ສຸດອະລັງການ ສປ.ຈີນ ເປີດໃຊ້ສະໜາມບິນສາກົນຕ້າຊິງ ຢ່າງເປັນທາງການແລ້ວ

ລາຍງານເມື່ອວັນທີ 25 ກັນຍາ 2019 ທີ່ຜ່ານມາ, ທ່ານ ສີ ຈິ້ນຜິງ ປະທານປະເທດຈີນ ເປັນປະທານໃນພິທີເປີດສະໜາມບິນສາກົນປັກກິ່ງ ຕ້າຊິງ ຫຼື ສະໜາມບິນຕ້າຊິງ ເຊິ່ງຢູ່ຫ່າງຈາກຈັດຕຸລັດທຽນອັນເໝິນ ໃນນະຄອນຫຼວງປັກກິ່ງ ໄປທາງທິດໃຕ້ 46 ກິໂລແມັດຢ່າງເປັນທາງການ ໂດຍມີຖ້ຽວບິນປະຖົມມະເລີກ ເປັນຍົນແອບັສ A380 ຂອງສາຍການບິນ China Southern ທີ່ອອກເດີນທາງໄປຍັງເມືອງກວາງໂຈວ ມົນທົນກວາງຕຸ້ງ ທາງພາກໃຕ້ຂອງຈີນ, ກ່ອນຈະຕາມດ້ວຍສາຍການບິນອື່ນໆຂອງຈີນອີກ 6 ຖ້ຽວບິນ ອອກເດີນທາງສູ່ນະຄອນຊຽງໄຮ ແລະ ເມືອງອື່ນໆໃນປະເທດ.

ສະໜາມບິນຕ້າຊິງ ທີ່ເນື້ອທີ່ 700,000 ຕາລາງແມັດ ໃຊ້ເວລາກໍ່ສ້າງບໍ່ເຖິງ 5 ປີ ດ້ວຍງົບປະມານ 120,000 ລ້ານຢວນ ແຕ່ຖ້າລວມການກໍ່ສ້າງທາງລົດໄຟ ແລະ ເສັ້ນທາງເຊື່ອມຈອດສູ່ຕົວເມືອງ ມູນຄ່າໂຄງການທັງໝົດຈະເທົ່ານກັບ 400,000 ລ້ານຢວນ, ໃຕ້ຕົວອາຄານສະໜາມບິນມີສະຖານີລົດໄຟ ທັງລົດໄຟໜ້າດິນ ແລະ ໃຕ້ດິນ ເຊື່ອມຕໍ່ເຂົ້າສູ່ນະຄອນຫຼວງປັກກິ່ງ ເຊິ່ງຜູ້ໂດຍສານໃຊ້ເວລາເດີນທາງປະມານ 20 ນາທີ.

ອາຄານສະໜາມບິນຕ້າຊິງ ອອກແບບໂດຍທ່ານ ນາງ ຊາຮາ ຮາດິດ ສະຖາປະນິກຊື່ດັ່ງຊາວອັງກິດເຊື່ອສາຍອິຣັກ, ຮູບຊົງນົກຍັກໃນຕຳນານ “ຟີນິກ” ແຕ່ຫຼາຍຄົນບອກວ່າຄືກັບ “ປາດາວ” ຫຼາຍກວ່າ, ໃນຂັ້ນທຳອິດລານແລ່ນຂຶ້ນ-ລົງ ມີ 4 ຊ່ອງທາງ ຕັ້ງເປົ້າຮອງຮັບຜູ້ໂດຍສານປີລະ 72 ລ້ານຄົນ ພາຍໃນປີ 2025 ແລະ ຈະຂະຫຍາຍອອກເປັນ 8 ຊ່ອງທາງ ເພື່ອຮອງຮັບຜູ້ໂດຍສານປີລະປະມານ 100 ລ້ານຄົນ ພາຍໃນປີ 2037.

ເຊິ່ງຜູ້ຊ່ຽວຊານຄາດຄະເນວ່າ ຈີນຈະແຊງໜ້າສະຫະລັດ ອາເມຣິກາ ກາຍເປັນຕະຫຼາດການບິນໂດຍສານຂະໜາດໃຫຍ່ທີ່ສຸດຂອງໂລກ ພາຍໃນປີ 2022, ສະໜາມບິນຕ້າຊິງຈະຊ່ວຍຫຼຸດຜ່ອນຄວາມແອອັດ ຂອງສະໜາມບິນສາກົນປັກກິ່ງ ເຊິ່ງຢູ່ທາງຕາເວັນອອກສຽງເໜືອຂອງນະຄອນຫຼວງ, ນອກຈາກນັ້ນຍັງຈະຊ່ວຍອຳນວຍຄວາມສະດວກໃນການເດີນທາງ ສຳລັບປະຊາຊົນໃນເຂດມົນທົນເຫີເປີຍ ແລະ ນະຄອນທຽນສິນ ທີ່ຢູ່ໃກ້ຄຽງ ດ້ວຍລະບົບລົດໄຟໂດຍສານ, ລົດໄຟໃຕ້ດິນ ແລະ ລົດໂດຍສານສາທາລະນະ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube