ອີຣານຈະບໍ່ເຈລະຈາກັບ ສ.ອາເມຣິກາ ຕາບໃດທີ່ຍັງຂວໍ້າບາດ ແລະ ກົດດັນຢູ່

ລາຍງານ 26 ກັນຍາ 2019, ທ່ານ ຮັສຊັນ ໂຣຮານີ ປະທານປະເທດອີຣານ ກ່າວຖະແຫຼງຕໍ່ກອງປະຊຸມສະມັດຊາໃຫຍ່ສະຫະປະຊາຊາດ (UNGA) ຄັ້ງທີ 74 ທີ່ນະຄອນນິວຢອກ, ສະຫະລັດ ອາເມຣິກາ ເມື່ອວັນພຸດ 25 ກັນຍາ ທີ່ຜ່ານມາ ມີເນື້ອໃນສຳຄັນວ່າ ລັດຖະບານອີຣານບໍ່ມີທາງເຈລະຈາກັບ ສ.ອາເມຣິກາ ພາຍໃຕ້ແຮງກົດດັນ ບໍ່ວ່າຈະເປັນມາດຕະການຂວໍ້າບາດຕໍ່ອີຣານ ແລະ ມາດຕະການກົດດັນທີ່ຄ້າຍຄືກັນນີ້ຕໍ່ພາກລັດ ແລະ ເອກະຊົນຂອງປະເທດໃດໆກໍ່ຕາມທີ່ຄົບຄ້າສະມາຄົມກັບອີຣານ ພຽງເພາະບໍ່ປະຕິບັດຕາມນະໂຍບາຍຕາມລຳພັງໃຈຂອງລັດຖະບານ ສ.ອາເມຣິກາ ແລະ ຮຽກຮ້ອງໃຫ້ລັດຖະບານ ສ.ອາເມຣິກາ ຈົ່ງເຂົ້າໃຈເຖິງຄວາມສຳຄັນຂອງຂໍ້ຕົກລົງນິວເຄຼຍ ສະບັບປີ 2015.

Hassan Rouhani, President, Islamic Republic of Iran 

ຂະນະດຽວກັນ, ທ່ານ ຮັສຊັນ ໂຣຮານີ ກ່າວອີກວ່າ ສະຖຽນລະພາບດ້ານຄວາມໝັ້ນຄົງ ແລະ ຄວາມປອດໄພຂອງຕາເວັນອອກກາງ ໂດຍສະເພາະອ່າວເປີເຊຍ ທີ່ລວມເຖິງຊ່ອງແຄບຮໍມຸສ ກຳລັງຢູ່ໃນຈຸດຂອງການລົ້ມສະຫຼາຍ ຫາກພາດພັງພຽງຄັ້ງດຽວ, ແລະ ຢືນຢັນວ່າທຸກຝ່າຍໃນອີຣານມີຄວາມພ້ອມລະດັບສູງສຸດໃນການປົກປ້ອງອະທິປະໄຕ ແລະ ພື້ນແຜ່ນດິນອັນຄົບຖ້ວນຈາກການຮຸກຮານຂອງກອງກຳລັງຕ່າງຊາດ ພ້ອມທັງກ່າວອີກວ່າ ເສັ້ນທາງດຽວທີ່ຈະຊ່ວຍຟື້ນຟູສະຖຽນລະພາບດ້ານຄວາມໝັ້ນຄົງ ແລະ ຄວາມປອດໄພໃຫ້ແກ່ພູມມິພາກແຫ່ງນີ້ ຄືການທີ່ ສ.ອາເມຣິກາ ຕ້ອງຖອນກຳລັງພົນ ແລະ ອາວຸດທີ່ເສີມເຂົ້າມາໃນອາຣັບບີ ຊາອູດິດ ກັບອອກໄປເທົ່ານັ້ນ.

ເຊິ່ງການຂຶ້ນເວລາ UNGA ຂອງທ່ານ ຮັສຊັນ ໂຣຮານີ ເກີດຂຶ້ນພຽງວັນດຽວ ພາຍຫຼັງທີ່ທ່ານ ໂດໂນ ທຣຳ ທີ່ກ່າວປະນາມອີຣານ ວ່າເປັນປະເທດກະຫາຍເລືອດ ແຕ່ຍັງບອກວ່າການເຈລະຈາຂອງສະຫະລັດ ອາເມຣິກາ ບໍ່ໄດ້ປິດຕາຍ, ໃນດ້ານຂອງທ່ານ ໄມ ພອມແພວ ລັດຖະມົນຕີກະຊວງການຕ່າງປະເທດ ສ.ອາເມຣິກາ ກ່າວພາຍຫຼັງຈາກນັ້ນວ່າ ລັດຖະບານ ສ.ອາເມຣິກາ ຕ້ອງການສະແຫວງຫາທາງອອກຮ່ວມກັບອີຣານໂດຍສັນຕິ ແລະ ເສັ້ນທາງຕໍ່ຈາກນີ້ຂຶ້ນຢູ່ກັບອີກຝ່າຍ.

ໂດຍຄວາມສຳພັນລະຫວ່າງ ສ.ອາເມຣິກາ ກັບ ອີຣານ ທີ່ເຄັ່ງຕຶງຢູ່ແລ້ວ ໄດ້ຍົກລະດັບຂຶ້ນຕື່ມອີກ ເມື່ອເກີດເຫດຝູງໂດຣນໂຈມຕີໂຮງກັ່ນນ້ຳມັນຂະໜາດໃຫຍ່ 2 ແຫ່ງຂອງອາຣັບບີ ຊາອູດິດ ເມື່ອວັນທີ 14 ກັນຍາ ທີ່ຜ່ານມາ, ເຖິງແມ່ນວ່າກອງກຳລັງຕິດອາວຸດຮູຕີ ໃນເຢເມນ ຈະອອກມາຍອມຮັບວ່າເປັນຜູ້ກໍ່ເຫດກໍ່ຕາມ ແຕ່ ສ.ອາເມຣິກາ ແລະ ພັນທະມິດເຊື່ອວ່າເປັນການກະທຳຂອງອີຣານ.

HTML tutorial