝັ້ນໝາຍໃນການຮ່ວມມືກັບວົງຄະນະຍາດສາກົນເພື່ອແກ້ໄຂກັບບັນຫາການປ່ຽນແປງດິນຟ້າອາກາດ.

ໃນໄລຍະເຂົ້າຮ່ວມກອງປະຊຸມດັ່ງກ່າວ,​ ທ່ານ ນາງ ບຸນຄໍາ ວໍລະຈິດ ຮອງລັດຖະມົນຕີກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ກໍ່ໄດ້ເຂົ້າຮ່ວມກອງປະຊຸມລະດັບລັດຖະມົນຕີ ກ່ຽວກັບການລົງທຶນເຂົ້າໃສ່ການປັບຕົວເຂົ້າກັບການປ່ຽນແປງດິນຟ້າອາກາດ ໂດຍຜ່ານກອງທຶນການປ່ຽນແປງດິນຟ້າອາກາດສຳລັບປະເທດດ້ອຍພັດທະນາ, ກອງປະຊຸມຍັງໄດ້ນຳສະເໜີການເປັນຄູ່ຮ່ວມມືຈັດຕັ້ງປະຕິບັດແຜນງານແຫ່ງຊາດ ໃນການປະກອບສ່ວນແກ້ໄຂບັນຫາການປ່ຽນແປງດິນຟ້າອາກາດຂອງແຕ່ລະປະເທດ ແລະ ກອງປະຊຸມປິ່ນອ້ອມອື່ນໆ.

ໃນມື້ດຽວກັນນີ້,​ ຄະນະຜູ້ແທນ ສປປ.ລາວ ຍັງໄດ້ເຂົ້າຮ່ວມກອງປະຊຸມລະດັບສູງ UN ວ່າດ້ວຍວຽກງານສາທາລະນະສຸກ ພາຍໃຕ້ຫົວຂໍ້ “ການປະກັນສຸຂະພາບທົ່ວປວງຊົນ: ກ້າວໄປພ້ອມກັນເພື່ອເຮັດໃຫ້ສຸຂະພາບຂອງທຸກຄົນດີຂຶ້ນ (Universal Health Coverage: Moving Together to Build a Healthier World)” ເຊິ່ງຖືກຈັດຂຶ້ນເປັນຄັ້ງທຳອິດ ພາຍຫຼັງທີ່ UN ໄດ້ຮັບຮອງເອົາບັນຫາດັ່ງກ່າວເປັນບັນຫາສາກົນໃນປີ 2015 ເພື່ອພ້ອມກັນຕີລາຄາຄືນການຈັດຕັ້ງປະຕິບັດບັນດາພັນທະສັນຍາ ແລະ ຄາດໝາຍສູ້ຊົນຕ່າງໆ.

HTML tutorial