ມາເລເຊຍ ວ່າມະຫາອຳນາດຂົ່ມເຮັງແຕ່ຊາດອື່ນດ້ວຍການຂວ້ຳບາດ ແລະ ໂລກນີ້ໄຮ້ທີ່ເພິ່ງພາຢ່າງແທ້ຈິງ

ລາຍງານ 28 ກັນຍາ 2019, ທ່ານ ດຣ. ມະຫາເທ ໂມຮຳໝັດ ນາຍົກລັດຖະມົນຕີມາເລເຊຍ ກ່າວຖະແຫຼງຕໍ່ກອງປະຊຸມສະມັດຊາໃຫຍ່ສະຫະປະຊາຊາດ (UNGA) ຄັ້ງທີ 74 ທີ່ນະຄອນນິວຢອກ, ສະຫະລັດ ອາເມຣິກາ ເມື່ອວັນສຸກ 27 ກັນຍາ ທີ່ຜ່ານມາ ມີເນື້ອໃນສຳຄັນໃນຕອນໜຶ່ງ ຮຽກຮ້ອງໃຫ້ປະຊາຄົມໂລກຮ່ວມກັນຄວບຄຸມການໃຊ້ມາດຕະການຂວໍ້າບາດ ເຊິ່ງຜູ້ນຳມາເລເຊຍກ່າວເທົ່າທີ່ຕົນສຶກສາມາ ບໍ່ມີກົດໝາຍລະຫວ່າງປະເທດຂໍ້ໃດຮັບຮອງບັນຫານີ້ຢ່າງຊັດເຈນ ແຕ່ເປັນເອກະສິດຂອງປະເທດທີ່ຮັ່ງມີ ແລະ ມີອິດທິພົນຫຼາຍກວ່າ ທີ່ໃຊ້ມາດຕະການນີ້ເປັນເຄື່ອງມືຕາມລຳພັງໃຈໃນການກົດຂີ່ ແລະ ຂົ່ມຂູ່ ຫຼື ໃຊ້ຕໍ່ລອງກັບປະເທດທີ່ນ້ອຍກວ່າ.

ທ່ານ ດຣ. ມະຫາເທ ໂມຮຳໝັດ ກ່າວອີກວ່າ ການທີ່ຕົນຍົກບັນຫານີ້ຂຶ້ນມາກ່າວ ເປັນເພາະເມື່ອໃດກໍ່ຕາມທີ່ປະເທດໃຫຍ່ ແລະ ມີອິດທິພົນໃຊ້ມາດຕະການຂວໍ້າບາດຕໍ່ປະເທດໃດໜຶ່ງ ກາຍເປັນວ່າປະເທດທີ່ເຫຼືອ ຫາກຄົບຄ້າສະມາຄົມກັບປະເທດນັ້ນ ຈະຖືກຂວ້ຳບາດໄປໃນໂຕ ເຊິ່ງມັນບໍ່ເປັນທຳຢ່າງຍິ່ງ, ກ່ອນທີ່ຈະກ່າວວິຈານສະຫະລັດ ອາເມຣິກາໂດຍກົງວ່າ ເປັນປະເທດທີ່ດຳເນີນນະໂຍບາຍລັກສະນະທີ່ຫຼາຍທີ່ສຸດ ໂດຍສະເພາະໃນສະໄໝປັດຈຸບັນ ພາຍໃຕ້ການນຳຂອງທ່ານ ໂດໂນ ທຣຳ ທີ່ຂວໍ້າບາດອີຣານ ແລະ ຂົ່ມຂູ່ຈະໃຊ້ວິທີດຽວກັນນີ້ກັບປະເທດໃດໆກໍ່ຕາມທີ່ຊື້ນ້ຳມັນດິບກັບອີຣານ, ມາດຕະການຂອງລັດຖະບານ ສ.ອາເມຣິກາ ສົ່ງຜົນຕໍ່ເສດຖະກິດຂອງມາເລເຊຍຫຼາຍ ແລະ ເຮັດໃຫ້ມາເລເຊຍບໍ່ເຫຼືອທາງເລືອກ ນອກຈາກຈຳເປັນຕ້ອງປະຕິບັດຕາມ ເພາະຍັງບໍ່ມີອິດທິພົນພຽງພໍທີ່ຈະໄປຕໍ່ລອງກັບລັດຖະບານ ສ.ອາເມຣິກາ ສະທ້ອນໃຫ້ເຫັນວ່າປະຊາຄົມໂລກ ໝົດທົນທາງ ແລະ ໄຮ້ທີ່ເພິ່ງພາຢ່າງແທ້ຈິງ.

ນອກຈາກນີ້, ນາຍົກລັດຖະມົນຕີມາເລເຊຍ ຍັງກ່າວເຖິງມາດຕະການລະງັບການນຳເຂົ້າຜະລິດຕະພັນນ້ຳມັນປາມ ເພື່ອໃຊ້ເປັນເຊື້ອໄພຊີວະພາບຂອງສະຫະພາບເອີຣົບ ທີ່ກຳລັງຈະມີຜົນບັງຄັບໃຊ້ໃນປີໜ້າ ວ່າຍັງບໍ່ມີຫຼັກຖານຊັດເຈນ ວ່າການໃຊ້ປາມນ້ຳມັນເປັນອັນຕະລາຍ ແລະ ຕີລາຄາວ່າເປັນການກີດກັນການຄ້າ, ແຕ່ໃນກໍລະນີນີ້ EU ໃຫ້ເຫດຜົນເລື່ອງສິ່ງແວດລ້ອມວ່າ ເນື່ອງຈາກມີການຈູດ ແລະ ຖາງປ່າເພື່ອປູກພືດຊະນິດນີ້ ເຊິ່ງເປັນການທຳລາຍເນື້ອທີ່ປ່າ ແລະ ແຫຼ່ງທີ່ຢູ່ອາໄສຂອງສັດປ່າຫາຍາກຫຼາຍຊະນິດ ໂດຍສະເພາະລີງກໍຣິລາ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube